【劍擊場外的願望 奧運獎牌得主的「美國夢」】
2021/01/15閱讀時間約 1 分鐘
形象健康、規律訓練、為國爭光，係不少人對運動員嘅既有形象。不過，今時今日打得好識攞獎唔夠架，點先啱？原來運動員仲要識「發聲」！
世界古靈精怪，做運動員好難獨善其身，如果只係活喺自己個「運動Bubble」入面，就會被人稱為「離地」。作為一個出色嘅運動員，難免會影響到新一輩嘅運動員，除咗比賽場上要做得好，比賽以外都要做榜樣，美國嘅花劍手Race Imboden就係最佳例子。
美國今年因黑人被射殺而觸發多次反歧視示威，9月喺紐約有一場遊行，紀念黑人女子Breonna Taylor被殺半年，Race Imboden亦都有參與。追求公義，挺身而出，不只發聲，Race Imboden更希望以佢自己嘅身份改變世界，「如今世界上有好多唔同嘅聲音，每一把聲音都希望成為最響亮嘅一把，我唔希望咁樣，我希望以我嘅能力、聲音，為呢個世界帶來一點改變，但我明白唔容易做到。」
要發聲，其實唔難，只要喺IG或者FB打兩隻字出個Post，就係咁簡單。不過，對於「發聲」呢一件事，外界當然有唔同睇法，例如「做運動員就專心做運動員啦」、「唔好攞光環啦」等等，相信大家求其都講到一堆。
作為一名白人運動員，Race Imboden公開為種族歧視發聲，當然面對「抽水」等評語，Race依然堅決，繼續為自己認為啱嘅事而努力，「好多人唔相信我，覺得我扮晒嘢，我唔會理會呢啲說話，我會繼續堅持做我認為對的事，將平權呢個信息傳播出去。」
Race Imboden一直都敢於發聲，上年喺秘魯利馬舉行嘅泛太平洋運動會，Race Imboden個人收穫一金一銅，而當佢同隊友喺頒獎台最高一格領獎奏國歌時，佢選擇單膝倒地，為引起公眾對美國國內歧視及槍械管制等問題發聲，希望略盡綿力改變世界。
留言0
查看全部