幾若年前，我去參加我的好朋友的老母的告別式。
公祭開始，司儀開始唸一寡仔話，唸著囝孫名的時，我無聽著我朋友的名，干焦有伊２个阿兄，奇怪，我閣較斟酌聽。第２擺嘛無唸伊的名，我纘袂牢，佇揹仔內底揣一張白紙出來，開始寫，欲予禮儀公司的批。
典禮真緊結束，我出來外口，共紙囥佇亭仔跤的桌仔頂繼續寫。寫好，我揣禮儀公司的人，閘著一個少年查埔，我看伊的胸前的牌仔寫：「班長」，共彼張紙予伊看，那講我的意思：查某囝嘛是老母生的，同齊𤆬的，查某囝的名嘛愛算在內，時代已經改變矣！恁嘛愛綴咧改變……，請伊愛共公司講，改變這个做法。講完共紙提予伊，請伊轉交予公司。伊攏無表情，嘛無應我。
行出來的時，我的情緒夯起來，頭拄仔真想欲當場跳出去，問這是啥人的意思？共彼个人大罵一場。
我朋友伊是𪜶（in）爸母上惜的屘查某囝，嘛是２个阿兄真惜的，而且，來祭拜的人大部份是伊的朋友佮同事，抑有老母的慈濟朋友，誠少伊阿兄的。
幾若年了後，我佮彼个朋友開講的時，才共這件代誌講予伊聽，問伊有注意著司儀無唸伊的名無？伊講伊無注意，毋知影。我袂記得問伊，若是伊當場有發覺，伊的感覺是啥物？
