這陣仔眼著系所各樓層，有幾个穿紺色制服的校工，捒一台吊著家私佮電線的推車，四界咧踅來踅去。一直到昨昏，𪜶來揣我開講，才知影原來是欲年度檢查研究大樓規四界的電氣設備。𪜶撥工來共我講，明仔載透早按算欲來檢查阮這間實驗室，所以彼段時間無法度做試驗佮使用任何的電氣設備。
德國人對著安全的重視，真正做了比台灣卡濟閣卡細膩。進前佇台灣做學生仔抑是助理的時陣，攏無拄過這款定期的大檢查，學校攏是放予逐間實驗室隨人管理，大學的環安處有若無咧。
檢查結束了後，比我想的閣越嚴格、範圍閣卡闊。校工揀出一條得欲斷去的電線、兩台予溶劑咬甲白術術的吹風機（見上圖），除了本底就有貼大學專用的吧苦（barcode），頂懸閣黏著寫Prüfung nicht bestanden（試驗無過）參Gerät nicht benutzen（電器莫應）的搭紙。
毋但是公用器材，想袂到連我家己紮來的電腦線參變壓器，囥佇桌頂攏予校工貼搭紙。因為電腦是進前佇台灣買的，所以插頭公毋是歐規的，一直攏是愛用『公母轉接頭』（華：插頭轉換器），才有法度參歐規的插座母鬥作伙。這改，就是彼粒轉接頭予校工貼 Gerät nicht benutzen 搭紙！
校工就共我說明講，私人的電器設備照講是袂使佇實驗室應的，親像我彼粒公母轉接頭就是大學規定不准使用的物件之一（我第一擺知影有這款代誌）。毋過兩位德國阿叔阿伯閣足好心的，知影我就是有使用上的必要，規氣就直接送我一條有接德國插頭公的電腦線，另外一爿會使參變壓器鬥作伙。好哩佳哉！我險險就愛家己去買一條矣！若準講真正愛買彼條線，我蹛的所在無利便，感覺是會足費氣的！
為何德國的環安愛按呢檢查咧？我個人認為，可能嘛是欲預防著電氣用品惹起的火劫。因為實驗室是足複雜的環境，若火真正因為走電著起來，遐爾濟成分複雜的化學藥品，有的干焦拄著空氣（ex: 水素氣 H2）、幾滴水（ex: LiAlH4），濃度一夯懸，就會直接磅炸。若按呢我看逐家就免耍矣，可能我博士嘛免讀矣！
德國對著工課環境細膩的態度佮作為，實在是台灣嘛愛好好仔學起來。
這陣仔眼著系所各樓層，有幾个穿紺色制服的校工，捒一台吊著家私佮電線的推車，四界咧踅來踅去。一直到昨昏，𪜶來揣我開講，才知影原來是欲年度檢查研究大樓規四界的電氣設備。𪜶撥工來共我講，明仔載透早按算欲來檢查阮這間實驗室，所以彼段時間無法度做試驗佮使用任何的電氣設備。
德國人對著安全的重視，真正做了比台灣卡濟閣卡細膩。進前佇台灣做學生仔抑是助理的時陣，攏無拄過這款定期的大檢查，學校攏是放予逐間實驗室隨人管理，大學的環安處有若無咧。
檢查結束了後，比我想的閣越嚴格、範圍閣卡闊。校工揀出一條得欲斷去的電線、兩台予溶劑咬甲白術術的吹風機（見上圖），除了本底就有貼大學專用的吧苦（barcode），頂懸閣黏著寫Prüfung nicht bestanden（試驗無過）參Gerät nicht benutzen（電器莫應）的搭紙。
毋但是公用器材，想袂到連我家己紮來的電腦線參變壓器，囥佇桌頂攏予校工貼搭紙。因為電腦是進前佇台灣買的，所以插頭公毋是歐規的，一直攏是愛用『公母轉接頭』（華：插頭轉換器），才有法度參歐規的插座母鬥作伙。這改，就是彼粒轉接頭予校工貼 Gerät nicht benutzen 搭紙！
校工就共我說明講，私人的電器設備照講是袂使佇實驗室應的，親像我彼粒公母轉接頭就是大學規定不准使用的物件之一（我第一擺知影有這款代誌）。毋過兩位德國阿叔阿伯閣足好心的，知影我就是有使用上的必要，規氣就直接送我一條有接德國插頭公的電腦線，另外一爿會使參變壓器鬥作伙。好哩佳哉！我險險就愛家己去買一條矣！若準講真正愛買彼條線，我蹛的所在無利便，感覺是會足費氣的！
為何德國的環安愛按呢檢查咧？我個人認為，可能嘛是欲預防著電氣用品惹起的火劫。因為實驗室是足複雜的環境，若火真正因為走電著起來，遐爾濟成分複雜的化學藥品，有的干焦拄著空氣（ex: 水素氣 H2）、幾滴水（ex: LiAlH4），濃度一夯懸，就會直接磅炸。若按呢我看逐家就免耍矣，可能我博士嘛免讀矣！
德國對著工課環境細膩的態度佮作為，實在是台灣嘛愛好好仔學起來。