06-08.10.2024|里斯本(Lisbon)|期待已久的葡國遊

第三次出發去歐遊！總共七日嘅旅程，主要活動當然去列支敦士登支持香港隊。列支敦士登位於瑞士和奧地利之間，正常人的旅遊行程就會順路去埋瑞士，或者奧地利，甚至德國玩足一個星期。

但之前兩次歐遊我都去過德國同埋奧地利唔同城市，所以都想去一啲唔同風格嘅國家。最後我決定去列支敦士登之前，先去葡萄牙里斯本一趟。

葡萄牙係我出發工作假期之前寫低要去嘅國家。佢城市嘅面貌同澳門有幾分相似（其實都好正常，澳門以前係葡萄牙嘅殖民地）。

我又好鍾意里斯本入面電車和纜車於城市穿梭嘅畫面，以及黃妍嘅7月24大道令到我對里斯本有更多嘅幻想。所以就想趁入秋，未到好凍嘅時間嚟呢一個城市旅行，感受吓南歐嘅風情。

今次我係盧頓機場(Luton Airport)搭清晨的飛機出發，由我屋企去盧頓機場的方法，跟我之前去德國嘅方法差唔多，先搭一程夜間巴士到轉車站，然後再搭National Express去機場。

而今次我搭EasyJet(EasyJet就好似Ryan Air嘅歐洲大型廉航），由於我冇寄艙嘅行李，我就買咗最平級別嘅機票，價錢係35磅。其實真係幾抵，有時候喺倫敦搭火車去英國唔同城市都要20至30磅。

當然唔使寄艙，淨係帶個背囊先咁平啦，但係我漸漸鍾意咗呢一個孭個背囊去旅行嘅感覺。一嚟落咗機之後唔使等行李，直接可以離開機場。二嚟在唔同城市穿梭嘅時候，唔使推住笨重嘅行李箱移動，歐洲啲路都係凹凸不平甚至好多斜路同樓梯，所以推住大型行李箱移動都唔係幾方便的。

「仍然行向某個遠方 相信風光可擁有」

1. 路面電車

到咗歐洲生活後，發現好多城市都會有路面電車喺城市之間穿梭，例如之前去過嘅克羅地亞或者德國，電車都係佢哋主要交通工具。

今次去里斯本之前，已經好期待路面電車。睇過一啲關於里斯本嘅明信片或者硬照，就發現呢個城市有一啲好古舊嘅電車喺市區及舊城區之間行走，有別於其他城市嘅普通電車。

呢三日嘅里斯本之旅，發現呢一款古舊電車真的會在每一個角落行走，包括佢會駛經里斯本大教堂，七月二十四日大道，著名的Alfama區地方。

電車就自然成為我在每一個出名地方打卡嘅其中一個主角。我覺得呢一款嘅電車可跟香港嘅電車相提並論，喺香港居住嘅時候我都好鍾意喺港島區搭電車兜吓風唞唞氣。

可是呢個旅程我係冇搭過呢一款舊式電車。每一架電車都載滿了人，而我又嘗試去總站排隊上車，但我見到條人龍之後就放棄。

最後一日嘅晚上離開里斯本之前，我都想睇吓有冇機會搭一次，我覺得夜晚應該會少啲人搭。我跟住Google Maps嘅時間表，喺電車總站等咗大約半個鐘都唔見有車，就覺得冇辦法，似乎呢一次里斯本之旅都搭唔到呢個電車。

不過唔緊要，下次再去里斯本先再搭啦，我相信我都會再嚟呢個城市!

2.比卡纜車(Elevador da Bica)

由於里斯本係一個依山而建嘅城市，纜車都係當地人嘅主要交通工具。不過漸漸越來越多遊客去呢個城市旅行，纜車就變成遊客觀光體驗嘅一個活動。

出發之前，我就非常想搭纜車，睇過好多旅行YouTuber，甚至里斯本的旅遊介紹，發現有一個畫面係好靚的，就係兩輛纜車在斜路中互相交接的畫面，所以比卡纜車就一早已經擺喺我歐洲旅行嘅想做清單入面。

當日我吃過早餐之後，就去到比卡纜車嘅總站，由於我都算早去到，所以都唔使排隊就可以上車。纜車單程就要4.3歐元。不過我買咗里斯本嘅一日交通券，我就唔需要再額外俾錢。

纜車嘅車程大約10分鐘，佢係一條叫比卡嘅街從山腳通往山頂，纜車嘅兩旁就係一啲民居，當日就見到一啲當地人喺佢屋企嘅陽台曬衫，有一種好似好接近當地人生活嘅感覺。到達咗山頂之後，當然梗耍打卡啦。由山頂從高而下影纜車同海，就係我夢寐以求的畫面呀。

3. 山上聖母觀景台（Miradouro da Senhora do Monte）/太陽門觀景台（Miradouro das Portas do Sol）

里斯本除咗有呢啲特別嘅交通工具外，佢都有幾個觀景台讓遊客可以俯視里斯本全景。呢一趟旅行我就去咗佢哋兩個較為出名嘅觀景台分別係山上聖母觀景台以及太陽門觀景台。

山上聖母觀景台就位於里斯本較高嘅地方，由相近的地鐵站出發都要行10分鐘斜路以及一大段樓梯，沿途嘅建築同埋設計令到我好似置身咗喺澳門嘅舊城區一樣。

上到觀景台後，從高180度零死角欣賞成個里斯本。發現佢地啲屋嘅頂部都係紅色的，而喺咁高嘅觀景台望落去，見到啲人喺城中的小巷裏穿梭，呢個畫面好似睇緊Lego。

去完山上聖母觀景台之後，就沿着斜路同樓梯行落去太陽門觀景台。太陽門觀景台就較接近市區，甚至可以喺舊城區沿着斜路行上去，所以呢度睇到嘅景同係山上聖母觀景台睇係唔同。

由太陽觀景台望出去嘅景感覺上較接近里斯本嘅海邊，同埋向右手邊望會見到另一個里斯本嘅地標4月25日大橋及日落。感恩的是喺里斯本三日嘅天氣都算不錯，讓我可以喺呢一個藍天白雲嘅氣氛之下欣賞里斯本的美。

4. 貝倫塔(Belém Tower)

喺旅程嘅最後一日，我就去咗貝倫區一轉。呢一區除咗有葡撻嘅始祖之外，當然要走出海邊去欣賞呢一座世界奇觀。雖然呢一座唔係被認定嘅七大世界奇觀，但呢個係以前細個玩世紀帝國葡萄牙人最終起嘅世界奇觀（我本身都唔知，係之前喺網上做資料蒐集嗰時先知道自己細細個就聽過貝輪塔呢個名啦）。

當日我喺黃昏時分去到海邊，海邊非常大風，但係無阻我欣賞呢一座塔的雅興。雖然呢座塔唔似其他國家嘅城堡，不過喺海邊有一座如此特別嘅建築，都真的讓我大開眼界。

5. 國立瓷磚博物館(National Tile Museum)

葡萄牙另外出名嘅嘢就係瓷磚，所以我都去咗佢哋嘅國立瓷磚博物館參觀。博物館就有兩層，比其他歐洲嘅博物館，佢嘅規模係比較細，但係佢嘅作品係獨一無二嘅，每一幅作品都係用瓷磚嚟堆砌出來嘅，甚至教堂入面嘅建築都係充滿住呢一個瓷磚風格。

瓷磚作品入面都有分成唔同時代同風格，而我最鍾意就係入口附近一幅米奇老鼠嘅藍白色瓷磚，有種好似將古代同現代融合埋一齊嘅感覺。呢一個博物館的作品真係令到我目不暇給，真的佩服藝術家，可將呢啲瓷磚玩得淋漓盡致。

6. 奧古斯塔街拱門及舊城區(Arco da Rua Augusta)

舊城區就係里斯本嘅市中心，無論係形形色色嘅名店，出名嘅餐廳都係林立於舊城區。大街兩旁有大量嘅餐廳同埋紀念品店，而大街嘅中央有不少嘅地攤販賣住紀念品，波衫同玩具，不過呢啲波衫大部份都係翻版的，同香港女人街嘅質素差唔多而喺星期日大街更有唔少嘅街頭藝人喺度表演，引來一大批人圍觀欣賞。

行到大街嘅盡頭，就係葡萄牙人嘅凱旋門同埋一個大廣場，由凱旋門方向望出去海邊，的確係有一種準備出征嘅感覺，而大廣場係十分寬闊，完全唔使擔心有人逼人嘅感覺。

7. 愛德華七世公園(Parque Eduardo VII)

有時候一個人去旅行，都鍾意去當地嘅公園行吓，感受吓當地人喺閑時嘅生活。我比佢嘅設計吸引到，可以從公園又高以下望返落去成個里斯本（佢有啲似英國嘅格林威治）。

以我觀察，當地人都會把握有陽光嘅時間出嚟草地野餐和放狗，其實呢一種生活都幾寫意呀。我就坐喺最高嘅地方聽住黃妍嘅7月24日大道，慢慢欣賞里斯本呢一個我好鍾意嘅城市。

美食

里斯本係一個國際旅遊城市，除咗有好多旅遊景點之外，當然都有唔同嘅美食。出發去葡萄牙之前，我諗呢個國家會唔會淨係主打葡國菜同埋海鮮餐，但係嚟到之後就覺得呢個地方真係一個國際大都會，喺街頭上會見到林林總總唔同國家嘅餐廳，而物價更加比英國或者香港平三成，所以就把握呢個機會喺里斯本食返夠本。

1. Taverna Alfacinha

到達里斯本嘅第一晚，就去咗一間喺舊城區食呢間出名嘅西餐，呢度主打西班牙海鮮炒飯同埋一個類似粥嘅葡式海鮮湯飯，但因為我唔係太鍾意食湯飯，所以我就揀咗西班牙海鮮炒飯同埋配上西班牙水果酒。

當侍應拎西班牙海鮮飯上枱時，我見到食物嘅份量就有點擔心自己食唔食得晒，因為真係好大碟，而且入邊嘅海鮮都好足料，每一款海鮮都有四至五舊。

味道方面，相比之前喺香港食嘅西班牙海鮮炒飯，佢係冇咁重口味嘅，所以我覺得就略為清淡少少。不過呢碟西班牙海鮮炒飯都係18歐元，心想喺香港可能真係要俾多一倍價錢先食到。總括嚟講，以呢個價錢可以食到一個唔錯嘅海鮮炒飯都係幾抵。

2. Restaurante Bessa Lda

喺葡萄牙呢個近海嘅國家當然要食海鮮啦，而我自己都非常鍾意食海鮮，但到左英國之後好少食海鮮，最多都係食炸魚薯條。

另外一晚嘅晚餐，我就去咗網上都多人介紹嘅餐廳，入到去就見到有一大台嘅台灣人同後面都有一台香港人，而其他就係來自世界各地嘅遊客。

我就嗌咗一份燒鱸魚，點解想食燒鱸魚呢？之前去克羅地亞旅行，食過嗰度嘅燒鱸魚覺得非常好食，同埋食西班牙海鮮炒飯嗰陣，都見到隔籬枱食燒鱸魚，所以就覺得點都要食返一餐。

我覺得呢一條燒鱸魚可以同喺克羅地亞食嗰條相提並論，條魚嘅外皮卜卜脆，而入面嘅魚肉非常新鮮同嫩滑。我而家諗返起都想再食，有時候我諗英國明明都係沿海國家，但係點解佢嘅海鮮冇其他地方咁出色呢？

3. Baía do Peixe - Praça do Comércio

當然我就不會食一餐海鮮餐咁少啦! 有一日嘅中午，我就去咗網上多人介紹位於舊城區凱旋門隔離嘅餐廳。

呢個餐廳主打一個任添海鮮拼盤，不過至少要兩個人先可以嗌呢一個拼盤，呢個就係一個人去旅行嘅掣肘。不過唔緊要，我今次都試咗佢另一樣出名嘅八爪魚，印象中我都未試過食完條嘅八爪魚。

呢條八爪魚個口感爽滑，不過我略嫌覺得佢落得太多油，所以食到一半就開始覺得有啲膩，所以我都係覺得如果有人一齊分享先去考慮呢一個八爪魚。

4. Manteigaria/Casa Pastéis de Belém(葡撻)

在葡萄牙旅行，當然要食吓當地嘅葡撻。睇吓佢嘅葡撻出唔出色過澳門安德魯同KFC。今次就去咗是兩間出名嘅葡撻舖，分別係人氣名店(Manteigaria)同埋葡撻始祖(Casa Pastéis de Belém)

先講呢間係里斯本有三至四間分店嘅人氣名店(Manteigaria)，當日我就喺朝早大約11點到去到舖頭，排咗四至五個人就買到，葡撻價錢就係1.4歐元。

葡撻拎到上手之後就發現佢同我哋平時食開嘅有啲唔同，首先佢唔係酥皮，而且唔係啲好滑嘅蛋，只係一啲吉士醬。食落口同我想像中有啲出入。佢只係一個普通嘅蛋撻，並唔係一個好好食嘅葡撻。

除此之外，就去咗位於貝倫區嘅葡撻始祖(Casa Pastéis de Belém)。呢間葡撻舖係發明葡撻嘅地方，據講澳門嘅安德魯都係嚟呢度試過覺得好好食，然後再改良帶入去澳門。

呢一個葡撻嘅價錢都係1.5歐元，拎到上手就覺得呢一個葡撻一定好好食。見到佢嘅外皮非常鬆脆，然後入面嘅蛋非常之嫩滑，滑到可以左右搖晃。絕對係我食過最好食嘅葡撻，葡撻嘅始祖果然係冇得頂。

5. The Bifanas of Afonso

平時去澳門旅行除咗食葡撻，當然都會食埋豬扒包啦！出發之前喺網上就搵咗兩間人氣名店，最後就揀咗呢一間The Bifanas of Afonso。

佢係一間外賣小店，而喺舖頭嘅外圍會見到入面嘅廚師不斷喺一個鍋入邊煮豬扒。我就試左佢主打嘅豬扒包，價錢就係3歐元一個。

豬扒同平時澳門嗰啲好唔同，澳門的通常都係普通一塊煎豬扒，而呢度嘅豬扒係一塊塊豬柳，佢煮得非常嫩滑，完全冇乾身嘅感覺，而包都十分鬆軟，豬扒同包夾埋一齊食，真係一個絕配。

6. Café Buenos Aires

除左必食嘅嘢之外，我專登喺其中一晚餐去食阿根廷牛扒。之前喺香港食過一間阿根廷扒房，覺得佢啲牛扒非常之好食，所以做資料蒐集嗰時見到里斯本有一間出名嘅阿根廷扒房，就覺得一定要食。

餐廳係位於樓梯街嘅側邊，成條樓梯都有唔同種類嘅餐廳，而裝修就有一種扒房嘅格調。

當晚我就嗌咗阿根廷嘅西冷牛扒。見到牛扒上枱嗰陣，我有啲驚奇，因為我未食過咁厚身嘅牛扒，嗰一刻我都有擔心會唔會中伏。

但係當我一次開牛扒見到啲肉汁標出嚟嗰時，就知道一定會好好食。果然五成熟嘅牛扒煎得啱啱好，並沒有煎到好過火，肉質並沒有好乾身，而且食到好重嘅牛肉味，阿根廷牛扒真的沒有令我失望。

7. 墨西哥菜

你哋可能會好奇點解我會喺里斯本食墨西哥菜，因為個價錢實在太抵啦!

當日我去幫襯係星期日嘅下晝，佢有一個brunch set，由前菜去到甜品五款嘢都係只需15歐元加埋一杯Cocktail都係22歐元。

同埋有時候我自己一個去旅行或者喺倫敦生活，如果想食呢一啲墨西哥菜或者其他菜式，最多都係嗌到前菜同主菜，而真係冇乜機會可以有一個前菜食到去甜品，所以梗係把握機會去食返夠本啦。

食物就有個前菜嘅墨西哥脆片，主菜嘅墨西哥餡餅，同埋最出名嘅Taco，以及芒果椰子蛋糕。

食物質素都係不錯的，但當然同香港最好食嘅墨西哥菜仲有一段距離啦，諗返香港嘅美食都算係喺世界上名列前茅。

「仍想證實我 心壯麗像宇宙」

在里斯本的三日旅程，逗留時間雖然不長，但係也體驗了不少當地嘅文化生活，以及嘗試咗很多的美食。

去里斯本之前我對呢個地方存在了不少嘅幻想，去完之後令到我更加喜歡這個城市，將來我一定會同我喜歡的人再訪這裏!