中國國歌條例大逆無道

呢個不義嘅政府，最近諗住喺一早已經殘缺不堪嘅立法會，幫凶殘嘅中國政府立中國國歌條例，迫香港人向惡劣嘅中國國歌敬禮。但係，點解香港人要尊重中國嘅暴政象徵物呢？呢個不義政府咁做，好明顯就係橫蠻無理。

「……開始組織同實際組成任何政治社會嘅，祇不過係一啲可以服從大多數而結合同組成呢種社會嘅自由人同意。咁樣，而且祇有咁樣，先會或者先可以創立世界上任何合法嘅政府。」[1]約翰·洛克（John Locke）覺得，政府係要經過民眾同意，先可以管治民眾，而政府冇經過民眾同意，就係違反自然法。中國喺一九九七年開始，擅自殖民香港。中國殖民香港，係冇經過香港人同意。中國祇係，暴虐無道，橫蠻咁迫香港人受制於中國，殘暴咁將香港人置於中國惡劣嘅意志之下，完全係侵害緊香港人嘅自然權利。顯然，中國一啲都唔尊重香港人。

中國喺殖民香港期間，又不斷侵佔香港人嘅土地，侵犯香港人應有嘅自由，阻礙香港人實踐民主，諸如此類。既然中國不斷踐踏香港人，香港人唔通係要尊敬中國？唔通係要向中國嘅暴政象徵物獻上敬意？

但係，呢個不義政府，最近竟然就想立中國國歌條例，喺「奏唱中國國歌嘅場合」，迫香港人「肅立」同「並無不尊重中國國歌」，又禁止香港人「侮辱」中國國歌，例如唔俾以「侮辱」方式改中國國歌歌詞。中國國歌條例顯然係迫香港人恐懼中國國歌，禁止香港人自由表達有關中國國歌嘅觀點，又阻礙香港人二次創作。但係，法律係應該用嚟侵擾民眾咩？約翰·洛克講過：「……法律除咗爲民眾謀福，呢一個最終目的之外，唔應該再有其他目的。」[2]法律祇應該用嚟爲民眾謀福，而唔應該用嚟損害民眾福祉。中國國歌條例，完全就係惡法，唔單止冇增加民眾福祉，反而仲侵害民眾幸福。呢個不義政府咁做，顯然係嚴重騷擾緊香港人。

如果呢個不義嘅政府以為，立咗中國國歌條例，就會令到香港人更加尊重中國，咁我要講，呢個觀點係大錯特錯，結果係啱啱好相反。不義政府諗住立中國國歌條例，迫香港人尊重中國嘅暴政象徵物，呢個令人憎恨嘅情況就猶如，一個盜賊攞住把刀指住人條頸，迫人向佢致敬，迫人多謝佢偷走人嘅財物。就算有人迫於無奈，爲咗保護生命，而向個盜賊敬禮，個盜賊唔單止唔係受到人尊重，反而仲係自取其辱，更加展示到個盜賊係窮兇極惡。中國就係盜賊。中國唔會因為有咗中國國歌條例，而吸引到人尊重。相反，咁祇係會令人更加厭惡中國。

宜家中國係殘暴咁殖民香港，香港人係唔需要敬重中國，亦都唔需要尊重中國嘅暴政象徵物。呢個不義政府諗住立中國國歌條例，好明顯就係大逆無道。

註：

1. （英）約翰·洛克（John Locke）著，葉啓芳、瞿菊農譯：《政府論次講》（臺灣：唐山出版社，1986年），頁61。

2. （英）約翰·洛克（John Locke）著，葉啓芳、瞿菊農譯：《政府論次講》（臺灣：唐山出版社，1986年），頁88。