阮兜搬去山上，我的後生的幼稚園佇社區內底，逐家攏熟似，放假的時，囡仔定定同齊耍，歇寒歇熱的時，幾若家一組，互相輪流排休假陪囡仔。
我的厝邊，in的囡仔比我的後生較大漢。有一工佮𪜶（in）的老爸開講，講著囡仔的生日會，伊講：「我們小孩從來都不參加同學的生日會，因為生日都跟阿公阿媽一起過，我們不會辦生日會，所以也不參加人家的。」我無應聲，心內掣一趒，我想的是：「你共你的囡仔當做祭品，去獻予你的爸母。」伊的囡仔失去佮同學同齊過生日的快樂。
我的查某孫一歲的時，大人咧講較像啥人？老爸抑是老母？囝婿彼爿的人攏講較像老爸，我共我的查某囝一歲的時的相片揣出來，翕相貼佇群組內面，予in看覓，親母猶原寫：「比較像爸爸。」我寫：「蛋糕不一樣，應該是吃了２次。」雞卵糕佮穿的衫無仝款，應該是佮阿公慶祝一擺，佮外媽、阿舅閣食一擺。
我欲寫這篇進前才想著，做生日，會使做２擺，是按怎佮阿公阿媽同齊過，就袂使辦生日會？袂使去同學的生日會？敢若辧生日會就是反背囡仔的阿公阿媽的意思？伊按呢做是咧沒收囡仔的童年。
幾若年後，彼个厝邊仔共阮厝邊彼間厝賣掉，搬去社區較頂懸的所在。有一工，阮翁接著伊的電話，伊知影𪜶（in）彼个離家出走的查某囝這馬轉去厝內，請阮翁趕緊去𪜶（in）兜，共𪜶（in）的查某囝擋咧，袂予伊出去，𪜶（in）翁仔某自台北趕轉來……
阮翁有去𪜶（in）兜擋伊的查某囝袂閣出去無？我毋知影，𪜶（in）的厝內是出啥物問題？查某囝離家出走，敢講佮𪜶（in）兜年節仔的時陣，包括囡仔的生日，一定愛𤆬囡仔全家同齊轉去爸母兜做孝子有關係？猶閣有，伊做社區的主委的時陣，無咧管社區的代誌愛問其他委員的意見，愛開會表決決定，攏伊家己決定，敢若共社區委員會當做伊家己的公司，抑是𪜶（in）兜的店仝款，𪜶（in）兜內面敢有可能有民主，尊重囡仔的意見佮願望無？
（2025.9.）
