放棄

估唔到新年第一篇post就係講我決定係放棄，我決定放棄再揾佢。

呢排send 親messages 比佢，佢只用一個 emoji 答我。無論我send有關手機付款優惠，或者係想確認佢睇過本書嘅名，佢都只係覆個 emoji。打波前餐飯仍然係我比，傾計仍然係我主動揾話題，態度越來越冷淡仲成日好似覺得我好白痴。

我只係問下佢農曆年假會唔會上深圳玩，咁係佢話想發掘多啲好地方所以打算每星期上去，咁咪問下囉，點知又唔啱，話會好迫點會去，仲叫我"你試下去呀"。原來我連一個普通朋友都不如，佢對普通朋友咁態度嘅話都無哂朋友了。我講錯日元滙率係對六幾，佢即刻反應好大問我講咩呀有無睇新聞。唔知日元滙率代表唔知世界大事㗎？日本代表全世界咩？當全香港人當日本係第二個家時我想問下啲人有無睇歷史，你唔需要憎日本但都唔好當日本神咁拜。佢連Chat GPT係乜都唔知咁佢又有無睇時事呢？

我不斷思考，由初時佢主動話教打golf但見面又好冷淡，到佢越來越多主動whatsapp 我傾計，然後演變到每次見面好似好厭棄我，跟住到而家嘅冷淡，究竟喺邊到出錯咗。我越諗越煩惱，跟住開始𤷪憎，再而失望，之後係自悲。其實唔使再諗原因，我唔會知。事實擺在眼前佢根本睇唔起我，呢種態度令我好自悲，但我唔想打沉自己，再見佢只會令我更難受同對自己失去信心，自我價值越來越低。人唔自救無人幫到我，所以我決定離開呢個人。我可能係井底之蛙，但唔到你呢個人去踐踏我。唔知佢會唔會發覺到我無再揾佢，因為佢心中可能已經無我呢個人或者唔得我呢個人嘅存在。無法啦，我學識放手，比返尊嚴比自己！