24-31.12.2024|Christmas in UK

在巴黎玩完三日之後，我同女朋友在平安夜當日搭歐洲之星返到倫敦。而我地喺英國總共留咗七日。除咗喺倫敦過聖誕之外，我哋仲去咗溫莎，約克以及曼徹斯特。

由法國返到去英國嗰一刻，我就好似放下咗心頭大石。在法國面對睇唔明嘅語言同埋常常要提高警覺，擔心小偷（雖然倫敦治安同巴黎都差唔多）。

但返到倫敦就發現無論交通，語言等等都好熟悉，個人就冇咁繃緊。可能呢一個就係我喺英國生活咗接近一年嘅經驗，漸漸適應了這裏嘅生活，而英國都漸漸變成咗我第二個家。

倫敦的聖誕氣氛

今年係我喺英國第一年過聖誕節，所以就同大家講吓倫敦嘅聖誕氣氛。

首先，英國人著重聖誕節嘅程度同我哋華人對農曆新年差唔多。10月尾萬聖節未完結，英國嘅百貨公司就已經開始賣關於聖誕節產品，超級市場更推出大量可以用作開聖誕派對的貨品。

關於倫敦嘅聖誕節，不得不提Regent Street同Oxford Street的聖誕燈飾。每年嘅11月起，倫敦市中心呢一帶嘅街道都佈置了燈飾，這些燈飾吸引咗成千上萬嘅遊人去打卡。

而我都喺聖誕節前兩星期同埋拆禮物日到訪這個區域感受聖誕氣氛，望到這些璀璨的燈飾，真的有種置身於聖誕節普世歡騰的感覺。

呢啲燈飾同細個喺香港尖東海旁睇嘅唔一樣，香港嘅燈飾主要都係掛在高樓大廈嘅牆身，但倫敦燈飾就多數目係掛喺街道嘅上面，所以我哋就更加容易可以在街道打卡。

Winter Wonderland

Winter Wonderland係英國最大型嘅聖誕嘉年華。每年嘅11月起，Hyde Park就會舉行呢一個盛大嘅嘉年華，佢嘅規模簡直係放大版嘅香港中環海濱AIA嘉年華。嘉年華入面有多不勝數的攤位遊戲，聖誕市集，以及老少咸宜的機動遊戲。

我哋就喺平安夜當晚去到Winter Wonderland，入面嘅人流俾我哋想像中少，可能平安夜當晚大部份本地人都返咗屋企同親人共度佳節，及倫敦嘅交通都陸續停駛，所以呢度就冇想像中嘅人山人海。

入到去Winter Wonderland後，第一個節目就係去睇馬戲團表演。馬戲團表演都算係呢一個聖誕市集入邊嘅王牌節目。我哋就喺網上訂飛嗰時就預訂埋呢一個節目。

雖然表演嘅時間就唔算好長，但係佢都有晒一個馬戲團要有嘅表演，例如踩鋼線，鐵籠飛車，飛劍，雜耍等表演。

對我呢一個第一次睇馬戲團表演嘅人嚟講，表演真係十分精彩。無論氣氛，燈光，表演者等，都令到場內嘅氣氛非常熾熱。如果大家將來有機會嚟倫敦過聖誕，又會嚟呢一個聖誕市集，我都建議大家花多十幾磅去睇呢場表演。

睇完馬戲團表演之後，我哋就去咗巴伐利亞村莊覓食。由於我哋都計劃喺市集內食晚餐，所以我們在網上訂飛時買咗30磅食物現金券。而呢啲食物現金券就可以喺巴伐利亞村莊入面嘅攤檔消費。

巴伐利亞村莊名副其實係一個主打德國食物的區域，入面當然會有德國熱狗，而香腸就喺炭爐上面燒，所以啲香腸燒到卜卜脆。除此之外，就有啤酒，熱紅酒，燒春雞，以及一些甜品。

我哋就食咗兩份熱狗，西班牙油炸鬼同飲咗兩杯啤酒。食物質素就正常啦，但係可以喺呢一個充滿着聖誕氣氛嘅環境下食啲嘢嘅感覺都係唔錯嘅。

食完嘢之後，我哋就去咗玩攤位遊戲。呢度攤位遊戲嘅數量真係多不勝數。我哋玩咗掟波落個牛奶樽度，同埋掟波落個筒度。我哋實在好少玩攤位遊戲，對上一次玩可能已經係讀書嘅時候，所以我哋都係失敗而回，未能贏到任何嘅獎品。不過我覺得節日嚟到主題樂園，玩下呢一啲攤位遊戲先有節日嘅氣氛。

最後我哋就去咗玩機動遊戲，場內都有林林總總，唔同刺激程度嘅機動遊戲，連飛天鞦韆都有兩個版本。我哋就去咗玩正常程度嘅飛天鞦韆，雖然話係正常程度其實佢嘅高度已經同海洋公園差唔多。

當日天氣非常之寒冷同大風，鞦韆升到高空時高速轉動，一陣陣冷風吹進我的身體，不過可以係高空欣賞這一個迷人的聖誕主題市集，感覺都是十分夢幻的。

聖誕日活動

聖誕節正日的節目就主要分為上下半場。由於英國嘅聖誕節正日無論餐廳或交通都是完全停擺的，所以我同女朋友就到了倫敦塔橋附近的酒店居住，方便我哋去返市中心嘅一啲地標遊覽。這是一間商務式的住宅酒店，所以佢都有齊晒所有廚具，讓我們可以在晚上煮聖誕大餐。

朝早我哋食過早餐之後，就出發去跑步。嚟咗倫敦大約10個月，對呢啲景點都一啲陌生。但係就真係第一次沿着泰晤士河一帶跑步，有時候行過都見到一啲穿着運動裝嘅人跑步，都會諗起會唔會有機會都喺度跑步啦，始終我住嘅地方同呢一帶嘅地標都有一段距離，所以都未有呢個計劃。但咁啱就因為聖誕節住咗喺倫敦塔橋附近，所以就可以同女朋友實踐呢一個計劃。

我哋先由倫敦塔橋跑過對岸，沿着河邊跑到Bourogh Market，再經倫敦橋跑向聖保祿教堂，再跑到去Liverpool Street車站一帶。整條路線全程大約5公里，可以欣賞到倫敦嘅著名地標。

雖然河邊一帶嘅路唔似香港嘅海濱長廊規劃得咁完善，途中都有好多上上落落嘅樓梯，但係可以用跑步嚟欣賞呢個城市，都是別具風味的。

跑完步休息咗一陣之後，就開始準備聖誕大餐啦。由於女朋友嘅朋友都係呢一段時間到訪倫敦，所以都邀請埋佢哋一齊上我哋嘅酒店食晚餐。

呢一次都係算第一次做主人家去招呼朋友，如果將來喺英國長期定居，應該會不定時去招呼朋友。當晚我哋準備咗燒雞，海鮮意粉，炸雞，凱撒沙律，還有一些酒和飲品。

嚟到英國之後，我嘅廚藝應該係突飛猛進，以前喺香港都會簡單煮吓嘢，而家就會再花咗好多心機去鑽研唔同嘅菜。呢一個海鮮意粉應該係我暫時覺得煮得最好食，又可以招呼朋友嘅餸菜。

當晚大家一齊食吓嘢，傾吓偈，好開心，咁樣就到咗一個聖誕嘅晚上。

Sky Garden

Boxing Day當日，我就同女朋友去咗Sky Garden。Sky Garden都算係倫敦一個比較新穎嘅景點，因為佢可以免費預約上到一個大約35層高嘅觀景台，欣賞倫敦嘅風景。

呢一次係我第二次到訪呢個景點，第一次嚟嘅時候英國打8號風球，天氣非常惡劣，在35樓望出去只可以望到黑雲，同埋灰濛濛嘅倫敦。

而今次就冇打風，天氣都唔算話好好，冇落雨但係多雲，從觀景台望出去都係一個灰濛濛嘅倫敦，感覺真的有點可惜，如果天朗氣清的話，呢個地方可以欣賞到一個非常漂亮嘅倫敦。

Camden Market

Camden Market係倫敦其中一個著名嘅市集，這裏嘅食物，檔攤都吸引到英國當地人以及遊客慕名而來。呢一度可以食到不同國家嘅食物，例如墨西哥菜，印度菜，德國熱狗以及意大利粉等。

當日我哋就食咗咖喱配印度烤餅同埋一個充滿芝士嘅意大利通粉。

呢一款嘅印度烤餅係我第一次食的，佢將非常惹味嘅咖喱雞夾在印度烤餅入面，佢嘅做法有啲似墨西哥夾餅，將所有餡都夾在烤餅入面。我覺得呢個做法非常之出色，每一啖食落口都可以食到好味嘅咖喱雞。

除此之外，我哋就食咗一個Mac&Cheese。見到店員喺我哋面前將大量嘅芝士撈落去啲通心粉，就知道呢一個Mac&Cheese會非常好味。在寒冷嘅天氣下，食一個暖笠笠嘅充滿芝士意大利粉，真是一個不錯的行程。

Windsor

聖誕期間，除咗喺倫敦玩之外，我哋去左距離倫敦大約一個鐘頭車程嘅溫莎。去到溫莎第一樣要做嘅係搵吓有冇Windsor House，成件事係有啲小學雞，但呢一個都係我喺香港其中一個回憶，最後喺一座住宅搵到Windosr House。

溫莎城堡係英國王室辦公及居住嘅地方，我哋搭火車出咗站行大約15分鐘，就去到溫莎城堡。

當日天氣大約三至四度，可能因為都係聖誕節假期後嘅時間，到訪嘅遊人不算太多，但係又未至於冷清。而城堡門票嘅價錢就每人30磅，但憑着門票一年內更可以無限次參觀城堡，所以我都有計劃嚟緊喺夏天會再去多次溫莎，因為夏天嘅風景同冬天嘅應該是截然不同。

進入到城堡後，我們先到遊客中心租借導賞器材，讓我們到不同嘅地方參觀的時候，都可以聽到官方嘅講述。

首先我哋就去咗參觀一個又一個嘅房間，而呢啲房間就係以前英國君主辦公及居住嘅地方。呢啲皇室嘅地方冇想像中咁奢華，但係有一種高貴和莊重嘅格調，入到去唔會覺得所有嘢係好通俗。

參觀完之後，就喺城堡四圍行吓，然後我哋就見到呢度同白金漢宮一樣都有士兵喺度當值，相信喺特定時間呢度都會有交接儀式。

然後，我哋就去咗參觀宏偉嘅聖喬治教堂，呢度埋葬咗英國歷代嘅君王，而最多人去睇嘅就係近年離世嘅女王伊利沙伯，雖然我唔係生活喺英國殖民嘅時期，但係女王伊利沙伯喺香港人心目中都有一個特定嘅位置。

喺城堡參觀完之後，我哋就去咗溫莎嘅大街行下。呢度嘅商店當然都會賣關於英國王室嘅商品，除此之外都有不同嘅小店，所以都建議大家嚟溫莎除咗行城堡之外，都可以預留時間行吓呢一條大街。

York

喺倫敦玩咗幾日之後，我哋就向北移動到約克郡參觀。由倫敦嘅King Cross車站搭大約兩個鐘頭嘅火車就可以去到約克。呢個城市比我嘅印象係一個古色古香嘅地方。一步出火車站，就發現呢度嘅建築同倫敦好唔一樣。呢度有一種好舊嘅英倫味道。

呢個城市嘅面積不是很大，所有景點都係步行距離。我哋喺約克逗留咗兩日一夜，行咗維京人時期遺留下來的圍牆，圍牆並不是好似萬里長城咁長，但係喺歐洲遺留落嚟呢啲圍牆古蹟都不是很多，所以都值得嚟行吓。

由於當日天朗氣清，我哋就去咗Clifford Tower去俯視整個城市嘅風貌，由於歐洲嘅建築普遍都唔會好高，所以上一個幾層高嘅塔，就可以欣賞到360度整個城市嘅風貌。

而我哋都去咗因為哈利波特而出名嘅斜角巷，去到呢個地方嗰時就同心目中有點落差，網上的人講到好明顯咁斜出來，但係親眼睇就覺得冇咩特別，同埋呢條巷太多人啦，所以我哋逗留咗一陣就離開了。

而約克令到我最難忘嘅係佢嘅天空，呢個嘅日出同埋日落嘅天空簡直是一幅油畫。同喜歡的人欣賞住呢個橙粉色嘅天空，真的是這趟旅程嘅一件美好的事。

食物

1.Bancone

呢間係倫敦近期談論到非常高嘅米芝蓮餐廳，佢主打嘅就係絲綢手工意粉，我覺得呢款意粉又冇想像中咁驚艷，雖然見過牛油配蛋黃係令到個意粉變得香口，但係夾落個意粉又好似唔係好夾咁，所以絕對冇網上嘅人講到咁誇張咁好食

除此之外，我哋就食咗辣肉嘅闊條麵，呢個闊條麵味道就不過不失，但係就略嫌有啲重口。

不過整餐飯個價錢都唔算特別貴，所以如果想喺倫敦食米芝蓮手工意粉，都可以試吓嘅呢間餐廳，但係建議食之前先期望管理，否則就會有點失望。

2.文興酒家

拆禮物日當日，倫敦大部份嘅餐廳繼續放假，所以我哋就去咗唐人街一帶覓食，最後我哋就去咗香港都有分店嘅文興酒家。文興酒家係比較特別嘅，因為佢係喺英國出咗名之後，先返香港開分店的。

當晚我哋就嗌咗燒味拼盤，羊腩煲同埋一個炒河粉。我覺得呢度嘅燒味絕對拍得上香港好食嘅燒味，而羊腩煲都非常之暖胃，啱晒喺嚴寒嘅冬天食，濕炒牛河就好有鑊氣。

成餐飯嘅體驗都非常之好，除咗食物好味之外，店員嘅態度都算唔錯，重點係佢哋都係講廣東話，所以都俾咗一種熟悉嘅感覺比我，因為我實在太耐冇食過中菜啦。

3.Sunday Roast(Blacklock)

喺英國生活，點都要試吓佢哋嘅國民食物Sunday Roast。Sunday Roast係指喺星期日嗰陣同朋友一齊飲住啤酒，去分享一大盤烤肉。

當日我哋冇食早餐，留肚去食呢一個brunch，因為我哋都知到呢一個份量係非常之大。每人會各有兩件豬牛羊，約克布甸同埋大量薯仔。

肉類嘅質素不錯，而且非常香口，啱晒我哋飲住啤酒去大吃一頓。以呢一個份量嚟講，價錢都唔算太貴，大約每人35磅。

所以如果嚟到英國旅遊，都建議大家去試吓食呢一個Sunday Roast，體驗吓呢一個英國人星期日吃肉嘅聚餐文化。

4.Mikkeller

啤酒應該算係英國首屈一指嘅美食，冇錯係美食，而唔係飲品。英國人可以唔食飯，但係酒就一定要飲。

嚟到英國之後，我諗我都飲多咗啤酒，每星期都會去飲番杯，有時出街食飯，嗌飲品都會嗌啤酒。以前細個覺得啤酒好苦好難入口，但而家就開始漸漸式欣賞佢嘅果香同麥味。

所以就同女朋友到訪咗呢一間丹麥嘅手工啤酒店，呢間舖頭係我女朋友嘅朋友介紹嘅，我哋就嗌咗一杯Lagar同一杯Pale Ale。Lagar嘅麥味非常之重，而Pale Ale飲落口之後，有種好重果香嘅回甘味。我哋再嗌咗一份炸雞去送啤酒，呢份炸雞外脆內軟，令到啤酒變得更加有層次感。

5.Dishoom

我哋亦都到訪咗呢一間英國嘅超人氣印度名店，每次經過呢間舖頭嘅門口都係排住一條長龍，我一直都想試吓佢。我哋就去咗曼徹斯特城嘅分店，而我就喺到訪前三星期訂枱。

當晚我哋就嗌咗一份牛油咖喱雞配薄餅，同埋燒羊架，呢兩樣都係呢度嘅招牌菜。食之前我哋都有期望，不過果然有期望就會失望，牛油咖喱雞味道不過不失，但未至於要大排長龍去食，我覺得香港有一半以上嘅印度咖喱好食過呢一間。而燒羊架就落咗好多香料去燒，但又真係冇想像中好好食。

如果唔使排隊，又想食吓一啲普通嘅印度菜嘅話，都可以幫襯佢嘅，因為佢價錢都唔算好貴，但如果真係要用兩三個鐘頭去排隊就真係唔需要啦。我相信英國都有一啲好食嘅印度菜嘅，等我再發掘下分享俾大家啦。

在西方國家過聖誕節的氣氛果然比香港濃厚得多，或者有我愛的人陪伴嘅我，一齊去探索世界。