燈

A可以話係一個完全同世界脫節嘅人。A唔知道邊個係姜濤，以為連登係「蓮燈」（蓮花寶燈個種，you know）。雖然係咁，A嘅燈力真係可以媲美連登各大燈神，係一盞名副其實嘅蓮花寶燈。

最靈驗嘅燈力可以係打LOL個陣體現到：一場三路都順風嘅局可以因為A嘅一句「輕鬆贏啦今場」俾對面唔知點解一波直接帶走，而且打積分個陣效果翻倍。所以我哋都會希望A少講為妙。

其實遊戲輸贏就真係唔緊要，體育精神先係最重要。但係，A呢排開始為我嘅人生送上唔同嘅祝福：

「你畢到業我咪嚟（photo day同你影相）囉。」

⋯⋯？咁係咪姐係我畢唔到業啦？

當然啦其實完全係講笑咁講。我咁大人有大量又點會咁care呢啲朋友之間嘅玩笑呢。唔知係咪身邊總會有一個咁樣燈力十足嘅人，正所謂「燈死好過撐人」，就同我嘅GPA一樣，每次都係越期待就越失望。覺得自己會炒車嘅course就真係炒晒車（唉）。GPA有時都係整定嘅，就好似你叻唔叻係天生咁，要就重新刷過首抽啦（講笑）。反而係一啲無關痛癢嘅事就極容易出事：快啲衝去校巴站and追唔到校巴、一個人咁咪食譚仔and A飛都要排長龍、好想發洩and post錯close friend list⋯⋯我以後一定唔會再用「一定」呢個字。人生真係好難捉摸，我都好想好想燈吓人，燈吓自己。