蟲

住喺陳宿，我學識咗同昆蟲相處嘅模式。

Year1個年做蛇，住過宜孫嘅宿。嗰陣成日會係pantry同廁所嘅洗手盤見到蟲。第一次見到可能會覺得好唔乾淨。宜孫成棟嘢都係喺山上面，ummm應該話成個中大都係一座山，有啲大自然嘅小生命係應該嘅。

Year2就住喺陳宿，我已經唔係蛇啦，不過因為我係wait list入宿嘅，收到書院通知個一下就火速將所有嘢由本身屈組仔個間房搬入我陳宿嘅房。所有嘢都好突然，包括P竟然係住我隔離房，我就用師兄嘅身份強行要同P嘅室友換房，於是就好順理成章咁同P做咗一年（其實得三個月多啲⋯⋯）嘅室友。

成件事好奇妙，緣份嘅嘢真係好難預計到，但更加奇妙嘅事就係，我哋竟然無炸蟲⋯⋯

其實本來好哋哋嘅，九月十月基本上我得瞓覺嗰陣會係自己房，其他時候都係去咗人哋房玩。十一月就二橋，一直去到sem2先入房宿。新年假之後就因為武肺又閂宿，好似一直去到二月先返到宿舍。我本來就唔太想住係屋企，所以就一路住係宿，即使係宿陪我玩嘅人唔多。

所以如果要數我真係喺留係自己房嘅話，大概係二三月嗰段時間先開始。春天一到，無炸蟲嘅問題終於浮現。唔清楚係咪因為宿舍得返好少人住，昆蟲就可以肆無忌憚咁自由活動。基本上仼何空間你都可以見到蟲嘅踪影，走廊有、廁所有、Pantry有、𨋢有、樓梯有、房都有。

我聽大家成日話陳宿係昆蟲博物館，我會話陳宿六樓個廁所直程係一個熱帶雨林，啲蟲真係多得太誇張，而且仲有唔怕人，你可以勁近距離欣賞佢哋嘅生活。（嘔）

每次沖涼我都係揀用右排中間嗰一格，我覺得嗰一格嘅水溫啱啱好，唔會話有冰火浴嘅情況，而且佢有足夠嘅鈎俾我掛衫。（試過啲乾淨衫或者抹身毛巾飛落地下攤水度嘅人就會明我講話）

六樓住嘅人唔多，每次去洗澡前行入淋浴間嘅時候，浴簾都係拉埋晒嘅。打開浴簾就好似細個用硬幣玩刮刮卡一樣，睇吓拉開浴簾之後可以見到點樣嘅蟲。有時候我已經唔識分邊啲係蟲，總之我見到牆上面有黑色一點，我就係用花灑去沖佢。

好記得有幾日我用開嗰間淋浴間突然間無咩蟲，有嘅都係啲斷咗嘅翼或者小昆蟲嘅屍體，用水輕輕沖走就可以行入去。沖涼係我嘅個人時間，企係呢個小小嘅空間入面，聽著花灑嘅水聲，好適合思考人生。（錯誤示範請珍惜食水）

我好見到有一隻啡黑色嘅飛蛾停咗係頭頂上面類似排氣管咁嘅物體度。我望住佢，佢背對住我，用佢對翼上面兩隻白色嘅眼回望我。

我一度以為佢已經死咗，但後來又見到佢對翼微弱咁震動緊。熱水冒出嚟嘅水氣向上飄。朦朧之間，我好似見到牠佢對翼啲花紋對我眨眼咁，一時有兩隻眼睛，一時又好似有四隻眼睛。

有時我去廁所刷牙嘅時候，間中都會見到兩隻眼睛嘅佢靜靜哋伏係窗台度遙遠咁觀察我。去廁所嘅時候就唔一定見到佢，但沖涼嘅時候就總係會見到佢，一如既往咁停喺排氣管上面。

我每日沖涼嘅時間都唔固定，心血來潮就會去洗。佢同我就好似有心靈感應咁，知道我要去沖涼個陣，就會飛去個排氣管上面等我。

之後幾日佢都陪住我沖涼。明明我哋都住喺同一個空間，但就好似享受緊獨自嘅時間咁。

又有一日落咗場暴雨，我去廁所嘅時候無意中見到一個內地宿生喺我常用嘅淋浴間洗緊佢對波鞋，亦都順便沖走埋牆上面大大小小嘅昆蟲。

嗰晚沖涼嘅時候，我就無再見到佢停喺排氣管度啦。沖完涼之後，我仲突登喺廁所兜咗個圈去搵佢。會唔會喺窗台上面？會唔會喺鏡上面？會唔會喺隔離嘅排氣管上面？都無。佢就咁樣喺呢個雨夜都消失咗。

唔知點解我個心會一種好唔舒服嘅感覺，唔識得形容。但我會覺得佢既然有對翼，就唔應該困喺呢個小小嘅地方。佢一定係飛咗去某個更好嘅地方！但我仲係會掛住曾經同佢每日咁樣渡過嘅十五分鐘，淨係得水聲嘅呢十五分鐘。

後記：呢篇係舊文。我重新改過一啲字眼，同埋口語化咗佢。睇翻自己一年前寫嘅嘢都係一件有趣嘅事。哈哈。順帶一提，雖然陳蟲真係好多蟲，但我真係好享受住陳宿嘅日子！