遮講早起頓食甲若皇帝（Kaiser），中晝頓食甲若國王（Konig），下昏飯食甲若乞食（Bettle）。我慣勢一透早就做皇帝交國王，下昏飯就做準做得著五仙歐圓 mā 說多謝 ê 乞食（Shiva Moon）。我 m̄ 是素食者，不而過我現此時我慣勢 ê 飯頓是一頓素一頓臊，食素頓我上愛這 buē hōo 胃腸雙跤踏雙船，心頭亂紛紛，魂舒明明就食飽，猶原喙飽目睭枵綿爛做枵鬼饞。

前幾日看 Die Ernährungs-Docs 一位得著 Hashimoto's thyroiditis（橋本氏症，慢性甲狀腺炎） ê 先生，伊因為食藥仔人愈來愈膨風，伊 uī-tio̍h 改善這个問題伊骨力運動，押尾猶是無任何應效。Tī 這段向望倚靠運動來控制體重 ê 伊 mā 試過若世界第一懸山 Himalayas ê 減肥方式，無一項成功。

我有兩位台灣女性朋友年過三十致著甲大頷胿，一位 tī 人猶未行入四十歲雙目就捅甲若金魚，另外一位是 kā 這个病當做減肥 ê 方式。我 tuì 這兩位朋友 ê 印象 m̄ 捌看過𪜶會呼雞 buē 歕火 ê 面容，這位致著橋本氏症三十冬 ê 先生，伊上電視 ê 面肉除了體重問題 mā 有氣力 kan-ta 賰呼雞聲這項。

這位先生 ê 牽手 mā 有 Cortisone ê 問題，節目就請𪜶某做陣上節目，三月日後，困擾𪜶翁仔姐 ê 問題齊得著改善，特別是致著橋本氏 ê 先生，伊看起來若換一个人仝款加足有元気。呔討按呢生？答案就 tī 食食慣勢，𪜶慣勢食加工食品、速食交甜路，自𪜶調整食食慣勢交運動量，困擾𪜶 ê 無四序就無遐爾仔捷來相揣。

這集節目看煞我 mā 讀著台灣新聞寫著減肥上好 ê 辦法就是改速食、改甜粅粅、改加工食品。我想著透世人減肥 m̄ 捌離開 YO YO ê gún 翁，自伊願意 hōo 我牽 leh 溜溜行，阿母牽 m̄ 行，伊總算佮 YO YO 切甲離離離。四冬外伊往時 ê 體重 m̄ 捌翻頭相揣，伊食 ê 飯頓 mā 是哭呻我「Gún 德國人食無遐 tsuē ê 歐洲標準，一个成年人一日食食熱量兩千卡。」

我是伊 ê 對照組，家甲做來遮 uī-tio̍h 翁仔姐有才調透流，我跟綴伊 ê 喙斗食飯頓，一年膨風十五公斤，規魂舒無四序。當我放棄假好衰做我家己，我 ê 體重又閣踅翻頭，因為超重 ê 無四序 mā 走甲無看影。畢竟我清楚知影我 ê 人生興趣無腹肚做藥櫃這項。