講起著衫嘅話，我最近發生咗一件咁樣嘅事。
有日同朋友食完飯返屋企。門口擺咗袋嘢，係用屋邨每個月都會定期派嘅個種白色大型垃圾袋裝住嘅一袋嘢。
「返得嚟啱啦順便拎去垃圾房揼咗佢啦。」
其實有眼嘅人應該都會見到。屋企人用個垃圾袋裝起咗我一堆大學嘅tshirt。我覺得大學嘅tee對我嚟講好重要，雖然有唔少都係人夾人Jam返嚟，但at least佢哋都係代表著我嘅一個身份、一個大學入面嘅重要階段。我衣櫃其中一格就專係用嚟放呢啲頹tee，有時係屋企就會著，隨便落街買返飯都會著，冬天出街出面會加件外套嘅時候，入面都可以著頹tee。每次開衣櫃見到呢啲頹tee都會諗起：啊！呢件係我year1嘅細o衫。呢件就係我oweek做爸媽嘅衫。當然，好多件其實基本上都唔會再著，但唔著唔等於我要揼晒佢哋。
「點解？」我問。
「你知唔知你著呢啲衫會犯國安法？有啲黑色有啲又黃色，又寫晒標語，件衫後面又有條龍。」
「你唔好唔聽大人講嘅說話。」佢見到我想「博嘴」，所以早過我開口收我聲。其實每次都係咁樣，基本上我係無得解釋。有嘅話，解釋完佢都會我講嘅係「無聊嘅借口」。
最後啲衫當然無揼到，我都絕對唔會俾呢件事發生。但我都應承咗以後唔再著呢啲咁「敏感」嘅衫。
今日我同咗W講呢件事，W問我屋企人係咪唔識字。我屋企人緊係識字啦。我再認真思考吓，諗嚟諗起都覺得係屋企人對某啲時事太一知半解，或者係佢哋接收嘅個啲資訊太偏面。好多時候佢哋會覺得大學入面就係有好多亂港份子，上上吓堂會突然之間有人拎啲燃燒彈出嚟咁樣。又有一次試過問我有冇試過蝦大陸人。我俾佢哋蝦就真（成績上、資源上、文化上）。哈哈⋯⋯理所當然地，佢哋都會覺得呢啲tee寫晒禁語，要一出街就會犯法。
講起著衫，最近就有球衣風波呢件事，我幾肯定屋企人係因為呢件事所以決定要揼晒我啲衫。有時候就係好無語，我唔係專業人士，著緊衫都唔需要政府授權。我真係諗嚟諗去都唔明白點解會想揼晒我啲頹tee。
算啦，我都唔需要諗。咁樣仲好，反正好多朋友成日片我著頹tee出去食飯好唔respect，而家連頹tee都唔著得，咁就以後都唔會再有呢個情況出現。你話係咪啊哈姆太郎。
