那食下昏飯那聽 La-jí-ooh mā 那看露台影戲變化，本底佮 gún 保持社交距離 ê 厝鳥仔，這久見著 gún 按灶跤行到食飯廳 buē 閣 tshan-tshiūnn 較早按呢隨飛甲無半隻。
Gún 那食飯那享受遮 ê 無經過彩排抑是設計 ê 影戲，步頻西北雨來相揣，厝鳥無愛佮伊做朋友斡頭隨走，賰 gún 隔一个窗佮西北雨相向。
Gún ê 飯頓食 bueh 煞尾，西北雨 mā 若沓沓仔接受家己正港是無人緣臭乞食羶願意離開，「敢閣 bueh 食寡甜粅粅」我問 gún 翁。「當然 mā bueh」伊笑甲裂獅獅，我隨窮碗箸準備換桌，一種我講 buē 出喙若日鬚勻勻仔趖入窗仔門 kā 我叫精神 ê 熟似 hōo 我自動反應越頭看窗仔。
「你 tī 看啥物？」翁問。
「雄雄感覺恁老母 tī 附近」我講。
「𪜶 tī 北部，而且𪜶 bueh 遐爾仔無禮數，無講一聲就來過家過宅」翁笑講。
「天霸王做 ê 代誌齊僫講」我繼續 tuì 窗仔金金相，掠某著猴 ê gún 翁無應話繼續向頭交手機仔纏綿。
「來矣，恁老母來--矣」我大聲喝，聽我按呢喝 gún 翁隨跳起來看向窗仔「Gún 爸母 tī 佗位？」
我手指 Daniel ê 磚坪，伊 mā 順我手指 ê 所在看過去，「彼是 Amsel」翁笑甲強欲痚呴。
「彼 m̄ 是烏鶇彼是恁老母，斟酌看看恁阿母今仔日 bueh 變啥物魍」我講。
烏鶇 kā 頭按 Daniel ê 磚坪探過來，紲落來假做來行跤花，聊聊仔按 Daniel 遐大大典典伐過我栽大同仔兼囥飼料 ê 花坩，又閣大大典典伐轉去 Daniel 遐。
「枵鬼假細膩 ê 恁老母小等下 ē 過來揣飼料」我講。
「彼日摔大雨 ê 飼料猶澹漉漉，我無囥出去」翁講。
「恁枵鬼假細膩 ê 老母 buē 要意這麭幼仔 ê 代誌，m̄-koh 這遮爾仔無順伊意 ê 代誌，伊 ē 跳童」我講。
「你漫画看過頭」翁笑應。
「你家己 ê 阿母你上捌」我目𥍉一下目尾笑應。
Tī 烏鶇猶 tī Daniel 遐，我緊傱去款俗麭交果子醬，「恁老母敢有徙位？」我若走相賽走頭名卻見無半人隨問裁判。
「猶未」翁笑應。
翁仔姐那烘俗麭那看鳥鶇身 tī Daniel 遐，尾翼 tī gún 遮上下擺動 ê 決定，麵包機發出若搖鼓瑯 ê 聲音，我雙目金金相對窗仔外，手捎果子醬抹俗麭，烏鶇 mā 若聽著玲瑯鼓開始 tī Daniel 交 gún 兜忠孝東路行九逝。
囡仔時飼過鳥 ê gún 翁講「伊合該然食飽。」
「Gún 有一句話號做枵鬼假細膩，所以伊 buē 直接講你是青龍盤柱，死豬鎮砧，m̄-koh 伊有耐性，起因總舖師 buē 受得無桶師，像你老母，想 bueh 扞飯頓愛假仙假觸，揣湯匙、洗手有 ê 無 ê」我講。
「Amsel 你有聽著伊 ê 轉彎踅角，Durch die Blume 無?」翁笑甲吭跤翹。
人講 m̄ 通講人尻川後話，這久 ê 烏鶇正港停跤 tī 花坩仔交 gún 金金相，「漚戲拖棚已經結束」我講。
烏鶇 tshan-tshiūnn 勥母見著新婦 m̄ kā 廚房讓 hōo 伊開始詈 gún 背骨，我那食俗麭那笑 tuì 翁講「是 m̄ 是，like Amsel, like your mother。」
