紅魔鬼賽後評 英超 曼聯 1-0 富咸 (16-8-2024)

紅魔鬼賽後評 英超 曼聯 1-0 富咸 (16-8-2024)

1. 英超揭幕戰，曼聯主場以一比零小勝富咸，全取三分。

2. 其實比賽結果反映唔到場上面兩隊既戰況，事實上我認為曼聯今場既表現真係比起富咸優勝好多，贏波絕對係合理。

3. 不過你話係咪贏得好有說服力，我諗真係睇你觀點同角度點睇。今場曼聯大部份時間都係控制住戰局，亦同樣創造咗四、五球好機會，唔計入波，其中三球可以話係超級黃金機會，唔係要求你次次都入晒，但三球起碼都應該要入到一球吖…

4. 正如我之前一直講，由季前賽開始我哋都睇呢支紅魔鬼唔係製造唔到機會，佢哋係製造唔到入球啫，啲把握力真係恐怖到痴線。

5. 上場鬧完華舒福敗家，今場般奴就證明比我睇，敗家唔係福仔既專利，佢兩球單刀都比富咸門將利奴救出…

不過最肉酸既要數到加拿祖臨完場空門射出界…雖然福仔係稍為傳後咗少少，但以加拿祖既級數係應該修正到…

6. 不過又咁講，利奴今場波雖然有球失誤差啲累輸波，但佢既表現真係好好，除咗救咗兩球般奴單刀之外，亦都救出咗曼治既近射。不得不說，利奴啲封位真係癲。

7. 整體黎講，曼聯係控制咗戰局，但就硬係入唔到波。富咸真係有威脅既射門並唔多，唯一有少少威脅既，就係迪迪既射門，但都比集中精神既奧拿拿飛身救出。

8. 富咸有威脅既射門遠遠及唔上曼聯，但係佢哋有兩次反擊都好牙煙，一次二打一比麥佳亞響未入禁區之前截到，另一次就係已經殺到落左面底線，地波傳出黎比馬天尼斯解出底線。

9. 其實睇返曼聯近幾場既表現，佢哋既把握力真係差，所以隨住時間一分一秒咁過去，我都越黎越擔心今次主場出擊會失分而回。

10. 好彩，後備上陣地標戰既舒克斯呢個時候挺身而出，一腳禁區內接應加拿祖既快射終於為曼聯打破薑局，睇黎有冇一個好把握力既前鋒真係好重要…今場都見到佢同賀龍既打法係有啲唔同，佢係更多返中場拎波去串連攻勢，攻入呢球都係佢響中圈附近接應般奴既傳波而開始攻勢既。

11. 今場除咗把握力要彈之外，其實成場波都踢得好好。

12. 幾位新兵都交出咗上佳既表現，除咗入波既舒克斯之外，仲有正選出場既右閘馬沙拉維，佢今場無論攻守都非常出色，幾次截擊非常關鍵。

13. 防中既卡斯米路表現亦極為出色，除咗防守之外，進攻亦都貢獻咗唔少，希望真正既佢已經返咗黎。

14. 至於有唔少人屌既華舒福，我又覺得佢今場還好，除咗幾次左路突破之外，臨完場單刀仲要唔貪功，係加拿祖敗家。其實加埋熱身賽睇咗幾場，福仔係積極過上季、進攻走位都好咗，暫時要屌既其實係得一樣，就係佢既把握力，真係嘔血。

15. 同樣係一比零，今季既英超揭幕戰呢場勝仗，比起舊年對狼隊既勝仗真係有說服力得多，逼搶有效、有攻勢、防守冇大失誤，唯一要屌既係把握力。呢個勢頭唔錯，希望可以保持住個勢頭，最緊要係遠離傷兵…

#不專業足球筆記 #足球專欄 #專欄 #我愛紅魔鬼 #英超 #

#紅魔鬼賽後評 #MUNFUL #曼聯 #富咸 #足球 #賽後評

#英超賽後評 #足總盃賽後評 #舒克斯 #地標入波

更多專欄內容︰ https://www.leafopenleafopen.com/unprofessional9up

更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio

廣告時間 -

ig: leafopen3

instagram.com/leafopen3

fb: leafopenleafopen

facebook.com/leafopenleafopen

方格子︰ https://vocus.cc/salon/leafopenleafopen

如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938