年結就係自己鞭自己屍嘅時候（方格子版）

如果我連年結都寫唔出就真係執得

如果各讀者有聽聞，就知道 Medium 嘅改制令好多作者搵佢哋嘅第二個家。我亦係其中一個。考慮過 Matters、Patreon 同 Wordpress，我認為方格子比較適合我呢種 Holiday Writer。依家襯住新嘅一年，喺方格子開我嘅第一篇文。

回顧 2019 年，我一年前講嘅三樣嘢，一樣都無做到。

《太刀傳》停咗！Publication 無開！獵奇官能小說，唔知算唔算寫咗！

唯一做到嘅就係「年年展望到最後年結都係做唔得哂」。

但係，當我諗番，其實又唔係咁差。

我覺得2019 年喺寫作上係放膽咗。雖然未算得上獵奇官能，但叫突破咗我一啲心理關口。原本只係諗住情人節喺 Medium 寫下《采妮》作為自娛，發佈時仲驚緊有人會篤灰或謾罵。最後竟然有人爆我clap，有人想睇後續，有人係佢自己喺post推薦，真係奇蹟。雖然後續嘅情節一如電影續集般，收視永遠比唔上第一集，但俾咗我好大信心，同話俾我聽可以喺用字、情節同題材上可以大膽同出位啲。

到咗下半年，大家都知乜事。

然後，大家扯旗嘅地方由房裡面變咗喺街頭上。

評論文有如雨後春筍日日都有，好多感受被其他人以更快、更準、更好嘅文筆寫咗出來，咁我決定以較適合自己嘅方法去表達。於是，衍生咗《時事聯想短篇》呢個系列。佢繼承咗《采妮》嘅大膽同哲學，配合時事，再加上明、暗、隱嘅比喻，去表達我嘅一啲感受。

唔知點解我好鍾意 20 同 21 呢兩個數字，所以今年我希望可以開始寫我諗咗差唔多十年嘅嗰篇小說（最後可能諗咗當寫咗）；仲有襯我依家喺香港，可以奉獻我嘅第一次（社運經驗）。當然，希望香港喺呢兩年見到佢嘅唯一出路（知嘅就會明）。

嚟緊嘅一年，除咗陸續將 Medium 嘅文章搬過來，當然就係同步喺兩個平台發佈新文章。

共勉之。