我的阿公

我有一个真拍拼做工課的阿公。自從我有印象，伊就是咧做工課，自早無閒到晏，真罕得看著伊咧歇睏。

阿公是一个賣漢藥材的生理人，逐工伊攏咧無閒做漢藥。

有當時仔伊愛用機器去研胡椒，研好了後，袂使隨共伊開開，抑無胡椒粉就會飛甲規厝間坱澎澎，我細漢的時，定定聽著阿公伊去予胡椒粉薟甲咳啾拍袂停。

有當時仔伊嘛會用兩肢跤捗囥佇研槽頂磨藥材，細漢時看著阿公咧磨藥仔，感覺真趣味，猶毋過阿公伊攏無愛予我鬥相共，伊攏叫我去邊仔𨑨迌。

研槽：

圖片來源：《閩南語常用詞辭典》

阿公嘛愛做漢藥丸，就是先用研好的漢藥去熬，共漢藥熬予洘洘洘，等藥仔變甲略略仔2423;2423;，一大片0.5公分厚的藥仔，然後才共藥仔囥入去機器內底共絞出來，就會變做一粒一粒的藥丸。

伊閣愛切藥仔，親像甘草、人參佮配藥仔的薑母，就愛切做一片一片，若是一般草藥仔就愛共切做橛，一節一節按呢才會使哩！有當時仔，伊閣愛用著舂臼佮舂槌(杵臼)去舂藥仔，我佇邊仔看甲喙仔開開。

舂臼佮舂槌：

逐工攏有人客來阮兜拆藥仔，阿公就愛替敆藥仔，愛共幾若種藥材囥做伙，才用一張大張紙共包起來，攏毋免用著橡奶，足媠、足環保、閣有智慧的包法。

會記得有一站仔，佇阮兜簾簷跤，有囥兩桶真大桶的藥仔，下跤用瓦斯暝日燃、暝日熬，火毋捌斷，我問講：「阿公，你佇咧創啥物？」伊講：「欲熬鹿角膠啦！」彼當陣我聽無，毋知伊咧講啥？

我上會記得細漢的時，毋敢一个人去共阿公討錢，攏等叔伯小妹來，才做伙伸手共阿公討銀角仔，綴佇伊的尻川後共亂講：「阿公，予我一角、阿公，予我兩角。」若討著，就歡喜甲去隔壁冰店買細秀仔，彼陣的我有一个願望，就是欲共冰店內底賣的細秀仔，攏共食看覓。這馬想起來，感覺真趣味！

民國70年，阿公雄雄心臟病發作，煞來過身去，雖然按呢無拖磨來走，感覺無啥物病痛，毋閣到今我攏感覺真毋甘。時間過遮爾久，阿公予我的記持就是自早到晏攏咧做工課，我毋知伊的人生敢有享受著啥物？伊一世人拍拚未停，攏是為著飼囝兒序細，按呢人生敢有意義？

舊年底我有去揣一个老師，伊共我講，今年舊曆七月的時，愛會記得替阿公辦超度，愛去揣有出家人的廟仔辦才會使。我就想著蹛佇竹山的三姑，伊出家幾若十冬矣，我就拜託伊愛替阿公，嘛就是伊的阿爸來辦超度。(2022.08.13)

**真感謝彰化師範大學台文所葉淑燕老師替我看文章佮改文章。