編輯嚴選兩個蠢蛋的《十八春》 — 給 Chloe 的一個童話結局（上）
編輯嚴選
2021/04/13閱讀時間約 16 分鐘
玻璃倒映了今生不再的幻象
1997 年 6 月中，華盛頓 K 街某 greasy spoon 餐廳。
Greasy spoon，泛指一啲老式、專賣煎炸肥膩食物、如巨型 corned beef 三文治、漢堡飽之類嘅餐廳；亦係我同 Colette 繼 pizza 以外嘅最愛。
「牧師頭先同你講乜呀？」Colette 一邊講、一邊喺我份漢堡飽中間，偷咗塊煙肉食。佢就係咁，自己嗰碟有，都仲要偷人啲嘢食。
「唔准偷食！」遲咗喇，佢已經放咗入口。「我哋南韓分會贊助嗰間語言學校唔夠人手，佢問我有冇興趣去試吓教英文。」
「南韓？韓國菜好辣喎；」Colette 繼續打緊我啲薯條主意。「你覺得呢？」
「首先，我覺得你唔好再偷我啲嘢食，你自己都有；」Colette 嘟嘴，食返佢自己嗰碟。「然後，其實我係想問你意見。」
「首先，我覺得我點都要偷多你一塊煙肉，」佢邊講邊偷，三塊煙肉佢食咗兩塊；正衰婆。「然後，我覺得好喎，見識一吓喺海外工作嘅滋味都唔錯吖。」
「咁你自己一個喺 DC，掂㗎嗱？」我問佢。
「我幾時會唔掂？」佢漫不經心咁答；然後，佢望住我。「我哋已經分咗手㗎喇。」
「既然係咁，我喺香港 book 多一程去漢城嘅機票啦。」好，你個衰婆咁串，就走俾你睇。日後你要揳灶罅嗰陣，唔好問我借廚房。
1997 年 6 月某個下午、一個簡單嘅決定，永遠咁改變咗三個人嘅下半生。
我同 Colette，最終都冇喺返埋一齊。
儘管 Chloe 唔止一次同我講，希望我同 Colette 可以重新開始。但係經歷咗咁多事情，再加上我同 Chloe 嘅悲劇結局、佢同 Chloe 嘅姊妹之情；一切微妙而複雜嘅千絲萬縷，令到我哋兩個唔可能再喺返埋一齊。
同時地，我哋亦都冇「分開」過。往後嘅十幾廿年、時至今日，我呢個初戀情人，仍然係我最好嘅朋友。
遺憾嘅係，我、Colette、Chloe 喺當晚老地方嘅「天台之聚」之後，就未曾再聚首一堂。當晚我哋三個喺老地方舉杯暢飲嘅情景，可一不可再。
雖然冇約定，但係有條底線，我哋兩個都無法衝破：我哋從不出席對方嘅婚禮；Colette 一個，我兩個。我哋從來冇談論過呢樣嘢，亦都有邀請對方出席，但係……總之我哋從來到冇喺對方嘅婚禮上出現過。
那故事倉猝結束 不到氣絕便已安葬
教兩人 心裡有道不解的咒 沒法釋放
可能呢個就係原因？我唔知，亦都無意去證實。離開不應再打攪愛人，對不對？
Colette 喺 2004 年結婚，婚禮喺洛杉磯舉行，Chloe 係佢嘅陪嫁姊妹之一。Colette 嘅婚姻生活美滿，婚後定居新英格蘭。雖然因為工作關係，佢每個星期都要穿梭華盛頓同新英格蘭兩地。佢哋有兩個小朋友，而家都已經係 teenager。
一直擁有「天使愛美麗」性格嘅 Colette，曾經苦心安排，希望我同 Chloe 可以喺佢嘅婚禮上再遇；希望喺唔同嘅時間、唔同嘅空間，我哋兩個，可以有情人終成眷屬（其實佢心裏面個 plan，係我同 Chloe 喺出席完佢個婚禮之後就私奔，去一個冇人識我哋嘅地方重新開始。法國妹諗嘢傻得嚟都幾可愛）。
可惜，佢嘅苦心最終白廢，因為我冇出席佢嘅婚禮。
根據 Colette 嘅形容，Chloe「滿心歡喜咁等我出現，然後失望而回」。
Colette 唔知道嘅係（其實佢知，只不過 ignore the fact），我嘅缺席，其實係我同 Chloe 最後互相承諾嘅一部份。
2000 年初，亦即係我離開之後兩三個星期，Chloe 確診患上抑鬱症。可幸嘅係發現得早，病情唔太嚴重，但亦都花咗半年嘅時間去治療，以及漫長嘅跟進觀察。
喺病情最壞嘅日子，Chloe 完全唔肯同外界接觸，除咗每日同我聯絡之外，佢拒絕同任何人對話，亦因此缺課差唔多一個月；幸好 Esther 明白事理，冇因此而解僱佢（你知道，韓國人絕對做得出）。
最後，美恩冒住生命危險（Chloe 反抗時打傷咗佢），強行將 Chloe 接去佢屋企暫住，事情先至開始好轉。遺憾嘅係，美恩同 Chloe 嘅姊妹情並冇因此而修好。Chloe 之所以仲肯見美恩，完全係因為我要佢向美恩或者 Ricky 定期報平安 — 我須要一個我信得過嘅人，去目測佢嘅精神狀態。
抑鬱症醫得好，但係佢食煙飲酒嘅習慣，戒唔甩之餘，仲轉趨嚴重；一半怪我（即係食煙嗰一半）。
Esther 嘅學校結束之後，Chloe、Ricky 同惠晶一齊轉職去鐘路某英語學院工作。
喺離開漢城後，我同 Chloe，並冇因為分隔異地而停止來往。漢城之後嘅三年，我哋每一日都透過唔同嘅途徑聯絡；有時係 email/ICQ、有時係電話、有時 SMS、有時係 video call。三年，無論我做緊乜嘢工作、有幾忙、有冇女朋友，我哋都會每日聯絡，未曾停止過一日。
通訊之餘，我哋每年亦都起碼見面幾次；喺 02 年，我哋甚至一齊喺韓國睇世界盃。香港、澳門、台北、上海、漢城、濟州、長白山（相傳係朝鮮族嘅起源之地）；呢啲都係我哋會面嘅地方。最短兩日，最長一次，佢喺香港住咗四個星期，直到 Ricky 同惠晶「通緝」佢 — 因為佢又曠工。
嗰四個星期，係我哋被迫分開之後，最開心嘅日子。平日放工時份，佢會由我清水灣嘅屋企，揸車出九龍接我放工；假日我哋又再好似喺漢城咁四圍去，晚上我哋會去二灘放狗、或者喺天台睇星（租丁屋最美麗之處）。呢啲咁開心嘅日子，係我哋堅持落去嘅精神支柱。
但同時地，因為「百濟公主」嘅「魔咒」、因為我係賤男人（代我啲女讀者講嘅），所以，我繼續結識異性。每一次我有新女朋友，Chloe 都知道；去到第三次，Chloe 問我：
「你仲要懲罰自己到幾時？」
當 Colette 都開始怪責我玩弄感情嘅時候，Chloe 係唯一一個了解我嘅人。因為佢知道，每開始一段新嘅戀情，我嘅心路歷程，對於我自己嚟講，基本上係一種懲罰。因為佢知道，喺感情上，我係一個適應力奇差嘅人。
其實，佢又何嘗唔係懲罰緊自己？Chloe 係一個佔有慾強而且容易起醋意嘅女人，聽住我不斷咁同其他女人一齊，佢自己都唔會好過。
三年，我消耗咗八個女朋友。呢班女人，完全係我同 Chloe 嘅異地戀情中嘅祭品。八個女人，絕大部份都係因為頂唔順 Chloe 嘅存在，而同我分手（佢哋同我一齊嗰陣已經知情；我冇呃人）。有兩三個，係因為 Chloe 一句「我覺得佢對你唔夠好」或者「我唔容許佢咁樣對你」而被我提出分手。
畢竟，受傷過後，我同 Chloe，都已經唔再係當日善良純真嘅情侶。我哋都開始為咗一己嘅喜惡，唔介意去傷害別人。我哋冇天份去做神雕俠侶，於是變咗黑風雙煞。
好幾個「她」選擇對我行高壓政策（港女嘅嘢，你知啦），其中一兩個喺不得要領嘅情況之下，宣之於情緒發洩。佢哋以為，咁樣我就會怕、就會向佢哋低頭。佢哋唔知道嘅係，佢哋咁做，只係將我進一步推向 Chloe、同佢更緊密咁連繫埋一齊。
然而，三年時間，我同 Chloe 面對嘅困局，仍然毫無改善。我哋呢段情，仍然見唔到未來。
最後，喺 2002 年 12 月，我哋喺濟州相聚咗十日。喺呢十日裏面，我哋決定真真正正咁分手 — 其實係我嘅決定，佢喺無可奈何之下，接受呢個決定。
因為我哋都熟悉對方嘅性格，知道如果分手之後，仍然保持聯絡，或者保持形式上嘅朋友關係，我哋結果都會再喺返埋一齊；因為太愛對方，因為唔捨得對方。所以，我哋亦都決定，分手之後，完全斷絕聯絡、唔會再見對方。
我哋決定，將對方從自己嘅生命之中刪除。
我一直都認為，只有咁，Chloe 先可以重新開始，真真正正咁放低我，返回正軌，結識一個佢可以附托終生嘅人，共諧白首。Chloe 當時廿七歲，只要佢肯放低我，佢仍然大有機會可以搵到個好老公。
呢一次，係我人生當中最痛嘅分手；傷口從來冇癒合過。
살다가 널 만나면 모질게 따지고 싶어 （如果再遇見你，我會問個清楚）
힘든 세상에 나홀로 남겨두고 （為何把我一個人丟在這艱苦的世上）
왜 연락 한번 없었느냐고 （為何要斷絕聯繫）
아무것도 난 해준게 없어 （我什麽都沒有爲你做過）
받기만 했을뿐 （一直只在接收）
그래서 미안해 （所以我很抱歉）
나같은 여자를 왜 사랑했는지 （你爲何會愛上像我這樣的女人？）
왜 떠나야 했는지 （又爲何要離開？）
어떻게든 우린 다시 사랑해야해 （無論如何，我們必須再次相愛）
「再見喇，蠢蛋老公。祝你永遠幸福。」
「再見喇，蠢蛋老婆。盡快忘記我呢個負心人，重新開始。」
「你唔係負心人，我永遠愛你。」
上面呢三句，就係我哋嘅最後對話。2002 年 12 月 30 日，仁川空港；我同 Chloe 終於完完全全咁分開。
（按：有關呢三年嘅事情，熟悉我風格嘅讀者睇完之後，可能會覺得，點解會有啲欲言又止感覺？因為，我仲構思緊，《漢城》之後嘅後續故事，亦即係呢段時間嘅故事；所以，請容許我喺呢度留白一吓。
新故事唔會全部都係呢類記實況式嘅小說，我會用另外一個手法嚟講呢個故事。大家亦無謂擔心上面嘅所謂「劇透」 — 坦白講，《漢城》個結局，你哋一早都知，但亦無礙大家追看嘅興致。真正好睇嘅故事，無懼劇透；我希望我做得到呢點，大家亦無謂執著。）
離開一個熱戀五年嘅戀人，實在唔係一件容易嘅事情。之前同 Colette 六年戀情無疾而終，其實當時日子都唔好過；但係有 Chloe 嘅陪伴，將殺傷力減至最低。如今我要離開 Chloe，最佳方式（起碼我認為係）就係搵過另外一個女朋友。
我前妻係我讀 LLB 嘅同學，識咗一段時間，但一直冇交深。分手之後，我同佢開始接近，好快就熱戀，好快就結婚；因為，大家都近「三字頭」喇。
我以為，一切就咁可以重新開始；我以為，我終於可以放低過去、迎接人生嘅新一章。
然後，半年後，我哋簽紙分居。幸好，今次一啲都唔關 Chloe 事。
我開始覺得好迷失，我開始問自己，如果我唔掉低 Chloe，我哋嘅處境，會唔會有唔同？當日我係咪應該堅持落去？
2005 年 12 月初某天，三一大路近鍾路2街某 cafe。
結束一年嘅歐洲自我放逐之後，我取道美國南韓返港。由於 Colette 湊 BB 湊到踢晒腳，我唔好意思打攪佢；於是去咗 LA 探佢媽媽 Amélie。某程度上，Amélie 係我半個媽媽；當然唔係姻親關係嗰隻，而係因為佢真係好錫我。
探完佢之後，我去咗韓國，喺濟州逗留咗一星期，同喺當地工作嘅惠晶同 Kirsty 聚舊。然後，我喺首爾留咗五日。
「咁多年冇見，終於有時間返嚟見吓啲老朋友喇！」坐喺我對面嘅係 Ricky，幾年冇見，開始有個「爸爸樣」。
「係呀，我專程返嚟探你㗎！」我答佢。「你係咪應該請我食韓牛呢？」
「專程我信，至於返嚟探我，定係探『佢』呢，我就唔知喇！」Ricky 同美恩結婚多年，開始有佢老婆嘅聰明。
「其實，我唔係好肯定，今次返嚟，究竟見唔見佢……」對住老朋友，我都無謂遮遮掩掩喇。
「真係咁決絕？」Ricky 當然知道，我同 Chloe 嘅故事。我當日同 Chloe 斷絕聯絡之後，就曾經「托孤」佢兩公婆，拜託佢哋好好照顧 Chloe。「你嘅苦心，我明白；但係見一面，真係有咁大影響？」
「Better safe than sorry；一場辛苦，唔好因為一時衝動而白白浪費。」我答佢。「係呢，佢點呀？」
「表面上都係一個幾開心嘅人，同所有同事都好合得嚟；」咁多年嘅相處，Ricky 對佢呢個「妹妹」其實好了解。「但其實，佢圍住自己起咗一道牆，唔俾任何人進一步接近佢。食煙飲酒都比以前嚴重；同埋，佢仍然唔肯原諒美恩，我做咗佢哋兩個溝通嘅『中間人』……」
其實呢啲說話，我唔係第一次聽；幾日前，惠晶都係咁形容一年前嘅 Chloe。自從美恩被 Chloe 踢出 circle of trust 之後，惠晶呢個原本同佢「貼錯門神」嘅歡喜冤家，慢慢就變成好姊妹。好多時，當 Chloe 唔守規矩（例如曠課同我見面，或者自隊完 hangover 唔知醒）嘅時候，作為 admin manager 嘅惠晶，都會打茅波幫佢「包底」。
「佢今日放五點半；」Ricky 望一望手表。「你如果想見佢的話，到時喺學校門口等佢就得。」
見我一定想見，就係驚見完之後，幾年嘅努力打回原形，我哋又繼續返入個死胡同裏面磋跎歲月。
同 Ricky 飲完咖啡後，佢返咗學校繼續開工，我就喺2街附近遊蕩。大約喺五點二十分，我「不知不覺」咁「閒蕩」咗去學校正門嘅對面馬路；唔知喺度等乜。
其實我唔肯定，當時嘅我係清醒嘅；就算係清醒，我個腦一定唔係 fully functional。
我冇諗住同佢見面，我只不過係想喺佢放工之前，睇吓佢工作嘅地方；頂多係離遠望佢一眼，一眼就夠……
多麼想用說話留住你 心中想說
一生之中 都只愛你 為何換了對不起
當天分手像我完全負你
這傷痛盼望輕微 望你漸忘記
我每日也想著你 靠在這街中等你
遙遠張望 隨你悲喜 視線人浪中找你
行近我又怕驚動你 我又怕心難死
立定決心以後分離
一生裏頭 誰是我的心中最美
往日的你
未夠五點半，一個熟悉嘅身影踏出學校正門，係 Chloe；我差啲唔記得，「金老師」有個習慣，永遠早五分鐘落堂。
啱啱三十歲嘅佢，仍然美麗如昔。一頭深啡色 one length bob 短髮、玳瑁色膠眼鏡、略為消瘦嘅身形、仍然係著住一件白色長褸。少咗從前嘅跳皮活潑，往昔嘅鄰家女孩如今多咗一份略帶書卷氣嘅女人味。
記唔記得，我曾經喺小說裏面多次提及過，我同 Chloe 有一種心靈相通？喺呢個時候，Chloe 突然煞有介事咁向我望過嚟。佢唔係向我呢個方向搜索，係直接咁望住我，好似知道我嚟咗咁；但佢冇可能事先知道。就算 Ricky 話俾佢知我嚟咗，佢都冇可能知我 exactly 企喺邊。
一對曾經苦戀五年、然後分開三年嘅戀人，就係咁隔住三一大路嘅四條行車線，喺街頭凝望。霎時間，所有嘅互相承諾、計劃、擔心都被我拋諸腦後。
四目交投，時間停頓。我從佢嘅眼神中，感覺到惶恐不安、有啲不知所措。佢下意識略為整理一吓佢嘅頭髮；然後，佢眼中閃出一點靈光；靈光慢慢喺佢嘅面上擴散、漸漸變成一個甜美笑容嘅表情。然後，佢開始環顧四周嘅交通，企圖喺繁忙嘅三一大路上、搵出一個可以過馬路嘅缺口。
呢個時候，我嘅理智突然間歸位，提醒我：「Better safe than sorry；一場辛苦，唔好因為一時衝動而白白浪費。」
我趁佢仍然搵緊空間過馬路、準備開步之前，貪婪咁望多佢一眼，然後依依不捨咁轉身走。喺我大約走咗十米左右嘅距離時，我聽到身後響起 Chloe 嘅聲音：「Alan，唔好走呀！」佢講廣東話。
我赫然發覺，原來佢已經過咗馬路。我一時唔記得，呢條女著慣平底鞋，行路好快。
於是我向住鍾路方向發足狂奔，然後佢窮追不捨。一對曾經苦戀五年、然後分開三年嘅傻戀人，就係咁喺條繁忙嘅行人路上、左閃右避咁玩短衝程追逐。
我一直跑到鍾路，趁住「燈尾」衝咗過馬路。我大約過咗一半多啲，行人交通燈已經轉紅。到我再踏上行人路嗰陣，身後嘅交通已經恢復熙來攘往。
我擰轉頭望返過對面馬路，Chloe 被紅燈欄住咗，好焦急咁企圖搵空隙過馬路。我唔想再有咩意外發生，於是乎我繼續跑，直至到我跑咗入仁寺洞嘅分岔路、確定佢冇可能追得上嚟，我先至停步。
그냥 가던 길로 지나가 주세요 （請繼續走你要走的路吧）
괜찮아요 뒷모습 내겐 익숙해요 （沒關係 我已習慣看著你的背影）
멀리 가버린 뒷모습 （從後看著你漸遠的背影）
보는 여긴 내 자리인 걸요 （這是我的位置）
喺美劇《House of Cards》中，Frank Underwood 曾經講過，「What’s the face of a coward? The back of his head as he runs from the battle.」呢句說話對於 Chloe 嚟講，應該係「What’s the face of a coward? The back of my man’s head as he runs from me.」
事隔三年，我再一次「離開」Chloe。我係一個逃兵，我係一個懦夫。
呢次亦都係我最後一次見到 Chloe。
（待續）
為什麼會看到廣告
留言0
查看全部