愛家己去復健；無人陪；蹛療養院

●真濟年前，我有一站仔我去做復健，聽著有一個oo-bá-sáng咧共人講：「少年的愛上班，咱就愛家己來復健。」咧鼓勵別人，伊對現時的生活情形看甲誠清楚，嘛承認，接受。

●我的大官有一擺小中風。出院，轉來厝了後，伊的孫仔來看伊，聽伊咧怪人：「遐濟囡仔，無一个會當來顧我。」in自大官的房間出來了後，有一个查某囡仔咧流目屎，那行那講：「人阮愛上班。」

一開始，阮翁用車載伊去病院復健，幾仔擺了後，我的阿兄介紹一个復健師來厝內面做。我臆，因為無人規工佇伊的身軀邊幫伊做代誌，伊做復健愛較拍拚一下，無偌久，就會曉行路，家己捀碗食飯。

●阮大兄離婚誠濟年，囡仔綴老母，無聯絡，女朋友歇睏日才會來。伊破病蹛院，出院了後，我的小弟安排伊去蹛療養院，我定定去陪伊做復健。有一擺，我看著一個坐輪椅的oo-bá-sáng，家己用雙手輾輪椅到電梯門頭前，喙內咧吵：「我欲轉去，共我擲底遮……」工作人員可能嘛誠慣習矣！無人來苦勸、姑情伊。唉！伊的老年時陣佮伊原本想的無仝款。

著喔！已經誠久矣！共序大人安排去蹛療養院，敢若較無人罵，講in不孝，序細嘛較無彼款艱苦罪過、家己怪家己的想法。生活家己袂曉自理，去療養院予人照顧，是這馬的方法，無欲按怎？像古早時代，新婦佮某做厝內面的工課，照顧老的、𤆬（tshuā） 囡仔攏免錢，這馬已經罕得有這款代誌，無翁仔某２人上班賺錢，日子嘛過袂落去。