心神行跤花 1.
頂日恬寂寂 ê 部落格步頻加足 tsuē 號碼，我 tuì 全世界 kan-ta 伊知機我有 teh 寫部落格 ê 翁講「我 ê 部落格今仔日起德國蛟龍。」
「按呢誠好，表示你踮德國 mā 有讀者」翁笑講。「我無啥確定恁德國人 ē uī-tio̍h 頂港無名聲，下港無出名連看板 mā 無興趣落落來 kā 伊摃一下 ê 人匪類伊交 Sandmann ê 美好時間」我講。
「啥物意思？」
「我部落格 ê 德國國旗按時間來推斷，是歐洲半暝，亞洲日時」我講。
「按呢你拄著金瓜鬼」翁隨紲喙笑講。
「我 mā 按呢認為，多謝眾金瓜鬼無 kā 咱棄嫌 mā 感謝𪜶選擇德國 VPN hōo 我有機會風神我 ê 德文」我講。
「啥物意思？」翁問。
「德國國旗愈 tsuē m̄ 捌字看告示 ê 人 ē 掠我做德語輾轉甲若德國人。」
心神行跤花 2.
前幾日步頻發見目今 ê 家己以齒盤拍台文字 buē 閣綿豉叨撚家己背骨「你無使用羅馬字拍台文 kan-ta 怙倉頡(Tshong-khiat)輸入法是 bueh 按怎認捌台語 ê 七聲八調交認捌佗一字是台文字，佗一字是華文字。」
這个轉變按怎來，感謝彼場走 m̄ 著攤 ê 線頂教學，𪜶 ê 教學 hōo 我感受晝痕行路 ê 無自在 mā hōo 我想著我 buē 因為無行𪜶分張 ê 彼條路就 m̄ 知祖厝 tī 佗落。
台語 ê 毋知(m̄-tsai)客語 ê 毋知(mˇdiˊ)， 台語 ê 行路(kiânn-lōo)交客語 ê 行路(hangˇ lu) buē 因為 m̄ 捌羅馬字就無法度區別佗一个是客語，佗一个是台語抑是華語，起因語文文法是文字 ê 底蒂。
除非濫糝甲若中國糜鹿，像《烏鬼記》這段「有道，你來給包頭妗胸口揉一揉，被你著驚一下。」作者講伊是台語文學，認捌台語 ê 人讀著這段應當交認捌德語 ê 人讀英式德文仝款 ê 清楚知機眼前 ê 語法 m̄ 是德文，準做有幾个字一模模一樣樣。以這段文字來做比如：你來、包頭、胸口、揉、你著驚一下交台文字一模模一樣樣，你猶是清楚知影伊 m̄ 是台語，你那讀作者 ê 文字那自動翻譯做「有道，你來 kā 包頭妗 ê 胸坎揉一下(揉揉 leh)，hōo 你著驚一下。」
低路人舉這段例無任何表示家己是行仔內 ê 人，總是台語是我自帕水就慣勢 ê 語言，m̄ 捌台文字，順華文字讀出聲音，猶是清楚知影這是豬母牽去牛墟 ê 無對同，伊 m̄ 是台語小說，伊是鄉土文學，像《鹽田兒女》彼類以華文書寫台文。
清楚認捌這个因由 mā 接受我 ê 台羅交注音有相𫝛症頭分 buē 出 4 聲，m̄-koh 順聲音變化我有才調鬥出音標踮電腦揣字，像 tsu-im、ㄓㄨㄧㄣ mā 有才調寫字，我就無閣綿死綿爛叨撚家己拍台文呔無使用台羅系統。是講，我 ê 倉頡碼號 mā 是記 ABCDEFG m̄ 是日月金木水火土。另外，每一个人有家己 ê 腔口，像 machen 奧地利腔口交德國腔口就無相𫝛，Ich tī 德國 mā 有無相仝 ê 發音。
清楚認捌我 m̄ 捌背骨，這个捌困擾我 ê 齷齪 m̄ 捌閣倚相徛。
心神行跤花 3.
後台 ê 文字拍甲若會使得出一本冊，這久卻揣無半篇來完成獨立一篇，順遮 ê 文字遶尞(lauˊliau) 華語講散光，台語講亂視 mā 講散光(suànn-kǹg) ê 症頭敢若比較早閣較嚴重。較早是眼睭花一蕊，這久是規个目睭齊是花刺必駁(faˊ laˊ bidˋ bogˋ) hōo 我認真愖這件代誌，呔討以台文做部落格主體 ê 因由。
以台文做部落格主體無啥特別因由，若 bueh 搝一條線來講我發覺以台文做主體僫揣 ê Muse 較 bueh 交我相借問，另外我 mā 較有興趣牢 tī 網路交寫字，起因台文有太 tsuē 我從來 m̄ 捌 ê 智識需要網路鬥相共 mā 有太 tsuē 智識需要手寫做筆記。像心適 ê 人出門𤆬三隻獅，看東看西、食東食西、bué 東 bué 西，無味 ê 人，出門 mā 𤆬三隻獅，嫌東嫌西、怨東怨西、罵東罵西，這類無以手做記錄，想 bueh 日本剾刀攑出來，倒剾 gún 翁，我 kan-ta ē 曉這句「愛哭枵」來表示伊 ê 龜毛。簡單一句以台文做部落格主體我發見添忘式(tiamˊmongtedˋ) ê 秀鳳阿姨 mā 轉來相揣，閣簡單一句以台文做主體 hōo 我揣著恬靜，我牢 tī 網路 ê 時間大部份是揣資料 m̄ 是看短影片抑是無意識 ê 成做羊仔疊做伙。
這是 Hummeln 彼是 Biene 我有才調分別比別人有才調區別閣較重要，敢 m̄ 是？這是我 ê 角勢，我無要意家己 ê 需求 kan-ta 追求別人 ê 眼光，這敢 buē 頭較大身 mā 豬頭 m̄ 顧，顧鴨母卵？理解一逝台文漢字，一逝台文羅馬字，一逝華文字是舞豬舞狗兼加添亂視度數，我 ê 𥴊仔店總算免閣掠漏，直接賣我意愛 ê 物，像南屯 ê 信用商店。
