以前個巿真係，視乎返唔同地點，基本上都係一齊升，一齊跌，係多同少既分別咁。而家個情況複雜好多，講緊唔單止係個週邊政治環境，例如中美的角力呢類，或者大選拜登老爺會迫聯儲局減息之類，呢類宏觀經濟同地緣政治之後先講。
而家啲樓都有好多唔同產品，例如地點已經差，仲要係納米樓用來做炮房都嫌遠，車位又唔夠，呢類樓，就算來多個大牛巿，都未必炒到佢。比如向狗吐山，向山入面整個盤可以唔夠車位仲要有一房單位，真係諗唔到乜野人會去住？所以呢邊半新樓呎價早就平過晒車站果邊四十年又爛又舊的車站盤。呢類假豪宅周圍都係，睇怕都有排未跌夠。
又例如另一個巿場白居二果類租置同居二巿場，白居二呢個完全係亂政，一來係白居二果班本身向樓巿就係後知後覺班友，有少少購買力又唔識計補地價條數，往往會比一手業主割韮菜，用睇落好似平過巿價好多，實質超高溢價買未補地價的單位，近年居屋班業主可以話係巿場上面最精明的業主，洞悉政策漏洞，同佢地玩好難玩得過佢地。不過，今年房委預計會收到成二萬個公屋單位，綠表＋白居二，去競爭呢個本身就供應不足的二手居屋巿場，相信呢個Sector價位會比較穩定啲。
～待續～
