台語文學
阿媽正手牽挩窗，倒手捾加薦，寬寬仔離開阿無村，兩人怙行的，順縱貫路去民雄街仔。
舊曆七月的「下街」（ē-ke），是民雄規年迵天上大的鬧熱，按二十一日開始，舉辦三工普渡，各地的善男信女毋驚路途遙遠，同齊來獻敬大士爺，祈求平安順序。
透中晝的日頭會共人咬，真正是「大日曝死虎」，挩窗的手予阿媽搦牢牢，心內想講：「欲坐雲霄飛車是無望啊……『無魚，蝦嘛好』，去民雄街仔鬥鬧熱嘛袂歹……。」
行佇咧縱貫路，阿媽分拆予挩窗聽：「七月時仔鬼門拍開，親像恁學生囡仔歇熱，鬼仔就走來陽世流流的。咱人啊著愛攢腥臊予鬼食，這就是『普渡』。逐位普的日子攏無仝，民雄街仔是這三工，四界位的孤魂野鬼，毋管是內山、平埔、海口，或者是按溪溝趖出來的，全瀳倚來食普……。」
「意思是⋯⋯這馬民雄全全鬼？」挩窗驚著。
「嘿啊！毋過神明有戒備，驚鬼仔拋拋走起空起榫，所以，請鬼王來扞盤，彼就是大士爺伯。平常時無金身，干焦下家這站仔用紙糊一尊神像，服侍佇大殿。下街第三工，就是今仔日，陣頭鑼鼓響上天，眾信徒半暝送神尊去化火，大士爺伯會𤆬領眾鬼轉去陰間，順紲共歹物仔抔抔予清氣。」
