有錢就有關係，冇錢就正契弟。有銀行整左個名目叫Relationship Fee，係啲客嘅銀包度挖呀挖呀挖，每年挖返幾萬銀服務費
1） 環球市況近兩年都相對波動，中港股市表現更加要用「曳」字形容。同一時間美國就狂加息，聯邦基準利率已經去到5%至5.25%。
2） 息口咁高，做定期存款好著數，無風無浪咁賺4、5厘息，所以好多人都唔想搞太多花臣，泊晒啲錢落定存收息算數。銀行就無啖好食，特別係平時靠賣投資產品賺錢私人銀行。
3） 你印印腳收息，銀行就想辦法係你大大個銀包裡面挖呀挖呀挖，希望能挖返少少出嚟幫補下。
4） 好似有間係香港都好出名、來自瑞士嘅一間好大好大嘅銀行，佢地嘅財富管理部門今年引入咗個新收費，叫做「Account administration – Relationship Fee」。點解要收？因為佢幫你管理財富囉，銀行話「Relationship fee supporting the delivery of a holistic wealth management solution.」
5） 依個Relationship Fee收費係咁既，以佢地新加坡分行為例，（點解用新加坡？因為好多有錢人都會喺新加坡開戶，同埋我手頭上入收費表喺佢地新加坡啲branch），客戶資產唔喺放係新加坡就每半年收5000美元，客戶資產放係新加坡就每半年收5400美元。不過，依個收費好似信用卡年費咁有得waive嘅，但條件就係要有至少200萬美元投資係投資基金、私人市場基金、結構性產品，或者全權委託投資。
6） 簡單啲講，個客想將200萬美元放晒做定期，就無得waive，賺完息唔該嘔返少少出嚟。聽聞有啲有良心嘅客戶關係經理（RM），都叫啲唔想買products嘅客轉會去第二間私人銀行，好過比銀行硬挖Relationship Fee。
7） 其實唔少銀行都有類似收費，但大多會計埋存款，資產總額低過某一水平就會收費。
銀行都不無道理，平時要搵班RM貼身照顧班客，時不時又要斟茶灌水，全部都係錢，今次都係收返少少幫補下。
