2020-03-23|閱讀時間 ‧ 約 12 分鐘

〈我愛廣東話〉::或者藝術X或者革命::｜在在專欄

日本仔侵略，英國殖民地統治
我細書果陣時，教中文個老師，咬牙切齒咁樣講日本仔侵略中國，但係佢就從來冇批評過英國侵略同埋統治香港。殖民地統治底下，喺我讀果間學校，英文係學習主要語言，絕大部份科目都用英文學習。唔單止係咁，我地開學校早會重要唱英國國歌：上帝保佑女王。當年就算唔識分析都知道要用英文上堂，要唱 God Save the Queen 都係因為香港係英國殖民地。當然慢慢先至學識語言同埋權力嘅關係。

澳洲原著民，世界反殖民運動
之後去澳洲讀大學。佢地當年都係唱 God Save the Queen。澳洲係白人同埋英文嘅世界。係澳洲見到甚至認識咗一啲原著民，讀咗一啲關於佢地嘅歷史，佢地俾白人殘害，佢地嘅土地俾白人侵佔，婦女俾白人強姦… 白人用有天花菌的被毯令到佢地惹到天花，啲原住民完全冇抵抗力，死咗唔知幾多人。白人更加夾硬將原住民嘅仔女同佢地同父母分離，俾一啲由教會主辦嘅機構同埋營舍托管教養，果啲細路要學英文基督教聖經同埋白人嘅文化！呢啲細路大咗之後只會講英文，更加冇咗佢地原本嘅文化。

當然當年澳洲嘅原住民有零星反抗，佢地話唔要 assimilation（同化），要 integration（融入），佢地開始有爭取原住民擁有祖先領地嘅權利運動。原住民爭取各種權利嘅運動，美國嘅原住民更加積極。再放眼果陣時亞洲非洲已經進行咗二三十年，而且唔少地方成為咗獨立國家。不過好多前英國殖民地獨立之後，英文繼續成為官方語文。印度、巴基斯坦、馬來西亞、肯亞、烏干達、尼日利亞… 殖民地時代英國人係統治者，英文係統治者嘅語言，要係殖民地社會力爭上游飛黃騰達，無論做生意做英國人嘅買辦你都要識英文，識講英文，識寫英文，你就可以揾到錢同埋掌握權力。係香港呢個英國殖民地亦都係一樣，你要係英國殖民地呢個制度往上爬，基本上要識英文學好英文。所以當年許多父母，或者佢地係中國大陸逃落嚟香港，又或者佢地唔鍾意中國大陸嘅制度，都想佢地啲仔女讀英文學校（即係個啲所有科目，除咗中文，都要用英文教，英文學嘅學校！）當然呢啲教育，我地叫佢做殖民地教育、奴化教育！

香港中文運動
七十年代初我地攪中文運動要求中文成為法定語文：果陣時好多政府文件冇中譯，法律條文都用英文，政府通知告示，間中有翻譯，但係都以英文為準。一啲老人家要去郵局寄野返大陸救濟親戚都要填張英文表格講清楚郵寄物品係乜野。

中文運動當然係一個有關權力概運動。記得中文運動當年吸引咗好多中學生参加：有啲英文中學嘅校長就叫中文老師係早會度講，叫啲學生千祈唔好参加。

而果陣時有個義大利年青女記者，我已經唔記得佢個名，但佢果張報纸好有名，叫做 Lotta Continua 繼續鬬爭，係份幾激進嘅報紙。個女記者問我：「你地爭取中文法定，爭取嘅係唔係普通話？」我話唔係，我地係要講廣東話。佢跟住問：「咁你地係唔係要攪香港獨立？或者廣東省獨立？」佢咁問我覺得有小小奇怪。當然我地反英反對英殖民主義，實在好明顯，不過香港獨立冇深刻咁考慮過。香港唔似得新加坡，有馬來西亞要踢佢出馬來西亞聯邦。中國唔會踢走香港。兼且對我地嚟講，香港係中國革命嘅飛彈發射台。

中文運動唔算係一個好成功嘅運動。最後爭取到嘅係政府係公事上多啲用中文。

語文運動，孟加拉獨立運動
支持語文運動俾人覺得有搞獨立之嫌，都係難怪嘅。中文運動沉寂咗冇幾耐之後出現咗孟加拉獨立運動，呢個獨立運動，好明顯係同語文有關。孟加拉獨立運動係一九七一年，當期時住係東巴基斯坦嘅孟加拉人（佔東巴人口百分之九十八）要求脫離巴基斯坦成立孟加拉國。不過孟加拉人嘅獨立意識早在佢地爭取孟加拉語成為法定語文嘅時候續漸形成。

係一九四七年，巴基斯坦脫離英國統治立國。巴基斯坦國分東西兩邊，相隔18,000里。兩邊嘅民眾，雖然都信奉回教但係兩地嘅人就有極大嘅文化差異。東巴人講孟加拉話，西巴人講烏都語，西巴人擁有政治權力，將烏都當做國語，迫東巴人用烏都語，又將東巴嘅資源掠奪運返去西巴基斯坦，當正東巴係殖民地。不過東巴嘅孟加拉人爭取運用孟加拉話嘅權利，學生係1952年2月21日保衛母語遊行，遭到鎮壓，有七名學生被槍殺。不過喺1954年5月9日孟加拉語終於成為東巴基斯坦其中之一個法定語文。但係孟加拉人經過爭取母語運動，仍然繼續遭受殖民主義式嘅統治同埋剝削，民族意識日漸高漲，結果孟加拉人起義，遭到西巴基斯坦極殘酷嘅鎮壓（西巴基斯坦軍隊一共屠殺咗二百多萬孟加拉人），當年中國共產黨害怕孟加拉獨立運動會鼓勵西藏人、維吾爾人爭取獨立，所以中共一直為巴基斯坦軍隊提供武器同埋搖旗吶喊。

港獨，保衛釣魚台運動

孟加拉獨立並冇鼓勵港獨。相反差不多同時發生嘅保衛釣魚台運動令到香港不少年青人／學生開始認同自己係中國人。美（國）日（本）私相授受我國領土釣魚臺係好民族主義，好認同中國嘅口號，而面對日本，面對美國，反對聲音叫得較為響亮嘅當然係共產黨而唔係國民黨，所以大部份參與運動嘅大學生都俾北京政權統咗去。當時有另外一啲人認為保釣係要反對美日帝國主義而在香港保釣亦都要同時反對殖民主義！不過前者在大學校園嘅影嚮力較大，故此大學啲學生會學生報都大部份認同中國大陸共產黨嘅政權。至於釣魚臺係屬於魚、海龜和飛鳥嘅講法都係好多年之後先至聽到。

當年香港的英文報章【China Mail】剪報::: 報導1971年5月4號在香港的保護釣魚臺運動示威::: 右下圖中被補者就是當年的莫昭如:::

[ 警方第一次採用即影即有相機拍攝疑犯容貌。
中國郵報評論警方用即影即有相機拍攝被捕人士的相。]
- Extract From China Mail dated 5th May, 1971 -

編注：The China Mail 又名《中國郵報》／《德臣西報》（1845–1974）是香港發行時間最長、影響力最大的英文報紙

當年大學生認同中國擁抱共產黨，佢地「認中關社」（認識中國關心社會），讀毛選，唱紅歌，着白恤衫藍長褲白飯魚，當然少唔得學習普通話簡體字。坦白講學普通話簡體字唔係問題，認識中國亦唔係問題，只係佢地將《人民日報》、《紅旗》、《求是》呢啲消息同埋資料當做真理就眞係大問題。不過最後毛澤東死，之後四人幫倒台，呢班人就跌咗一跤，有人就如夢初醒知道俾人呃咗，但亦有啲人立即轉軑，跟住新嘅領導。當然十幾年之後，89年嘅民主運動，又令到一啲人再跌一跤，不過只要你緊跟當權者與及識得講當權者嘅語言，你就會得到好處。