查某人一世人攏咧講這句話。
我聽「違章女生lalaland，S20EP9—去去戈登拉姆齊！馴服心魔，前進多元宇宙ft.蔡宜文」內底講到，佇團體中，若有一个工課愛有人去做，查某人真少家己徛出來，講：「我來做，我會曉做，我會共這个工課做較真好。」攏講：「我的能力無夠，予較會曉的人去做。」等別人去做，抑是被動等人來叫伊做。佇阮彼个時代，閣會加一句：「予查埔人去做—讓男生去做。」（這句這馬猶有人咧講無？）
我拄著的，舉例：
￭「讓男生去講」
我的機關賣厝予阮，仝大樓的厝邊仔攏是同事，有老師，嘛有職員。阮兜上早搬入去。成立大樓管理委員會的時，逐家攏來開會，討論愛討論、決定的代誌。
講一睏仔了後，坐佇我的邊仔的查某同事共我講：「讓男生去講。」伊按怎有這个想法咧？我毋捌有這个想法。上尾仔，我當選第一屆的主委。
￭𤆬女性寫作班。
我的招生簡章的標題是：「我手寫我口」，來參加的人的條件是：「會說話，會寫字的成年人」、「限女性」紮筆佮紙來就好，「讓你寫出來是我的事情」。
我有當時仔會想，我「教」的物仔干焦一屑仔爾爾（其實一開始就講「這裏沒有教，大家一起寫」），誠簡單，來參加的大部份是中老年的查某人，毋過，我用各種趣味閣有應效的活動，逐家耍甲誠歡喜。其實予毋捌寫過的中老年人寫出來，是誠𠢕（gâu—能幹）的代誌。
￭咧女性團體內面
我生第３个囡仔的時，公家機關開始有「育嬰假」，育嬰仔假，我請假２年，揣時間去參加女性團體，嘛鬥相共。２年了後，我轉去上班，誠無閒，嘛是感覺：「我讀的冊無夠，無去讀研究所，嘛毋是讀性別、社會學的系，知識無夠濟，無法度佮遐仔有學問的人鬥陣。」就無閣去。
￭我一篇文章寫煞，欲貼社團，耳空邊仔會有查埔人的聲音咧講
：「你寫這些小事不重要，不要寫了。」有時陣（我較有氣力的時），我會共伊回答：「咱咧過的生活攏是『小代誌』，要無，啥物是『大代誌』？請你共我講。」
我一直講我家己寫的無重要，無人愛看，按怎會按呢？這佮我讀佗一間大學沒關係，我讀台灣大學，我無感覺我比人較𠢕（gâu—能幹）、巧、聰明，較有成就，無，我無啥物成就，公家機關做25年，退休，飼３个囡仔大漢。退休了後才做我想欲做的代誌，做十外年，破病，病好了，感覺無氣力，一直咧揣原因。我想我唯一的「成就」是領到退休金，毋免煩惱錢的代誌，哈哈！
看起來，查某人一直咧講家己的學問、知識無夠濟，能力無夠好。抑無，啥人的知識是有夠，能力是真濟的？查埔人？看起來，𪜶（in）較有自信講這種話。其實嘛毋是逐个查埔人攏遐爾仔有自信，尤其這馬的查埔人無進前的查埔人遐爾仔囂俳（hiau-pai ，註），認為家己比查某人較𠢕，講的話攏是著（tio̍h，註）的。
註
囂俳（hiau-pai）—囂張。形容人的行為舉止放肆傲慢。
著（tio̍h）—對
教育部台語辭典，https://sutian.moe.edu.tw/zh-hant/
