2020-11-20|閱讀時間 ‧ 約 9 分鐘

當首爾仍是叫漢城的那些年（卅叄）

Yesterday all my troubles seemed so far away. Now it looks as though they’re here to stay. Oh, I believe in yesterday.

Suddenly, I’m not half the man I used to be. There’s a shadow hanging over me. Oh, yesterday came suddenly.

星期六，纛島漢江公園籃球場。

打波好似已經變咗我嘅一個 Saturday morning ritual。每個星期六，老地方，同一班人；又唔係完全同一班人嘅，今次多咗 Chloe。

打咗幾個 round 之後，大家都坐咗喺場邊休息飲水。呢個時候，Chloe 碌咗個籃球嚟我度，然後企咗起身，好 cool 咁同我講：「1 on 1!」

在場嘅其餘四個人，包括我在內，都同一時間望住佢，唔係好相信自己對耳。我行到佢前面，用身高壓一壓佢嘅氣焰，然後好 cool 咁用廣東話同佢講：「買板唔知埞。」

佢冇理我，除低佢嗰條啪鈕 Dream Team 長褲，以短波褲上陣；我又見到佢對 42 吋長腿。好！為咗呢 84 吋，嚟啦！

估唔到，我同 Chloe 第一次嘅 1 on 1，竟然唔係發生喺床上，而係籃球場上。

二十分鐘過後，我同 Chloe 仍然未分勝負。

我必須承認，Chloe 比我想像中好波（唔好亂諗嘢）。打咗二十分鐘，佢依然打得有板有眼；運球、射籃、走籃全部都掌握得唔錯。我終於明白，原來佢嘅身高，係同打籃球有關嘅。後來我先知道，原來佢高中嗰陣，係校隊隊員。

比賽繼續進行，Chloe 喺一個中距離位置起手，我從拋物線角度估計，佢呢球應該會撞框唔入，於是我埋去籃底準備搶籃板球；「掌握籃板球嘅人，就能掌握整場比賽」。當我跳起嘅時候，我先發覺，個波嘅落點同我估計有偏差，由撞框變咗擦籃板底。說時遲那時快，個板底波正中我塊面。

我失重心跌咗落地，我摸一摸個鼻，又流鼻血。

家陣我好似每個星期六嚟纛島捐血咁，差唔多個個星期一劑。

Chloe 埋嚟扶我去場邊坐低，然後佢拍一拍大脾，同我講：「瞓落嚟吖，我同你止血。」

原來省個波餅就有 42 吋長腿瞓，咁我唔怕個個禮拜省喎！

我個頭瞓咗喺佢大脾上面，Chloe 好溫柔咁幫我止血，其實我比較喜歡佢溫柔嘅一面，就算呢個低炒角度望住佢都仍然係咁靚；零死角。佢察覺到我目不轉睛咁望住佢，回報咗個甜到漏嘅笑容；幾十萬 volt 電喺我哋兩個之間交流。

「你兩個使唔使咁甜蜜呀？弟弟你有私家俏護士照顧，唔使我啦！」我哋入神到連美恩行咗埋嚟兼望咗我哋一陣都竟然唔知。「妹妹你繼續用你啲溫柔可愛幫佢止血啦！重症嚟㗎，要止耐啲先得㗎！嘻嘻！」

「姐姐你笑人嘅……」Chloe 面紅，但仍然係咁靚。

呢個時候，我諗無論係 Chloe 定係我，都會好享受呢種感覺，一種俾身邊朋友認同戀人關係嘅感覺；雖然我同佢仍然係乜都冇發生過，正正亦因為咁，呢種認同感令我地兩個個心好甜。

同日下午，狎鷗亭 Galleria 百貨公司。

打完波、沖埋涼、換好衫、食埋晏，之後就係我哋散水嘅時候。我同 Chloe 去咗狎鷗亭行街。呢條女越嚟越過份，今日佢繑住我隻手行街，行足咁耐。

「金小姐，」我忍唔住要問。「你今日繑咗我好耐囉喎，乜我好好繑咩？」

「馮先生，」佢笑住無厘正經咁答。「我為你好咋，你今日係傷者，我要好好照顧你。」

坦白講，我真係介意咩？唔係。我唔 enjoy 咩？非常之 enjoy。問題係，無論 Chloe 幾努力，無論我幾 enjoy，去到最後，我哋都只會徒勞無功。我哋而家只係努力咁發展緊一段唔會有結果嘅感情，build up 緊一啲永遠無法 resolve 嘅 sexual tension。換句說話嚟講，我哋只不過係玩緊我哋自己。

如果我哋兩個都係想搵一時嘅快感，我大可以同佢去爆房，狠狠咁砌一鑊至數鑊勁嘅，然後大家各自歸家，佢有佢嘅生活，我繼續我嘅忙碌。我最多瘀口瘀面咁同 Colette 解釋，我做錯全世界好多男人都會做錯嘅嘢；佢會嬲，但我諗佢仍然會原諒我。

問題係，我哋大家都知道，對方都唔係咁嘅人。去到呢個地步，我非常清楚，Chloe 已經開始當我係佢男朋友。而事實上，佢亦都唔算得係一廂情願，因為我都開始鍾意佢。呢兩個事實，再加上 Colette 嘅疑似懷孕，如果我哋繼續落去，除咗悲劇結局之外，我睇唔到其他可能性。

黃昏時份，狎鷗亭江濱。

行到冇嘢好行，我哋盪咗嚟河邊。可能我心事重重嘅樣真係好容易察覺到，Chloe 問我：「你係咪有嘢想講呀？」

「我諗我哋唔可以再繼續咁落去。」長痛不如短痛，咁對大家都好。

「點解咁突然？」Chloe 有啲錯愕，收起笑容；我好少見佢呢個樣。

「Colette 佢好似有咗……」我決定豁出去。

「其實嗰晚喺天台，我見你咁唔開心，我傻到真係有咁諗過，諗完都覺得自己好傻，估唔到係真嘅。」Chloe 語氣非常平淡咁答我。

「所以，我哋唔可以再繼續咁落去。」講嗰陣，其實我個心好疼。

（請各位在腦海中自行補上 CAGNET 嘅「Close to you」鋼琴獨奏）由喺東大門嘅偶遇開始，幾個月以嚟嘅朝思暮想，自學堂重遇以嚟嘅曖昧，秋夕以嚟嘅如影隨形，喺呢段對話完結之後，就會灰飛煙滅。

「記唔記得，我同你講過，我冇要求你為我做任何嘢？」佢問我，我點頭。

「唔知點解，喺我撞返你嗰日，我已經發覺自己鍾意咗你；我從來未試過咁嘅感覺，連我自己都解釋唔到。我真係冇諗過要同 Colette 爭男朋友，我只係想，喺你返去佢身邊之前，繼續咁見住你，你繼續陪住我；我真係冇諗過要再進一步。」

「你可能覺得我咁做好自私，但我都感覺到，你唔係對我全無感覺；」佢望一望我，我點頭。「我唔知姐姐有冇同你講過，我哋韓國人，到咁上下年紀，父母就會為我哋準備相親；就算我有權選擇，我嘅選擇都唔會多。我只係想喺我要嫁一個我唔知鍾唔鍾意嘅人之前，真真實實咁愛一次、愛一個我真心鍾意嘅人。」

Dreams aren’t crazy — it’s the real world that’s insane, if only in the stubbornness with which it sticks to the current of events.

Chloe 講完之後，攬住咗我；佢攬得好實。然後，我感覺到佢喊緊。呢個時候，我除咗攬實佢之外，仲可以做乜？

我哋一直咁擁抱，我都唔記得攬咗幾耐。半個鐘？一個鐘？有關係咩？有，如果時間可以停頓的話，我希望我哋可以一直攬落去。因為，此時此刻，喺呢個偌大嘅世上，能夠容納我哋嘅空間，就只有我哋擁抱嘅距離。

良久，佢鬆開手，抬頭望住我。我見到滿面淚痕嘅 Chloe，就好似啲韓國悲情 MV 裏面嘅女主角。淚容化成利劍插穿我個心，一陣劇痛。

呢個時候，我終於明白，我對 Chloe，已經唔係「有好感」咁簡單。

「可唔可以唔好離開我？」Chloe 好細聲咁問我。

我點頭。

係，我喺度𠱁緊佢，同時亦都𠱁緊自己。但唔係咁，我可以點答佢？睇吓點？應該得啩？或者啦？如無意外？可能啩？到時先算？

係呢一刻，除咗𠱁住佢先，我真係乜辦法都冇。

之後，我送佢返屋企。喺佢樓下，佢再問我：「你仲會唔會見我㗎？」

「會，如果你唔再喊的話。」的確，佢笑個樣靚好多。

「蠢蛋，有女仔肯為你流淚，你唔覺得浪漫嘅咩？」佢講嗰陣係微笑嘅。

「你睇得太多韓片喇，轉睇西片啦！」我唔係講笑㗎，佢睇啲韓片，真係會睇壞腦。

「你陪我睇囉。」佢終於回復佢嘅甜美笑容。「我返去喇，聽日 call 你啦，good night!」

佢今次個 goodbye kiss，錫喺我嘴唇上。估唔到，我哋個 first kiss 會發生喺咁嘅情況下。

朋友願明白不用待我太好了情多真我也只能夠推掉現時圍著我的多跟少已經都不再重要

浪漫嘅代價，就係一條友戇鳩鳩咁搭廿四個站地鐵返屋企；第時如果仲有機會識其他女的話，最緊要揀個住得近啲嘅。

當我正想瞌眼瞓嗰陣，電話響，係 Colette。

佢同我講，佢用咗三隻唔同牌子嘅驗孕棒，結果出咗三個唔同答案，一支話有，一支話冇，一支模稜兩可；佢覺得日子太短，根本連醫生都未必驗得出。從佢嘅聲線，我可以感覺到佢嘅情緒都幾低落。

其實我明嘅，有就有，冇就冇，起碼有個答案。而家係落晒注，但個荷官係都唔揭盅，呢種感覺又真係幾討厭嘅；唔係我都唔會典地典咗咁多日啦。

我安慰佢，叫佢唔好咁擔心，係你嘅始終係你嘅，急唔嚟。

真係可以唔擔心咩？

（待續）

👶👶👶

分享至

成為作者繼續創作的動力吧！

《當首爾仍是叫漢城的那些年》

追蹤

當首爾仍是叫漢城的那些年（卅叄）

作者的相關文章

IF的沙龍的其他內容

你可能也想看

發表回應

當首爾仍是叫漢城的那些年（卅叄）

作者的相關文章

IF的沙龍 的其他內容

你可能也想看

發表回應

IF的沙龍的其他內容