看著就愛講，講家己知影的知識

●食泡麵

我看著有人寫，伊入去中國一个真散的厝內，內底有一个阿媽佮囡仔，看著彼个囡仔手捀一个有缺角的碗咧食泡麵，作者共彼个阿媽講，泡麵無滋養，莫定定食，阿媽講：「很少吃，今天是他的生日，所以讓他吃一碗。」作者家己嘛感覺頭拄仔講彼句話足無妥當。

●東白仔

幾工前，我咧買東白仔的時，想著，若是阮老母，抑是遐的oo-bá-sáng看著，可能（一定）會講：「東白仔誠冷，莫食傷濟。」我拍算欲共in講：「我高麗菜食足濟工矣！今仔日換買白菜。我袂食傷濟，嘛會摻薑母同齊煮，袂傷冷。」

遐的人，看著啥，就欲講啥，共伊知影的代誌講講出來。若進前，想著遐的話，我就會受氣，這擺袂受氣，因為想著，in干焦共in知影的代誌講出來爾爾，毋是咧講我。

●甜路

阮三兄大學畢業，老爸老母來台北參加畢業典禮，暗時仔，大兄請逐家食飯。

行去飯店的時，亭仔跤邊仔的店咧賣的甜路，看起來誠好食款，阮就買一盒。入去飯店，共盒仔囥佇桌仔頂。

服務生是中年的查埔人，點菜了後，伊指著彼盒點心對阮老爸講：「這種東西又甜又油，中年人少吃一點。」抑是「不要吃」。

我心內咧想，這是阮兜頭一擺買這款物仔，袂食真濟啦！阮兜進前無錢通買遮的點心來食，這馬厝內的經濟較好一點仔，變做老爸袂使食，真悲哀。

●農藥真濟

阮老母逐擺若咧洗蓮霧的時，一定那洗那講：「這農藥真濟，莫食傷濟。」

伊罕得買蓮霧，有買嘛是幾粒仔爾，逐家分來食，一人分無夠一粒，佗位來「食傷濟」的代誌？我落尾才想通，伊只是共伊知影的，做農的朋友講的話講予阮知爾爾。