西北雨的聯想

「西北雨，直直落，鯽仔魚，欲娶某，鮕鮘兄，拍鑼鼓……」

今仔日下晡的時陣，略略仔霆雷公，聲音是予人感覺遠遠遠，毋過真緊就開始透風落雨，雨一時仔就拚真濟，這就是咱臺灣熱天的名產—「雨北雨」啦！

講起來，我猶是真愛這種雨，逐改熱人的時，下晝就落一陣仔西北雨，若親像走入去冰店食冰仝款，予人感覺心涼脾肚開，偌爾仔爽快咧！共燒氣攏消敨去，一陣風吹過來，就予我感受著清爽的幸福。

會記得我細漢，猶咧讀國校，彼个時陣我定定愛佮阮厝邊的囡仔做伙𨑨迌。阮兜後壁閣行一節仔路，有一間茶店仔佮刣豬間，遐的邊仔閣有一間細細間的百姓公廟佮一大坵的墓仔埔，講起來實在是真奇怪的三个所在，煞攏徛作伙。阮細漢的時，毋捌啥物是「茶店仔」，干焦知影定定有警察阿叔會駛車去遐，嘛毋知in是去遐創啥？

茶店仔佮阮逐家蹛的所在，中央愛經過一大坵的田，逐年攏種稻仔。會記得有一个下晡，天頂烏陰，我佮一陣囡仔走去田裡耍猶袂煞，無偌久天公伯仔就踮天頂摒西北雨落來。逐家攏走袂離，較緊佇田岸邊挽一片芋仔葉，當做雨傘攑咧，實在有夠好笑閣好耍，雖然規身軀沃甲澹糊糊，毋過做囡仔的阮，心內是感覺誠歡喜閣誠趣味。

這馬你若來到遮--田中鎮中正路邊仔，嘛猶是會當看著有一間茶店仔，邊仔有一間新的細細間的百姓公廟仔，雖然以早刣豬的所在已經無看見啊，毋過猶有以早一間一間豬寮的磚仔角。

雖然經過遮濟年，我共想起來，細漢的時，趣味的代誌猶是真濟咧哦！

2022.06.23