幾若工前，我去羅東領藥仔。領完，11點外，去對面的火鍋店食火鍋。食煞，搭12:20的火車，到瑞芳２點。第一市場已經收攤，去中正路的菜架仔買菜。
我揀幾種菜，看著有一包皮削好的萵仔菜（ue-á-tshài/e-á-tshài—這幾若年逐家華語講「Ａ菜」）心，我真愛食的， 塑膠袋仔內賰一寡仔，我攏共買。
轉去厝內，共菜心洗洗一下，切較短，想欲加鹽予伊出水，先提一塊食看覓，有鹹，原來有豉（sīnn）鹽，我閣摻蒜頭、糖，無醋，用半粒檸檬共汁硩出來，嘛是酸酸的味，冰佇冰箱半工就會使食。
買著這个菜我是誠感動，一支一支的菜心共皮剾（khau）掉，若我家己剾，20分鐘嘛剾袂了，閣加鹽，這攏是人工，就是有人咧做，咱才有整理後的菜通食。
用字問題：櫼（tsinn）的用法是「用塗豆櫼塗豆油」，佮檸檬敢若無仝款，暫時用硩（華語：壓）。台語的「榨」只有「榨菜」的用法。
查教育部台語辭典，https://sutian.moe.edu.tw/zh-hant/
（2025.11.13.）
