台語文學

大士爺廟的門神坦敧身，離屑屑仔縫，空隙走一粒目睭出來。內面有神講細聲話：「金將軍啊！騎虎王爺遐有啥動靜無？」

「無呢⋯⋯城隍爺，騎虎王爺廟焦疕疕，略略仔有水煙佇咧蝕。」千里眼目睭無轉輪，金金相。

「騎虎王爺廟關密密，看無一箍潲，著愛換柳將軍來聽啦！」土地公攑拐仔共千里眼戽去邊仔，喊順風耳來塌門縫。

「聽著乜代？」媽祖輕聲細說。

「彼咧⋯⋯彼咧⋯⋯有水聲，佇咧浡浡浡浡⋯⋯啊！啊！啊！『Phuah-lah』一聲蓋響，有物件落水，可能是挩窗，佇咧掰水烏白踢⋯⋯啊啥物！我敢有聽毋著去？有虎咧吼，夭壽大聲⋯⋯無毋著，彼是挩窗，驚甲哀哀叫，佇水內底沐沐泅，生生狂狂，驚驚惶惶，強欲無法度喘氣矣⋯⋯啊、啊、啊、啊！啊害啊！我聽著虎爪咧刮塗跤⋯⋯王爺敢毋知挩窗是咱派出去的使者⋯⋯」順風耳袂輸播音員，佇空中播送泅水比賽。

「莫閣講矣！代誌怎會舞甲按呢？早知就先去通知騎虎王爺！」土地公緊張甲用拐仔頓塗跤。

「火車過矣才咧歕觱仔，袂赴矣！屘虎爺嘛有去啊！伊神咧？」城隍爺雄雄想著。

這時，佇騎虎王爺廟，五隻虎共挩窗圍起來，毛衝、爪爍、牙齴、眼惡，挩窗跤軟坐踮塗跤，直直凊汗──就佇這時，有物件去蹔伊的殼頂骨，縱懸懸，頭佮身軀隨輕鬆起來，挩窗擔頭去看，一葩烏金金的光佇空中傱。五虎眼著，隨飛起來，成做絳色的光球，去逐彼粒烏金。