台語文學
彼是一條劍光，鄭成功的劍吐出來的光，開台尊王倒佇塗跤，劍出鞘，射出利劍劍的光。
挩窗想起，阿媽定定講咱阿無庄是鄭成功的後嗣，是開台尊王對唐山率領兩萬五千名的兵將，駛船浩浩蕩蕩過黑水溝，用勇氣佮智慧，共荷蘭人偃倒，來台灣開基。
雖罔伊是一个黃酸囡仔，但按祖先傳落來的勇氣佮智慧，毋通拍無去。
雖罔伊是一个肉身人類，但神明交待予伊的任務和目標，袂當放予掉。
挩窗行到尊王的身軀邊，共劍抽出來，規間大士爺廟去予寒凊凊的劍氣掃過。柄搦起來真峇，挩窗膽頭紲飽滇起來。
走幾步仔路，險險去予鉤一下跋倒，原來是開漳聖王的龍虎靴⋯⋯他斡頭想想咧，袂當按呢去送死，人講「家私尖lè-lè，工課真紲勢」（註），家私頭就愛加攢寡。（註：引自潘科元老師的新語）
伊佇廟內底四界巡，發現風、雨、雷、電對壁畫跋落來，物件嘛落落來。挩窗頭殼內的智慧咧轉踅，就去抾風神的袋仔，共芭蕉和雨師的拂塵、雷公的摃槌仔、電母的鏡全擲入去。