台語文學
鬼王目睭兇惡，佇空中巡揣，伊知影，有一个囡仔咧創空，欲破壞伊統治神明界的霸業。
伊愈想愈掠狂，胸坎內的核能發電機紡緊緊，身軀的溫度衝懸，袂輸太陽。傳說古早古早以前有十粒日頭，伊一粒太陽較贏十粒日頭，覕踮打貓街仔的妖魔鬼怪，去予熁甲哀爸叫母。廟頂的剪黏一塊一塊溶去，福祿壽三仙早就𤆬人物、神獸等跳入去廟內底，廟頂赤赤赤，全然失光彩。
免煩惱，龍鰲就來解救神明界矣！
鬼王䀐，心頭嚓，伊知影彼就是丙午年共伊沖甲爛糊糊的龍鰲。這馬膨甲若雞胿，腹肚內貯的水並彼年毋知加偌濟，鬼王煞勼勼，無光嘛無熱度矣！
徛踮騎虎王爺廟埕的挩窗，看著奢颺的鬼王攝落去，知影這步有效。想講佇神明界的拍拚就欲成功，歡喜甲喙笑目笑。
伊看著，龍鰲雞胿寬寬飄起去，一粒一粒共鬼王包圍：六拍一，真涼勢。
就佇這个時陣，五位尊王嘛來到廟埕，氣勢飽滇，五隻虎同齊吼一聲蓋驚人，鬼王閣勼落去的款。正中央的王爺出聲：「照丙午年彼改的例，龍鰲欲噴水，愛聽著命令，來！這位囡仔兄，我的飛天冠借你，予你來指揮！」
騎虎王爺共飛天冠交予挩窗戴。
王爺共飛天冠剝落來，囥踮挩窗的頭殼頂。飛天冠是蓋大頂，為著欲合寸尺就來束起來，共挩窗的頭殼包起來。兩爿的天兵天將再次將哨角夯懸，大聲歕落去，挩窗跤一縱，飛天冠的翼股就來擛，那擛挩窗那飛懸，喝咻講：「我是勇敢掛智慧小英雄，這場滅火氣的弄險，就欲來起飛啦！」