這馬猶有無？
我寫寫一下，才想著，是偌久進前算「以早」？決定30年前算「以早」，古早，30年以內是「這馬」。
▉一、我拄著的、聽著的
●我的跤踏車硩著伊
我咧小學，拄拄仔會曉騎跤踏車的時，有一擺佇學校的運動埕騎，經過一个查某囡仔的身軀邊的時，我的跤踏車倒落去，小可仔硩著伊，伊哭，我陪伊轉去𪜶（in）兜。伊的老母聽我講經過，我猶未講完，老母就講：「看妳爸爸回來打妳。」看起來是台灣老母嫁外省人的老爸，老母綴咧講華語。
—奇怪，伊予我的跤踏車硩的，咧哭，伊無毋著，按怎伊的老爸欲拍伊？伊若有毋著的所在，老母嘛會使拍，按怎愛等老爸轉來，予老爸拍？
●共查某囡仔的長頭毛綁著厝頂拍
有一擺，我經過一間厝的頭前，大門開開，內底有幾若个大人，共一个查某囡仔的長頭毛綁咧厝頂，伊的跤無踏佇塗跤，規个人吊咧半空中，咧共拍，敢若無聽伊哭。
—我感覺誠恐怖，緊咧行過去。幾若个大人同齊欺負一个查某囡仔，遐細漢的查某囡仔會做偌大的毋著代誌？
●較無乖彼的走出去耍，對厝內面較乖的罵彼个
我細漢的時，較愛耍的小弟走出去耍，較乖的囡仔踮厝內，爸母一直咧罵走出去彼个，罵予乖的囡仔聽。
—愛耍彼个無聽著，毋知曉伊按怎予爸母無歡喜；乖仔顛倒予人罵。
●囡仔咧學跳索仔，佇旁邊一直講：「你遮戇。」
我有囡仔的時，有一擺去市場買菜，中央空地，有一个查埔囡仔咧學跳索仔，猶袂曉跳，索仔踅一輾，就牢仔跤底，伊迒過索仔，閣踅一輾。邊仔有一个查某人咧共伊講講按怎跳，按怎跳，閣加一句：「你按怎誠戇。」
—我真想欲共罵落去。囡仔咧拍拚學，你家己會曉跳，就講遐彼誠簡單，攏袂記得你家己學的時的情形。
●「我上什麼幼稚園？」
我結婚了後，有一擺佮阮翁去伊的阿姊兜。我問伊阿姊的細漢查某囝：「妳唸哪個幼稚園？」伊共我看一下，無講話，走離開客廳。
一陣仔了後，我去灶跤看阿姊煮菜，彼个查某囡仔一直共阿姊吵，講幾若擺，我聽清楚伊咧問伊老母：「我唸哪個幼稚園?」阿姊嘛聽著，回答：「XX幼稚園。」攑頭笑笑仔對我講：「我無咧共聽。」
—囡仔講話無咧共聽，伊的囡仔誠可憐。
●騙囡仔
有一擺我聽著阮翁的另外一个阿姊咧共伊的老爸講：「你答應XX的代誌，你就愛做到，袂使騙伊。」XX是阿姊的後生，大官講：「以早，囡仔攏嘛用騙的。」阿姊講：「這馬的囡仔袂使騙。」
—原來「騙囡仔」是這个意思。囡仔用「騙」的，答應伊，現主時無吵就好，𪜶（in）毋知影囡仔攏會記得。
●「XX要乖，阿姨才疼你。」
我的厝邊仔，樓下的太太無上班了後，咧幫人𤆬囡仔。有一擺我聽著伊咧共彼个囡仔講：「XX要乖，阿姨才疼你。」
—疼伊是有條件的？
