是咁的。琴晚一路開住YOUTUBE做嘢一路睇美股，突然之間聽到游學修把聲「你話個機會率係等於零即係講緊你叫個年輕人去死，咁我唔明你每日喺度講咁多嘢嚟做咩。」聞到花生味CLICK嚟睇下咩事，先知原來游學修自己話佢入咗蕭生嘅CLUBHOUSE，然後聽到蕭生話香港電影已死。
根據游學修所講，蕭若元係覺得Youtube 片，年輕人自己用嚟打飛機就算，唔好諗住可以同以前嘅電視電影相比，佢亦斷言香港電影業都無可能返返去以前嘅輝煌，個機會率係等於零，因為香港再做唔到下一個周星馳下一個周潤發出嚟; 蕭若元話，周星馳周潤發呢啲嘅成功，係以前好多嘅嘢加起來嘅成果，唔係而家啲網片而家嘅制作可以製造出嚟嘅，等等。
而游學修覺得，即使香港可能真係唔會再拍得返好似八十年代嗰種，幾億成本、一隊幾千人CREW嘅大制作，無咗以前80年代木人巷嘅模式，亦都可能無另一個嘅周星馳周潤發，但你唔知會唔會有下一個天王巨星; 遊學修話，正因為時代不斷咁變緊，有網絡嘅出現，佢喺當中見到個機會同可能性喺度，而正因為上一代無能力去做去嘗試新嘅嘢，所以佢先攪試當真，嘗試令到香港嘅電影業可以延續落去。
我覺得蕭若元呢樣人嘅睇法，其實同我好耐之前講過嘅嗰啲「以前我哋一個人返三份工，靠自己捱過啲困難，而家啲後生仔唔捱得郁啲就自殺」好似。
嗰啲得利益者，不過就係幸運坐上了80年代英治時期香港經濟起飛嘅順風車，憑咩嘢企喺道德高地度指責年輕人? 香港係真係出唔返另一個周星馳另一個周潤發。但係我想問嘅係，邊個需要另一個周星馳周潤發嘅復制人? 而喺周星馳周潤發未出現之前，又係邊個喺度帶領緊個潮流?
19世紀初，粵劇還處於巔峰時期，任白、南海十三郎、唐滌生、帝女花、再世紅梅記、等等係真係皆知巷聞，結果去到70年代初，就因為經濟急速發展，市民的娛樂活動選擇愈來愈多、以及粵劇戲曲的劇本文字、動作與現實生活脫節等原因而日漸式微; 即使而家好多嘅人出嚟「保育」出嚟推廣粵劇文化都好，都改變唔到粵劇已經不再是流行文化嘅事實。
時代會變，王晶拍賭神賭聖嗰期，的確係創造咗歷史; 王百鳴拍家有禧事嗰期，的確係經典; 李力持拍周星馳<食神>、<喜劇之王>，無錯係神作。
但咁又點?
而家嘅王晶王百鳴，已經畀人話係 「炒冷飯」、「食老本」、「令人睇到尷尬癌發作」; 李力持呢? 佢而家已經係一個活脫脫嘅死廢老，唯一可以畀佢喺中国拎嚟呃飯食嘅，就係以前曾經拍出過食神、喜劇之王。年輕人對佢嘅印象，除咗佢係個支持香港警察打死年輕人嘅典型藍絲思維外，就只剩低佢喺FB 想買相機問價結果畀店主覆佢「唔賣畀你呀撚樣」、同埋盧覓雪告佢誹謗贏咗然後佢潛咗水。
呢啲喺80年代紅極一時、可能曾經被稱為「鬼才」嘅人，已經喺香港淪為江郎才盡、同時代脫節嘅奶共廢老。我哋仲需要佢哋嘅2.0版本嚟做咩?
要復刻返80年代嘅模式，就等於搵新人去「翻拍經典」。結果就係舊酒新瓶，永遠會有人覺得以前嘅更好; 既然如此，為什麼還需要去翻拍「毀經典」，而不是用新的元素去嘗試能不能拍出另一個經典?
時代不斷進步，我哋唔需要墨守成規行返以前嘅路，唔需要另一個周星馳周潤發; 正如樂壇，我哋都唔需要另一個梅艷芳另一個張國榮。
我們需要嘅係，由我哋嘅年輕人努力去製造的，另一個令香港人驕傲的超級巨星，去創造另一個屬於我們這一代人的傳奇。
而呢樣嘢，好似蕭若元呢啲被時代淘汰嘅老屎忽，係永遠都唔會明白嘅。
補返條片:
https://www.youtube.com/watch?v=nqC7j0ynGEo&t=539s
https://www.youtube.com/watch?v=np6O77W3Ado
PS: 希望試當真繼續加油，都希望如果可以，就課金支持一下佢哋(同埋我??)
