順利佮人講話是無簡單的代誌

我的小弟中風一年外，是出血型中風，傷著的是倒爿 pîng的頭腦，邏輯、語言等等，逐禮拜去病院做復健幾若擺，嘛有請來厝內做，我一禮拜去恁兜一擺，佮伊同齊做一寡仔認知、講話、唸字、寫字的練習。

我想著的代誌攏共試看覓，譬喻講：自１唸到100、奇數、雙數，數字會曉加做伙無？會曉算豆仔無？三角形、圓形……會曉認無？物仔認有無？柑仔、鬧鐘仔、相片……攏提出來予伊講……

伊的語言治療師、弟婦仔發現的佮我試出來的，伊上大的問題是，想欲講的話，揣無正確的字詞來講，講袂出來，抑是講毋著，有當時仔問伊的時陣，伊講袂出來，用手佇桌頂寫，我就趕緊提筆佮紙予伊寫，寫出來是著的。

伊頭腦內面的想法無法度講出來，無知影伊佇想啥物？干焦會曉應「愛」、「無愛」，「是」、「毋是」，「對」、「毋對」。弟婦仔發現用寫的較準，共欲問伊的問題寫佇紙上，下面閣寫「要」、「不要」，「喜歡」、「不喜歡」，「咖哩飯」、「牛肉麵」予伊用筆勾。

拄開始，我逐擺攏問：「你叫什麼名字？」「我的名字是什麼？」伊定定講毋著，共所有兄弟仔的名講幾若遍，才講著，最近有進步，較緊講著。

猶閣有，伊講毋著的時，我的手指頭仔指著伊的胸坎：「你的名字？」伊綴我講：「你的名字。」喔！方向分袂清楚。咱講的話，有的是問句，有的是愛伊綴我講仝款的內容，遮仔無仝款的話型，咱平常時仔佇講，攏無發覺，拄著講話、表達有問題的人才知影，對方聽捌我講的意思，會曉應著，各種講法講輾轉的人是誠無簡單的代誌，會使按呢講話佮聽話順利的人攏是幸福的。