今日打完拳之後，A話不如去機舖，我拒絕咗。我同A講，我比較鍾意打鼓，太鼓之達人個種。
打鼓真係好好玩。細細個好鍾意玩NDS嘅打鼓，我覺得用手指去敲個螢幕咁樣玩先好玩，但係就無真係試過係機舖攞住鼓棍打。我成日都話打太鼓就好似我嘅人生咁。我哋係降世之前係可以選擇難度嘅，就好似玩太鼓可以揀梅竹松咁。我嘅靈魂一定係揀咗魔鬼模式，然後無鬼用嘅我就Miss晒一個一個音符（唉好頹）。
我真係覺得自己經歷咗好多苦難（自己講），例如我年紀輕輕就有風濕，一到梅雨季節就會抱怨：我仲未開始做打工狗，咁我日後點算⋯⋯我會將一切歸咎於我太懶：有得坐我唔會企，有得瞓我唔會坐，對運動嘅熱愛係零，因為真係好攰，第二日瞓醒又周身痛，煩。我每日都同自己講「我要做運動」，但基本上都係得個講字，人懶真係無辦法。
好啦其實講咗好多廢話，打鼓同打拳嘅共同點得個「打」字，而家入正題。
好多人問我點解我會無啦啦就去打拳。我承認係因為恆仔、明禎、周爸爸同nonkul拍嘅個套《一秒拳王》，成套戲熱血到我唔知痴咗邊條筋就走咗去打拳⋯⋯就係咁就踏上咗打拳嘅旅程。
打拳嘅話其實有三分一時間係打個沙包，三分一時間係做體適能，三分一時間係同教練或者其他人對打。可能我平時真係少接觸運動，中學時間最積極參與嘅已經係閃避球（多謝康師傅）。我好少好少可以體會到做運動嘅個種快感。老實講學咗四五個月左右，仲係好新手好多基本動作都做唔好，每次打完都係周身痛，亦都唔會好有成功感或者紓壓嘅感覺。對我嚟講，打拳俾到我最大嘅感覺就係我好清楚自己係「仲生存緊」。ok我知成件事聽落去好荒謬，但每次對打我都會提自己要手高手高，就算無力出拳我都要用靠對手擋住做防守。對打完會有45秒嘅break，而呢45秒可以話係我最肯定自己仲生存緊嘅時間，係真係可以感受到你嘅所有細胞都好熱血沸騰，攰到一個極限但都係要盡量俾自己放鬆、休息。
好啦，雖然係咁，但我都係打得好廢，仲成日偷懶hea打。但我真係好珍惜每一次嘅對打（因為我俾咗錢），有時會學習一下人哋係點樣出拳、點樣用手擋踢腳、點樣預測人哋下一個動作。就算勁廢成日要人哋讓我，但我開始覺得自己有認真去做呢件事，連「大兵步操」都第一個foul嘅我都可以有咁嘅一日。
好感謝個日突然之間想打拳嘅自己，人生真係好難得會有呢啲想做就做嘅機會。雖然無咩體型上嘅變化（sad），但我真心有覺得自己精神咗，有力咗。無論點都好，我而家好清楚明白做運動係真係對自己好嘅一件事。A最近話佢決定唔再打拳，如果係以前嘅我我一定會話「哦咁我都唔打啦拜拜。」但我竟然有一秒去諗「我仲打唔打好」、「會唔會有人想同我一齊打」⋯⋯
人真係會變。真嘅。
