裝修名人堂 KC 為客想多步 用腦求質素

人生總要經歷一次蛻變，而KC不早不晚，正好三十而立。「總之你當我以前係廢青啦！哈哈！」當時二十幾歲的KC，一直在做零售，從來也沒有想過將來，也沒有儲蓄的習慣。在經歷過感情上的轉變，KC對人生有了改觀，有了目標。
「開公司嘅念頭係嗰時開始，好彩屋企人非常支持我。」從前只想到及時行樂，到現在奠定了志向，全靠這次巨變得到家人的支持。
零售經驗引入裝修界
零售和裝修風馬牛不相及，會否感到困難和力不從心？「或者可以換個睇法，我可以將做sales嘅經驗帶入呢行。」配合裝修的基本概念，從伙伴間學習工程知識，加上KC做零售的技巧，自然取得客人的信任。
「當然就唔係得說話技巧，重點係做sales要識觀察。」觀察和給予合適且貼心的建議，是KC在多年零售經驗所得的絕活。「例如上門度尺，可能你一入屋會望到兩個先人嘅相冇位擺，你就要主動提出返洗唔洗安排放神主檯。」「又例如，如果客人屋企有行動不便人士，『您廁所會唔會加扶手？』、『會唔會做凹落去嘅地台？唔會撠腳』或者『張床會唔會唔做高床？等佢地容易D上落啊』。」
為客設計 無障礙家居
細心留意客人需要，有時客人自己都未必能想得到自己實際需要甚麼，KC總要比他想多一步。提到一次最滿足的生意，KC講述了一個有殘疾弟弟的客人。「同客人傾偈時，佢同我哋講咗好多佢生活上遇到問題，我哋逐一幫佢解決晒。最大滿足感絕對係嗰單生意。」
「其實好多客人本身對裝修真係冇概念，靠你幫佢諗。例如佢弟弟經常裸身係洗手間走嚟走去，我哋就幫客人裝浴室寶。又或者佢屋企電飯煲、微波爐全部放係廳，廚房反而用嚟放雜物，我哋覺得咁樣會對弟弟嚟講唔安全，就建議佢啲電器點放係廚房會好啲。」「仲有佢屋企用石油氣罐，但其實咁樣放係地下好危險，我哋就諗辦法遮住佢，以免弟弟會掂到。」
每一件都是微不足道的事，但每一件KC都能發現，並一一解決。這份由顧客角色出發的細心，並不是一般人能做到。
逆市主動出擊 肯搏殺
KC與拍檔的公司成立一年多，他仍覺得還在起步階段。面對逆市，他的態度依然。「新公司本身都係要主動出擊，肯搏殺，就算逆市我哋都冇好大改變。」
但其他經營多年的裝修公司也拼盡全力推銷，會否有覺得困難？「其實市道唔好，未必有好多人想拎舊好大嘅錢去豪裝。反而我哋係經濟實惠型，市面公司需要50萬，我哋一半就可以做到，但整出嚟嘅質素差不多。」
如何做到？「客人budget唔多又想要某啲效果，我哋就會諗啲既省錢又有同樣功能嘅方案。有啲公司唔會理，例如套餐型公司，就只會扔個plan出嚟，收錢然後照做。我哋就算只係做十幾萬一單，都係全力做，唔會因為係細數目而對客人愛理不理。」
男人三十而立。面目充滿了年青朝氣的KC，如今已是一間裝修公司的老闆，確立了自己的方向，依靠著自己的本領承擔家庭。以同樣的心思，細心看待每一個準備裝修的家居。

本文章內容及圖片均由本專欄作者提供及上載，並不代表本公司立場，如有任何版權問題，請與本公司聯絡。關键字：裝修佬;裝修;故事;設計師;裝修工程;裝修網;裝修費用; 石屎; 修補;