2025新年快樂！在2024年做了好多從未做過的事，讓我感受到世界原來是那麼大的。如果當初冇下定決心去踏出呢一步，就冇呢個機會去探索未知嘅世界。
在這個聖誕假期期間，安排咗一個前所未有的悠長假期，獎勵自己呢一年嘅努力，更重要的是同我最喜歡的人共渡佳節。
「沒有你 困境中 與我相依 如何活在巴黎」
巴黎是這趟旅程的第一站!在我未到歐洲生活前，我對巴黎嘅印象都係一般，在網上或者喺朋友口中對呢個城市嘅評價都是不太好，亦擔心呢個城市嘅治安和衛生。
但嚟咗歐洲生活大半年之後，又覺得歐洲冇其他人講到咁危險，只要保持警覺，做好防備，也可以去暢遊。
巴黎有大量嘅富有歷史的宏偉建築，例如巴黎鐵塔，羅浮宮，聖心堂等，所以都想一睹佢哋嘅真面目。
交通
由倫敦去巴黎嘅方法主要有兩種，分別係搭一個鐘飛機或者搭歐洲之星由市中心King Cross去到巴黎北站。
呢趟旅行我就搭晒這兩款交通，以下會講吓我對呢兩款交通嘅睇法。由於今次我去巴黎三日，只係帶咗一個背囊就出發。所以我就選擇搭廉航飛去巴黎。單程大約三十幾磅，呢程飛機同之前飛去歐洲唔同地方嘅廉航都差唔多，上咗飛機眨過眼就到咗巴黎。
回程嘅時候，我就搭歐洲之星返倫敦。呢一次係我第一次搭歐洲之星，可能乘搭當日係平安夜，所以票價都比平時便宜，大約60歐單程。歐洲之星都好似搭飛機咁要早大約一個鐘頭多啲去過海關。車程大約兩個幾鐘，火車都好穩定同埋好舒服，而行駛嘅大部份路段都有Wi-Fi，我諗呢個都係比飛機其中一個優勝嘅地方。
再講埋巴黎市內嘅交通，呢一趟旅行主要都係巴黎市中心遊覽，大部份景點都可以搭地鐵去到。巴黎地鐵俾我嘅第一個印象係殘舊，污糟。地鐵車廂應該係我搭過數一數二唔乾淨的。初初我以為英國嘅地鐵都不知所謂，但嚟到巴黎之後，就覺得這裹更不濟。
巴黎市容
講完交通，就講埋我對巴黎市容的印象。巴黎的市容可以用金玉其外，敗絮其中形容。巴黎遊客區附近嘅建築都好宏偉，散發着一種浪漫嘅感覺，但仔細留意街道上嘅路非常岩巉，短短在呢三日都見過唔少人行行吓路仆親，更見到一個老人家倒地後一段時間都起唔到身，而街道上亦有大量垃圾。
巴黎地鐵月台唔係散發着香水嘅味道，而是傳來一浸浸尿餲味。我心想法國人可以起到驚世嘅建築，但係又點解可以容忍到這些街道呢？
治安都係我出發之前最擔心嘅一個環節，喺網上或者朋友有口中都聽過唔少巴黎小偷嘅問題。所以呢趟旅行每一刻都打醒十二分精神，見到一啲唔對路嘅人或者事，都立刻離開現場，盡量唔好俾一啲陌生人埋身，可能長期都處於呢一個戒備狀態，所以巴黎比我嘅感覺都唔係想像中咁危險。
但係如果去旅行每一刻都要提心吊膽，又好似有啲反智。不過只需要小心啲，就可以喺呢一個漂亮城市欣賞美景同埋食好嘢，又好似唔需要付出好多。人真是非常矛盾的生物。
1.聖心堂(Basilique du Sacre Coeur)
聖心堂位於巴黎北部蒙馬特區，同其他熱門嘅旅遊景點有一段距離。但就係有呢種距離，才顯得出他的獨特 。
聖心堂坐落於山上，我哋離開咗地鐵站都要行一段斜路和樓梯才可以到達目的地。沿路都有一啲著名嘅景點，包括愛牆。愛牆係一幅寫滿咗不同語言我愛你嘅牆，可惜當日愛牆坐落的公園維修，所以未能入來打卡。
沿着斜路行咗15分鐘，就到咗我哋目的地聖心堂。當行到聖心堂後回頭一望，由高而不俯視整個巴黎，有一種成個巴黎都係自己腳下嘅感覺。呢個漂亮嘅畫面真的難以用筆墨來形容。幸好當日天清氣朗，所以都睇到日出，感覺真的是十分夢幻。
欣賞完聖心堂外的風景後，我們就入內參觀，可能當日我哋都比較早到達，所以排隊入內嘅人數都唔算話好多。入到聖心堂之後，就覺得呢度都係我去過頭五宏偉的教堂。
最後我哋見到天氣越嚟越好，就決定登頂。行過三百幾級樓梯後，就上到聖心堂最高嘅地方。在頂部望落嚟嘅畫面，比下面睇的更震撼，因為可以望到更多及更遠嘅風景。如果有時間和足夠體力的話，真的建議大家登上聖心堂嘅頂部。
2.巴黎鐵塔(Tour Eiffel)
巴黎鐵塔當然是一個不可或缺的景點，這裏是巴黎最標誌性嘅地標。上年年中舉行的巴黎奧運，奧運五環都在塔上高掛。
我們分別在日頭和夜晚於唔同角度欣賞巴黎鐵塔。首先，我們在日落前去登上巴黎鐵塔。
到達巴黎鐵塔後，持續落住大雨，心想這場雨真的有點掃興，但又好像帶點浪漫。我們買咗搭電梯上巴黎鐵塔頂連香檳的套票。
當我哋上到去巴黎鐵塔2樓出電梯，就感受到強風嘅可怕。當日嘅溫度介乎兩至五度，但風勢真的非常驚人，大風到好似香港十號風球。我們就不斷來回觀景台同埋有暖氣嘅地方。
由巴黎鐵塔俯視整個巴黎，跟在聖心堂欣賞有不同的感覺。巴黎鐵塔位於市中心，所以就更加容易睇到其他唔同嘅地標包括凱旋門，塞納河。同埋巴黎鐵塔始終都係法國最有代表性嘅地標，到訪這個城市都非常值得上來參觀。
當我們在2樓的觀景台拍完照後，就諗住再乘坐電梯上頂層。但當時因為強風，登上頂層嘅升降機暫停行駛。正當我哋打定輸數的時候，升降機又突然重新行駛，幸好我們願意等下去，才有機會登上頂部。
我地登上頂部的時候，天已經黑晒，萬家燈火的巴黎彷彿變成了浪漫花都，可能呢趟旅行係同我喜歡嘅人一齊遊歷，所以看到所有嘅風景都是美好的。
在晚上就去咗夏樂宮從另一個角度欣賞巴黎鐵塔。到達夏樂宮廣場後，整座巴黎鐵塔出現喺自己眼前，當刻嘅第一種感覺，就係終於唔係去澳門嘅巴黎人啦，呢一座係確確實實嘅巴黎鐵塔。廣場附近有人街頭表演，悅耳的歌聲陪伴着我哋欣賞這一個夢幻嘅巴黎鐵塔。
巴黎鐵塔在晚上每逢正點都會有燈光表演，整個鐵塔都會閃爍，巴黎的人真是做呢啲色水嘢嘅專家，靚得來又唔會太浮誇，我諗呢一個都係巴黎點解係浪漫花都嘅原因。
3.凱旋門(Arc de triomphe de l'Étoile)
凱旋門亦都係巴黎非去不可嘅景點，當晚吃過晚飯後，就沿着香榭麗舍大道，行去凱旋門。香榭麗舍大道兩旁亮起聖誕的裝飾，點綴着在盡頭的凱旋門。
雖然凱旋門冇巴黎鐵塔咁宏偉，但係喺法國歷史嚟講呢一座建築都佔有特別嘅價值。在我這一個賽馬愛好者嚟講，以凱旋門命名的法國凱旋門大賽，簡直就等於足球嘅世界盃一樣，所以我由細到大都對凱旋門呢個地方有一種好奇，希望將來有機會在巴黎欣賞凱旋門大賽!
4.塞納河遊船(Seine River Cruise)
其中一日嘅下午，就去咗塞納河乘搭遊船並吃午餐。巴黎大部份嘅著名景點例如巴黎聖母院，奧賽博物館，巴黎鐵塔等，都係塞納河兩旁，所以就可以喺呢一個半鐘嘅遊船間欣賞巴黎嘅風景。
雖然當日天氣驟晴驟雨，但都冇阻我哋欣賞巴黎風景的雅興。有一刻幻想自己好似奧運會開幕時的運動員，在塞納河進場的畫面。我諗呢一個都係旅行嘅樂趣，就係去以前只係可以從電視見到嘅地方。
個半鐘嘅船程，我哋由前菜食到甜品，坦白講食物質素就正正常常，可能早一晚食咗好好味嘅法國大餐，所以比較之下就爭咁啲。不過人頭大約700蚊，可以坐船喺塞納河食午餐，呢個價錢也不是太過分的。所以如果係巴黎有時間都值得搭塞納河游船去欣賞呢一個漂亮的城市。
5.羅浮宮(Louvre)
羅浮宮亦都係其中一個必去的景點，入面嘅博物館收藏住好多舉世聞名嘅作品。不過呢一次巴黎之旅嘅時間有限，所以我哋就冇入去參觀。
我們就係外面同透明三角錐體拍個照。羅浮宮對我嘅印象嚟講就係中學讀書嗰時數學書的封面，同埋陳蕾其中一首歌嘅MV都係喺羅浮宮外拍攝。係我眼中羅浮宮外嘅三角錐體已經係一個好靚嘅藝術品，將來有機會有時間，都會想入內參觀，一睹蒙羅麗莎及其他藝術品嘅真面目。
6.聖誕市集(Tuileries Garden Christmas Market)
由於我哋喺聖誕節前到訪巴黎，塞納河旁的杜樂麗花園仍有聖誕市集。呢個聖誕市集同倫敦嘅Winter Wonderland相比之下，規模就細一點，但係考慮到免費入場，就唔應該比較太多。
市集有唔同種類嘅攤位，包括傳統聖誕會食嘅德國腸，可麗餅，炒芝士薯仔等食物，又有一啲賣傳統手工嘅舖頭，更有一些攤位和機動遊戲。我地一行四人就玩左射籃球機，女朋友的朋友真玩得很利害。
當日行咗一圈，就發現大部份嘅攤位都係重複嘅，即係會有幾間相同嘅舖頭賣相同嘅野。不過呢個市集免費就不能強求太多，同埋喺聖誕節前來感受喜歡也是不錯的。
美食
1.L'Escargot Montorgueil (法國菜)
去到巴黎當然嘅要食法國餐啦!出發前搵資料，就見到有唔同價錢同唔同風格嘅法國餐。有一啲法國餐廳裝修非常高貴，但係價錢都比較進取。而有啲餐廳就好似茶餐廳咁樣，唔係賣服務，只係做一啲快速嘅法國菜。
最後我哋就去咗呢間百年老店金窩牛餐廳，餐廳環境非常舒適，雖然安排比我哋嘅座位有點狹窄，但係佢安排咗我哋坐一個角落頭，方便我們傾偈。
當晚我哋嗌咗田螺，牛肉他他，忌廉煮帶子，油封鴨髀同埋鵝肝。所有食物都係招牌嘅法國菜，田螺我哋嗌咗三種味，包括青醬，松露醬同埋一隻特別嘅味道。三種唔同嘅醬都非常夾田螺，田螺都非常鮮甜和美味。而其他菜式都非常出色。
總括而言，呢餐係價錢唔係太貴，但係好好食的法國菜，
2.Pedra Alta(海鮮餐)
而在另一晚，我哋就去咗食海鮮餐，呢間係一間葡萄牙餐廳。可能大家有啲奇怪，點解我哋會去法國食葡萄牙菜，因為我哋都想去法國試吓海鮮，見到呢一間餐廳咩海鮮都有得食，所以就想試吓啦。
搵資料嗰陣見到所有幫襯呢間餐廳嘅人，都會食一盤巨大嘅海鮮。
而我哋一行四人都唔例外，嗌咗一個熟嘅海鮮拼盤同埋牛肉串。海鮮拼盤入邊有龍蝦，大蝦，巨量嘅青口，魷魚等海鮮。佢地仲送咗一窩海鮮湯飯俾我哋，啱晒當時我哋喺巴黎鐵塔吹完風之後，暖返個胃。海鮮質素係水準之上，不過可能呢啲係熟食嘅海鮮，佢哋鮮味就唔算話太突出，但係計返呢一個份量同價錢，都冇咩投訴嘅空間。
燒牛肉係拍得上好食嘅扒房，佢燒到大約五成熟，並將牛肉和三色椒串成一齊。三色椒簡直將牛肉昇華到第二個層次，一嚟可以解膩，二嚟口感都豐富咗。
3.花神咖啡店(Café de Flore)
食過法國菜，當然都要食埋法式嘅早餐啦。何謂法式早餐，就係食返個牛角包同飲杯咖啡。今趟旅程，喺巴黎都食過幾間牛角包，我覺得唔同嘅餐廳嘅牛角包都各有特色，有的比較鬆脆，而有的牛油味是比較出眾。
花神咖啡店係巴黎一間好出名嘅法式咖啡店。甚至乎有一些廣東流行曲都喺呢一度取材。我哋嗌咗牛角包，炒奄列，朱古力同埋咖啡。呢度嘅牛角包就係比較鬆脆嗰款，牛油味都非常之香，係一個好好食嘅牛角包，而炒奄列就都係心目中嘅味道。
咖啡佢就分別將牛奶同埋咖啡上枱，咁我哋就可以按照自己嘅口味，調教咖啡嘅味道。
總括而言，花神咖啡店不是被過度吹捧嘅排隊名店，雖然價錢比普通咖啡店貴一些，但係我覺得都值得一來食返個法式嘅早餐。
「聽講花都是情人必經之地」
簡短但精彩嘅巴黎三天遊將我之前對呢個地方嘅擔心一掃而空，巴黎真的是一個迷人，浪漫嘅城市。期待下一次再到訪這一個地方，再欣賞更多美景和嘗試更多美食。
