第一章 白狗得食 黑狗當災

90 年代初澳門賭業比今時今日並不遜色，當時澳門賭場貴賓廳不多，只有氹仔凱悅酒店、澳門文華東方酒店的鑽石廳；及葡京酒店。葡京二樓有牌九貴賓廳外、還有鑽石廳、黃金廳、孔雀廳、翡翠廳、富貴廳、地下有珊瑚廳、還有四樓貴賓廳全是百家樂貴賓廳，最低投注 $1,000。牌九貴賓廳經常水洩不通，閒家買二萬元想有牌摸，只怕只可以買尾門。最旺、最熱鬧的百家樂貴賓廳有鑽石廳、黃金廳；及富貴廳。牌九貴賓廳和全澳門鑽石廳都是同一老闆，當時猛人 街市偉。黃金廳老闆 飛仔強，鑽石廳、黃金廳先天骨格強健生意好屬於正常。富貴廳後來聘請了當時剛出獄江湖猛人 猛鬼添進駐做公關經理後；生意越做越旺。四樓貴賓廳不是一般客人玩，客人主要來至日本豪客；及酋長國的中東油佬，一般只需要五分鐘一鋪的百家樂賭局，在四樓經常開一局都要二十分鐘起，因為要計算賭桌上雙方注碼差額，有時一場賭局枱上放滿籌碼，何其壯觀。四樓有一批疊馬仔能操流利英語及日語不是一般古惑仔。是雖然是英雄的，總有一套地下秩序各人都各自工作，他們互不相干。

黃金廳近年來了一個豪客，年過 60歲身材矮小中年發福，略帶鄉音，行路時一拐一拐。每次到澳門來都可以上落一、二百萬做賭注，面不紅、氣不喘，永遠都笑面迎人嬉皮笑臉，皮笑肉不笑不在乎枱面的籌碼多寡。今天他穿上一件深啡色格子絨西裝，淺色恤衫包不住他隆隆的肚腩，髮型有點凌亂整體上是不修邊幅。他手持一杯白蘭地加冰，坐在百家樂最低投注 $2,000的枱大叫：「我做人無物點？鋪鋪八、九點。」他押下十五萬莊，當然目的是可以親自捽牌，他身旁有三位手持疊馬仔陪伴着。對面有另一位中年女人，押下二十萬閒。其中一位企在中年人背後的疊馬仔對中年人：「老闆少路、大眼仔路開閒，不如忍一忍手。」

中年人：「咪撚戇鳩，有路就唔洗企係到，我心中有路咪坐係到啦。」從口袋拿出一支雲斯頓香煙，疊馬仔即時拿出火機幫中年人點起香煙。

中年人緩緩呼出香煙，眼尾一睄道：「細佬！女人最邪，咪撚信，信你就一世戇鳩；長買佢哋對面，包你有運行。」荷官問：「還有沒有人下注？」最後下注的人即時洶湧而下注，啤牌未派到中年人的面前；他望著閒家的女仕又叫：「八輸九、週時有！」重注閒家的女子金睛火眼望著中年漢。

中年人：「咩！嫌多點呀！咁就七輸八無辦法！」

那女仕：「我叉鳩你，死發瘟！」

啤牌派到中年人面前，他以純熟的手勢用鷹眼𣈴手中啤牌；看罷；他淡淡然抽一啖煙！就放低啤牌，百家樂牌例；莊家哥以等閒家先開牌。女仕垂下頭雙手逐隻啤牌用心地慢慢捽，她嘴角向上一藐，拋出手中啤牌，荷官：「閒四點」隨後；中年人拋出手中啤牌荷官：「莊七點！」

中年人一邊抽煙一邊靜待，因為閒家必需先博牌。全枱人都肅然地注視荷官遞上給女士的第三張牌，突然聽到中年人用籌碼敲了煙灰盅一下，清脆的一聲劃破了長空的肅靜發出「叮」一聲；中年人：「一公失蹤！」在旁都輕輕一笑，女士再次用鷹眼𣈴視手中啤牌，中年人：「藍邊一線，日後好相見！」女士用盡力地捽，有人在旁叫：「老闆搞掂！無邊嚟㗎！」女士拋出手中兩點的啤牌，加起來共六點。荷官：「閒六點；莊贏」

中年人：「真係叉鳩你！叉燒喎！」中年人哈哈大笑。女士只好托一托眼鏡拿起手袋拂袖而去。中年人叫在場有參與拍和打氣的人都來他身旁每人逐一打賞，就在對面剛才大叫：「老闆搞掂！無邊嚟㗎！」的一位嘍羅都打賞一千元。之後他就離枱而去，身後的疊碼仔都跟他而去，疊碼仔：「老闆返香港？幫你拿套船票！」

中年人：「未住！去打令搵條泰妹冲個涼先！」

疊碼仔想客人去後桑拿回來繼續賭錢：「咁不如幫你攞定間房，今晚返來休息？」

中年人：「不要！你們先食飯，晚些見到就見。」他們就分手了。中年人一個乘搭升降機到日本餐廳獨個兒晚飯。

因為怕被人搶劫；暗規矩疊碼仔身上泥碼就不能行出賭場，但這幾個疊碼仔帶着手提袋，內有幾十萬籌碼，大搖大擺地上了四五六酒家與老闆池哥會面，順道給池哥點算手提袋中的籌碼。今晚坐在池哥旁有一位端莊雍容上了年紀的女仕；她是池哥背後的金主 細姐。細姐 在澳門黑白兩道很吃得開很多生意，細姐 是誰的金主也沒有知，因為太多人受過 細姐恩惠。池哥問幾哥疊碼仔手下：「今日生意如何？」

疊碼仔：「雖然一個客但都不錯，疊到差不多三十底泥碼。」

池哥 點算疊碼仔袋內的籌碼是否正確數目：「誰！」

疊碼仔：「那個中年大款，黃生。」

池哥：「黃生？」

疊碼仔：「上次係泰皇宮佢飲大咗，佢同你吹水話自己後生時住大帽山，一晚瞓醒全山都是金之後就發咗達。」

池哥：「哦！黃黑狗！」

疊碼仔：「吓！真名嚟㗎？。」

池哥：「係呀！有次佢問我攞三十萬數，睇過佢身份證真名嚟！」

疊碼仔：「咁搞笑！改過咁嘅名，佢老豆同佢有仇！佢每次過嚟都賭通宵，最少過一晚，夜啲佢一定返嚟，諗下計睇吓佢身份證！」

池哥：「安仔有沒有開工？」

疊碼仔：「安仔彈起咗！好少出嚟；成日係雀仔園打牌，佢請咗個伙記幫手，條友高高大大以前打回力球叫 閪波盛 秦國盛。」

池哥：「咁安仔多唔多客？」

疊碼仔：「唔多；十一、二點一定收工，佢伙記 閪波盛出名怕事；又爛滾。十二點多數係 廚屋同啲泰妹跳舞蒲緊！」

池哥：「同個條 閪波盛有冇偈傾？」

疊碼仔：「有！住係雀仔園，係下環街 D 古惑仔！」

池哥：「唔～ 今晚十點後有客就推俾安仔伙記做！之後打電話比我。」

疊碼仔：「明白收到！」池哥點算完疊碼仔袋內的籌碼後，就交還回給疊碼仔。

池哥：「無咩嘢，你哋走先，我同細姐仲有嘢傾。」幾個疊碼仔就離開了。

細姐：「安仔 係咪之前跟你搵食，之後彈起咗個嗰？」

池哥：「安仔 條古惑仔，跟咗的幾年，諗住信得過比袋籌碼佢袋，點知襯班友仔收晒工，剩番 安仔一個，佢晚晚扮勤力。上個月無端端唔做；之後突然有錢去帳房開咗個戶口，自己開檔做疊碼，買底碼疊都要十萬，我叫人去睇吓佢有幾多錢放係帳房，原來有五十萬。有人篤俾我聽，原來晚晚收工佢唔放番我袋籌碼係帳房，攞開工籌碼私下去賭。贏咗就自己開檔做，如果我唔搞佢，我以後點出嚟行。」

細姐：「萬事小心啲！最緊要唔好搞到賭客。」

池哥：「已經好小心，成日出嚟𥄫住袋碼，明白；細姐唔會搞串你。」

細姐呷啖茶：「哈！哈！點會搞到我。你啱啱講開嗰個 黃黑狗咩人？」

池哥：「吹水客！咩事？係咪有牙齒印？我搵人幫你搞。」

細姐：「冇！個名咁怪覺得奇！有機會話比我知邊個係咁怪嘅名。」

池哥：「好呀！今晚睇吓佢返唔返嚟。細姐，有咩用得着我；吩咐我做就得啦！」

細姐微笑：「好啊，叫嘢食先。」

晚上 10 時許是葡京酒店的黃金時段聲色犬馬、紙醉金迷英雄地。賭場當中黃金貴賓廳最旺場、最豪氣的人都在賭枱上競逐。但只有一人持著手提包徘徘徊徊，這是 閪波盛。池哥其中一名手下行到 閪波盛身邊：「盛哥！乜嘢環境？」

盛 嬉皮笑臉：「冇咩環境，等多陣無嘢做就去跳舞。」

池哥手下：「跟安仔開工，好似唔使點做咁，你又多女又成日見你去蒲！」

盛：「一般般啦，有嘢咪做囉，冇嘢做就飲酒、跳舞、沖涼、揼骨。大佬做得咁辛苦，咪搵人錫下細佬。」

池哥手下：「今晚我同D兄弟想過一過氹仔，但而家有客做緊，不如你幫我頂一頂，做到幾多你自己，幫幫手可唔可以？」

盛：「過氹仔有乜嘢玩？預埋我好喎？」

池哥手下：「冇啊；屋企有事呀！」

盛 好不願意：「咁好呀！個客係邊？」

池哥手下：「坐最入張枱，一齊行。」搭着 閪波盛一同走到客人身邊，然後拉開椅子坐下來，大家互相介紹後 池哥手下就離開，離開賭場即時打電話給池哥報告一切。

不到10分鐘後，池哥 行入黃金廳帳房，入到帳房視察外邊環境，池哥 注視到 閪波盛服侍的客人正是 黃黑狗，他便悄悄地打電話給 細姐：「細姐；黃黑狗係黃金廳，你有時間就過嚟 ..... 仲有咩吩咐我.....啊...得...得... 一定一定 ... 無問題我搞掂佢。」之後掛了線。

細姐駕著車到來葡京，車廂中還有一個人是她的姐姐人稱 二姐，二姐年事已高，已經好少出來。 二姐：「你仲諗，你記唔記得 1940年我同你係珠江上的日本物資船打工嘅日子！捱到今日你仲諗返轉頭。」

細姐：「得啦，我咁大個人識諗有分數，我送你返屋企先。」之後大家都不語了；到了 二姐家門前車就停下來，二姐就下車了：「你諗下我哋點樣先捱到今日，如果佢係好；佢一早就搵返你，嚟得賭場仲係好人咩？」細姐沉默不語驅車就離開了。

黃黑狗好似飲多了兩杯，面紅紅地自言自語，身邊的 閪波盛只好繼續幫他疊馬，低着頭寫吓路紙。 閪波盛漸漸發現賭廳中沒有多餘的人，其他疊碼仔、扒仔都離開了，原來四處都是企著司法，（回歸前 司法警察 簡稱 司法；直屬葡萄牙政府，是唯一一支可以自由進入賭場的執法隊伍。）黃黑狗的高談闊論誇張動作，引起很多在場司法注視，並走到她身邊看看究竟。

其中一名魁梧的混血司法用不純正廣東話：「你做乜撚嘢，賭錢就賭錢你嚟表演？信撚信我拉鳩你啊？」

黃黑狗淡淡然回頭一看：「屌你老味，你個半唐番拉我乜撚嘢？澳門街唔俾人賭錢大聲，我係要叫吹撚得我脹！」混血司法即時猛力地拿著 黃黑狗的西裝外套一抽，把黃黑狗抽出來。

此時； 閪波盛也企起來：「啦啦啦！呀Sir 唔使咁燥。客嚟㗎；有咩事慢慢傾，搞到啲客就唔好啦。」

混血司法：「客大撚晒？我做嘢唔洗你教。你係唔係想襲擊司法，我一槍打撚死你都得。」並且另一手按著 盛的臉一推向牆。

黃黑狗：「我唔撚信你開槍，屌你老味！」貴賓廳餘下所有人的光目都指向混血司法，混血司法猛力地推 黃黑狗按在牆上，伸手 黃黑狗褲袋中找他的身份證；並且逐一查閱黃黑狗的所有。

這時帳房中的池哥步出：「 Santo 乜嘢事咁勞氣，搞串晒大家點搵食，有乜事入嚟傾。」混血司法推 黃黑狗行至帳房門口正想進入帳房。

池哥：「 Santo Sir 唔係咁惡呀？帳房除了員工和司法，其他人不能來進。」

混血司法憤怒地望一望 黃黑狗並且喝令：「你呀 閪波盛！過嚟，你兩個係門口等我，閪波盛你個撚樣；揸住耳仔企喺度等。」閪波盛 沒有選擇下只好揸著自己的耳朵，站立在帳房門外。

混血司法伸手扭 閪波盛耳朵盛怒地：「你識唔撚識扭耳仔，你無撚讀書㗎？」閪波盛 被扭到頭臚搖晃不定，引起全場人都笑。混血司法自己一人走入了帳房。

揸住耳仔的 盛：「老闆你好彩，入到去帳房無人，條司法打死你都得。」

黃黑狗：「屌你老味，我好撚驚！」

盛 不憤地：「唔撚驚；你就唔好喺度等啊？唔走先？」

黃黑狗：「我身份證係佢度啊，戇鳩仔！」

此時另一高級葡萄牙藉司法到來，敲敲帳房的，帳房中的池哥；及司法出來。池哥：「冇事啦！冇事啦！誤會一場，大家繼續玩。」司法退回所有證件給 黃黑狗就離開了，黃黑狗亦憤怒地唸唸有詞離開了，貴賓廳即時回覆熱血沸騰的場面。

池哥對 閪波盛：「喂！你流晒鼻血，快啲去洗個面。今晚你得罪了Santo，快啲去搵你老闆，叫你老闆同 Santo 拆掂佢，以後你開工，條癲狗都嚟搞你就麻煩。」

盛：「係喎！好啊！我洗個面先，出去打電話俾老闆通知佢老人家。」盛 就去了貴賓廳外洗手間洗臉，洗手間洗臉時遇上他追隨的黑幫大佬同門兄弟 姑爺偉。姑爺偉名符其實一張瓜子臉白裡透紅、唇紅齒白，衣着及談吐斯文有禮，不似一個行走江湖的古惑仔，姑爺偉也是正在洗手。

姑爺偉：「嘩！盛仔，做乜嘢咁大鑊爆曬光？」

盛：「唔好提黑過墨汁，轉頭出去打電話俾老闆。」偉 跟盛一同離開洗手間正想步出賭場時。

偉：「盛 做咩呀你？出去帶埋籌碼？我幫你揸住先，掉頭過嚟搵我。」

盛 慌惶地：「呀！係喎！唔該晒！」盛 就行出賭場，到了酒店大堂側電話亭前之際，大堂遇上池哥幾名手下跟 黃黑狗正在聊天。

盛：「老闆唔好意思，撞啱司法出隊！下次再贏過。」

黃黑狗：「關你撚事咩！戇鳩仔！」

池手下：「得啦！我哋攞張船票車老闆走；你自己都小心。」

盛 只好繼續茫茫然走到電話亭前拿起電話，投入一元後撥電話上的轉輪後：「老闆，今日司法出隊，我同條叫 Santo 頂咗兩句，喂！你見到佢時幫吓手傾吓，如果唔係佢次次出隊都嚟搞我，我都唔知點開工！」

老闆 安仔：「屌！你估你係崩牙駒咩？開工啦仆街！」安仔就掛上電話。

盛 只好意興闌珊回到賭場，途中已再不見 黃黑狗。走回賭場更找不到暫時保管籌碼的 姑爺偉，手提袋中的 250,000 籌碼已經不翼而飛。此刻 盛只有找 池哥幫忙了解自己應該如何辦 ?可是也不見，貴賓廳各人都埋頭苦幹自己的投注。來回只是相差不足十分鐘，忽然間所有人和環境都與 盛都陌生起來，彷彿走到另一時空，滴著汗兩唇發白的 盛已不知如，只好再次致電 安仔。

三個多小時後的香港；元朗偏遠的一幢豪華大宅。剛停下一輛紅色的士，車資顯示是三百多元，客人二話不說就給了五百元車資，不用找續就下了車，這幢豪華大宅原來是 黃黑狗的大宅。下車的 黃黑狗沒有即時開門回家，他卻行到草叢側；拉開褲鍊就地散尿，一邊散尿、一邊哼著歌，應該是一首日語童謠 桃太郎。黃黑狗 拉回褲子時未來得及轉身，突然有三個人沖出來，其中一個拿着麻包袋，在 黃黑狗後方從頭一套，就把他拐帶到一輛貨車中，與三名綁匪瞬間驅車絕塵而去。