香城回憶錄005：水天圍的日與夜

在醫院的爭執後，為了避免音然和她的母親再起爭執，我帶了她回到我在半灣東的家暫住。

第二天早上，我趁音然還未起床，打了一個電話給她的父親。
「尋晚我同音然傾完，佢諗住聽日去參加水天圍警署外面嘅抗議活動。」
「音然隻腳扭親，仲諗住出去抗議？你幫我勸吓佢啦，萌惠。」音然的父親有點緊張。
「我勸過佢㗎啦，不過尋晚佢聽完個friend向警察求助無門嘅事之後，就變得好激動啦。」我答道。昨晚回到我家後，音然才想起要關心Samuel和阿Ling的情況，打電話找阿Ling，原來Samuel在醫院經包紥後，已經離開醫院回家休息。
「音然由細到大就係咁！老豆老母講乜就聽唔入耳，啲朋友或者網上面講嘅呢，就信到十足十！」音然的父親語氣有點怪責的意味。

我和阿Ling認識了大約一年，她說話一向很有分寸，但昨晚她在醫院大聲地用粗言穢語形容向警察求助的過程，我想當時的情況應該比阿Ling描述的，只有更糟，不會更好。
雖然我不認同音然父親的批評，但不想因為此事與他不和，失去了唯一的溝通機會，所以就轉換話題，我提議道：「不如咁啦，聽日我陪音然去，有乜嘢事起上嚟都可以有個照應。」
「梗係唔得啦！萌惠！你同佢唔同，跑又唔跑得快，細個嗰陣仲出現過少少哮喘症狀。你陪佢去，俾警察拉咗，到時我同我老婆都唔知點同Hugo交代嘞！」音然的父親一聽到我的提議，很焦急地否決道。
「咁好啦，我地之後再聯絡啦。」
「麻煩哂你啦，萌惠。」音然的父親說罷，就掛掉電話了。

又過了一天，吃過我煮的早餐後，音然就準備出發去水天圍警署。
「真係唔使我陪你去？」我問音然。
「唔使啦，我除咗帶阿Ling同Saki佢哋去，阿采同瑩瑩都會一齊去，唔使咁擔心啦！你煮定好餸等我番嚟啦！」
「咁好啦，你一切小心。」
阿采、音然和我都是讀同一所中學，阿采比我們年紀大兩年，是音然在游泳隊的前輩，在松立基學院體育系就讀三年級。瑩瑩來自另一所中學，但和阿采是好朋友，亦是音然在松立基學院幼兒教育系迎新營的組媽。音然有兩個比她年長的前輩陪同，我就放心了。

黃昏時份，水天圍警署附近一帶發生激烈衝突，導致一名女子的胸圍也掉下了。我沒有在電視裡看見音然，但我知道她已經在回程路上，所以也沒有太擔心。

到了晚飯時間，我和音然一邊吃飯，一邊談論著她明天的安排。
「頭先我睇Gausbook嘅通識group入面，可教授話聽朝帶Bra仔去水天圍警署外面示威喎，你會唔會去呀？」我問道。
「咪搞我，條友個底麻麻地，幾年前仲篤過手足灰，我下晝先去好過。」音然一邊吃著飯菜，一邊說道。
「你太多心啦…」我在中心大學上通識課時，曾上過可工疑教授的課。知道她一向很關心女性權利的事情，所以不太認同音然的看法。

6月24日早上，可教授帶同一位叫王芬的講師，到水天圍警署外示威。接近早上11時半，音然剛剛出發前往水天圍，我則看著音然給我的直播連結，看著警署外的情況。
「我哋而家要求總警司出嚟，交代尋日黃昏發生嘅事，響警方未有回應之前，我們將會繼續向警方表達以下嘅訴求…」可教授拿著擴音器說道。
過了幾分鐘，現場的叫囂聲越來越大，大概是感覺到自己控制不到場面，她宣佈活動結束。
再過了幾分鐘，一群警察從警署衝出來，亦開始聽到石頭敲中硬物的聲音。
「請大家錫住我哋，停止掟石，我哋而家企響依邊，你哋掟石嘅話會誤中我哋…」可教授在擴音器裡叫道，嘗試阻止示威者扔石頭。
然而，雖然石頭的敲擊聲變得沒有之前頻密，警察的行動卻升級了，開始向示威者發射催淚彈，灰狗部隊突然從警署內衝出來。
到了這裡，直播就結束了。

到了下午1時，我才從新聞上知道，有不少示威者因為早上的事件被拘捕了。我擔心阿Ling、Saki、阿采和瑩瑩的情況，所以向她們發了訊息。四人之中，Saki和阿采都在場。
「我無事，不過我個團契導師苗Sir，同埋一個叫阿澤嘅團友都俾狗咬。」這是Saki給我的訊息。
「一切平安。」阿采過了一會，也發了個訊息給我。

天快全黑時，音然回來了，我亦剛好煮完晚飯。晚飯時，音然和我談起水天圍今天早上的情況。
「嗰兩條友擺到明有問題，神燈啲人講得啱呀！係戰犯！仆出一條新街原來係咁解！兩個走去仆街都唔夠，仲要搞到咁多手足同佢哋一齊仆街！」音然憤怒地說道。
「音然你冷靜啲先啦，未搞清楚，唔好亂話人係戰犯，你唔係成日同我講，姊妹shopping，各自努力嘅咩？攪成咁佢哋都唔想嘅…」我覺得音然太過激動，嘗試勸著她。
「你有無搞錯呀，Mandy？一個幾年前就已經篤過手足灰，一個原本就係大亞人，仲走去支持手足嘅餐廳講大亞話，你仲幫住佢哋？」音然憤怒地問道。
「冷靜啲，音然，你都知我無乜出去抗爭，又好少睇神燈。頭先我講錯咗嘅話，我同你講聲對唔住。」我向音然道歉。雖然嘴上這樣說，但我依然覺得音然太過激動了。
「咁又唔使，頭先我語氣都重咗，而且又唔係你嘅錯，唔使同我say sorry。」音然瀟灑地揮揮手，就像小學時，她教訓兩個欺負我的男生之後的情景。

多年之後，我跟一位消息靈通的朋友談起此事，才知道自己當初實在天真得無可救藥，竟然會相信她們。根據這位朋友的說法，她們其中一個和警隊的高層有點淵源，當日到場「抗議」，是因為水天圍警署在地理上易攻難守，旁邊有一座比警署高的商場，對面還有一個像堡壘一樣的商場，所以才叫她來請君入甕，讓警察可以拘捕最有戰力的示威者，令警署被包圍的危機消弭於無形，而被捕的手足會直接被送往仙湖嶺拘留中心進行無力化。
至於另一個，則和她的丈夫在學術期刊上，發表一些維護大亞帝國的文章，藉此積累足夠學術資本後，可以被外面的大學挖角，離開香城。當日到場，純粹是為了收集寫文章的材料，至於手足的死活，Who fucking cares？

「爭取女性權利？幫新移民發聲？搵食就真！賺夠咪走人囉！真係做嘢嘅人，點會做咁多無謂嘢，講咁多廢話！」這位朋友除了消息靈通，亦曾救助不少女手足脫離魔掌，由她來說這話，顯得特別有力。
直到那時，我才明白到，音然完全正確，但我已經沒有機會跟她說我錯了，我徹底的錯了。

到了接近晚上十一點，Saki向我和音然傳來一則尋人訊息，並附上一張相片：
「姓名：廣恩晨，於杏林中學就讀中四。如果你見過她，請致電2345 6789聯絡廣靖韜先生。」
「咦？廣師父？Hugo同Samuel嘅泰拳師父喎…」音然一邊刷牙，一邊說道。
「我仲記得恩晨依個名，上年去參觀Hugo泰拳比賽嗰陣，旁述話佢啱啱夠歲數參加女子少年組，結果好輕鬆就拎咗冠軍，全場都為佢歡呼。」我答道。
「泰拳咁勁又係同姓，應該係廣師父個女？」
「係呀。Saki仲send咗個Message俾我地，話佢同恩晨自細就開始識，而家除咗番同一個團契，亦有一齊去參加橙十字青年團，所以好擔心佢情況…」
「又打得又醫得，應該唔怕掛…」

正當我快睡著的時候，突然聽到音然大叫一聲，我從睡房走到客廳，看看音然發生甚麼事。
「點會連風老師都失蹤咗㗎？」音然一邊看著神燈上的尋人帖子，一邊問道。
「風老師係…？」我疑惑道。
「係喎，Mandy你係理科班，唔熟文科班嗰邊嘅老師都正常，佢係我中五、六時的歷史老師，佢接手嗰陣我哋班同學都有啲擔心，因為佢啱啱黃磚大學歷史系畢業後，教咗兩年低form綜合人文，未必夠經驗，點知佢上堂唔單只生動有趣，對試題嘅掌握都好有心得，唔係有佢，我都未必入到第二志願…」
「咁張帖有無講佢最後響邊度出現過？」
「又無喎，出post嘅人係佢個妹，而家好似響黃磚大學嗰邊幫緊手…」音然一邊看著電腦屏幕，一邊回答我。
「係喎，Kaza個男朋友響黃磚大學讀Biochem，唔知Kaza有無去幫手呢？」音然的消息提醒了我，要去關心一下Kaza的情況。
「都咁夜咯，聽日先搵Kaza啦。」我一邊心想，一邊回到房間。