有一工的下晡，招千千來同齊做pudding。
先穿我做的細領的圍軀裙仔，伊進前攏毋穿，這擺欲穿。
伊先共雞卵佇桌頂硞硞硞，硞予破，我共卵殼剝開，倒咧觳仔底，伊上愛硞雞卵，不時捒椅頭仔佇冰箱前，𬦰起去開冰箱門，提一粒雞卵落來，我若看著，趕緊提一個碗予伊貯硞出來的卵白佮卵仁。
伊抐卵的時，我量牛奶400CC，倒落去，加一點仔砂糖，伊繼續抐。
我提６塊的俗麭，砧佮伊專用的果子刀仔，囥佇伊的面頭前，教伊切俗麭，切予細細塊，伊切一半都無愛閣切，我共賰的切完。
教伊用湯匙仔共卵奶𣁳（khat ）佇細杯的pudding杯仔內底，攏總有８杯，用手搣（me/mi）細細塊的俗麭囥佇頂懸，完成矣！愛囥半點鐘，才會使烘。
做的時陣，無時間翕相，只有上尾的成果。愛等半點鐘，才會使烘。
●食譜
材料：
鮮奶 400CC
雞卵 ４粒
俗麭 ６片
砂糖
做法：
卵佮糖先攪佇鮮奶入底
俗麭切細細塊，囥入去卵奶入底，泡半點鐘
頂懸會使加一寡仔葡萄乾、番麥粒等等
烘箱先開燒到１８０度，共材料囥入去烘盤入底，囥入去烘箱烘25分鐘
燒燒仔吃，抑是冰過了後吃攏會使。
上尾的成果。愛等半點鐘，才會使烘。
