風劫－第二葩
更新於 發佈於 閱讀時間約 14 分鐘
康四海四、五歲的時，伊的父母相連紲來過身，無依無倚的伊，為著生活只好行上街路來討分，算起來天嘛有咧照顧，伊拄著一个老乞食。
這个老乞食看康四海遐細漢，就將伊當做家己的囡仔來疼惜，共做乞食的鋩角攏教予伊知，希望伊佇江湖袂夆欺負，會使平安大漢。
老乞食對康四海的人品非常重視，不時就教伊做人的道理，愛重義惜情守信用，對人愛誠懇，愛知影食果子拜樹頭，尤其是守信用佮飲水思源這兩件代誌，更加是老乞食愛伊囥咧心內。
康四海漸漸大漢，老乞食心心念念向望伊會當脫離共人討分的日子，所以老乞食定定就共討分著的錢儉起來，希望有一工會使予伊去讀冊，可惜天無順人意。
康四海十三歲的時，老乞食重病，伊咧欲斷氣進前，共康四海講：「愛會記得，冗早離開共人討分的生活……愛做一个守信用的人……袂使背骨……」
老乞食的遺言，康四海毋敢放袂記，一直囥咧心內。
時間過甲真緊，康四海也大漢矣，仝款咧做乞食，見擺想著老乞食的遺言，心內就袂輕鬆，就算按呢，青盲牛一隻，嘛想無辦法脫開這種生活，只好一工過一工。
康四海三十歲彼年的冬天，某一个暗暝，伊睏佇安平城外一間破廟內。睏甲當時好，煞雄雄有人挵門入來，驚一下對塗跤趒起來，看著一个規身軀全血的人，正手閣攑一支予血染甲紅紅紅的劍。
康四海看伊敢若真忝，想欲問伊有啥代誌，閣驚惹禍上身，就徛佇柱仔後壁，看伊欲創啥。
彼个人目色利甲若伊手中的劍，一瞭就瞭著藏佇柱仔後的康四海。
「你！」劍客用手比康四海，「過來！」
康四海隨搖頭，目睭看向廟門。
「我愛睏，袂刣你，愛你鬥相共。」
康四海想起老乞食的教示，毋好清彩相信人，所致，無應聲，嘛無搖頭。
劍客看著按呢，雄雄共劍射向土地公的金尊，劍鋒直直插入土地公的腹肚。
「無劍矣，你免驚啦。」
康四海猶原毋敢倚過。
劍客輕輕哼一聲，微微仔笑一下，頭頕一下，感覺淡薄仔無奈，家己勻勻仔行去全是塗粉的案桌頭前坐落去。
「麻煩你一件代誌……」劍客越頭去看康四海，「共門關起來，我想欲好好睏一下……」
劍客講完就隨睏去，康四海心內咧想：「看伊身軀全血，毋知共人捙拚甲偌忝，伊叫我共門關起來，一定是無愛予人發現……」閣想落：「關門是小可代誌，如果追殺伊的人真正揣到位，伊身軀血流甲按呢，欲怎有可能活命？更加免講是我……」
一陣冷風吹入廟內，康四海雄雄起雞母皮。
「江湖的兄弟事，毋是我這種跤數會當插的，猶是門關關一下，緊來旋。」
康四海揹起加薦仔行出廟，欲關門時，看著劍客一个人倒佇塗跤，雖然這間廟有門有壁，窗仔煞攏毋知去佗，而且雙爿壁攏有一寡仔破空，鑿骨的冷風嘛是鑽會入去，尤其劍客身受重傷，就算是練武的人，嘛袂堪得。
想到遮，康四海愈來愈感覺袂使放劍客一个佇遮睏，若是有一个失覺察，伊的心內較按怎就袂得過。
「恁娘咧，欲過年矣，才來拄著這款代誌，」康四海頭搖搖一下，「較早阿伯定講，莫做對不起家己良心的代誌，呵，若是我因為救人來死，按呢嘛是功德一件，後世應該免閣做乞食。」
康四海行入廟，共門關起來了後，隨抾一寡仔焦草漚柴來起火，無偌久，冷冷的破廟內，漸漸燒熱起來。
為著莫予火化去，康四海規暝攏毋敢瞌目，一直看顧彼葩火，看火淡薄仔變 細，就添一寡仔柴枝，真驚一下重耽，就會造成悲劇，到時欲哭都無目屎。
劍客熁著燒氣，愈睏愈入眠，愈鼾愈大聲，睏甲隔工中晝才精神。
目睭一下擘開，劍客看著康四海跔佇火堆邊仔，心內真意外：「昨暝看伊驚甲毋敢出來，想講伊等我睏去就會旋去，竟然猶閣留佇遮。」
康四海這時嘛發現劍客精神，隨倚過去問伊身軀頂的傷敢會疼。
劍客連笑幾若聲，無應。
康四海掠做是劍客疼甲頭殼歹去，心中一時浮上淡薄仔悲傷，坐佇伊邊仔。
「人講出外靠朋友，雖罔我毋是你的朋友，不而過……有緣來相拄，你若身軀會疼，我嘛會替你想辦法。」
「哈哈哈……」劍客共康四海相看，「你哪會一直講我身軀有傷會疼？」
「唉，你夆刣甲規身軀血……」
「哈哈哈……」劍客笑甲拍家己的大腿，「我夆刣甲規身軀全血……哈哈哈。」
看劍客笑甲歪腰，康四海愣佇遐，毋知欲講啥物才好。
「我共你講……」劍客輕輕哼一聲，「規台灣……毋著，是天下間有通共我刣甲流血流滴的人，一个已經死，一个猶袂出世，一个就是我！」
「一个已經死，一个猶袂出世，一个就是我……」康四海共劍客講的重講一遍，雄雄有一種夆裝痟的的感覺，「你莫佇遐激五仁矣。」
「講笑？」劍客哼一聲，「我講的是事實，我身上的血毋是我的，是予我刣死的人的。」
劍客的目睭透射出非常驕傲的光，康四海看一下，身軀袂輸夆釘牢著，毋敢閤講劍客是咧講耍笑。
「但是……我忝矣，足忝足忝……」劍客紲落講，「昨暗我攑一支劍，跳入一个拄對唐山調來府城的將軍怹兜，見著人就刣，毋管大細……」
康四海聽著按呢，目頭絚絚。
「我一直刣一直刣，刣甲遐的唐山人哀爸叫母、哭甲嘛嘛吼，彼一時我心中大暢，愈刣愈爽，無法度擋……」
劍客愈講，面色也愈激動，只不過康四海無了解，為啥物劍客欲按呢大開殺戒，刣死遐的唐山人。
「人講天朝神兵勇若牛猛若虎，結果彼个將軍袂輸龜仔囝，看我若再世呂布，無人會當阻擋，就包袱仔款款一下欲對後尾門旋。可惜恁爸趕到位，刣死伊四个守衛仔了後，一跤共蹔倒塗跤，攑劍就欲對心臟揬落時，雄雄有人喝聲！」
「啥？」
「伊的某囝。」劍客嘆一聲，「伊的某囝本底已經離開，因為煩惱伊，就按呢閣轉來揣伊。」
「所以……」
「我無停手，猶原一劍送伊上黃泉路……」劍客的眼神，雄雄變矣，「伊一下死，伊的某囝隨傱過來，怹某覆咧伊的屍體哭，伊的查某囝煞……」
「按怎？」
「直直共我拍，那哭那喝還我阿爹還我阿爹……」劍客輕輕哼一聲，笑聲透著淡薄仔悲傷，「彼時我第一改毋知嘛創，若是佇戰場，就算伊是囡仔，我嘛一劍劃落，不而過……面對彼个囡仔，我愣佇遐……」
「為啥物你會愣佇遐？」
「以早佇戰場刣人，抑是講比武刣人，從來袂去想，予我刣死的人，伊的親人知影伊死了後，會偌疼偌悲傷……」
劍客的眼神，一時，變甲空茫茫。
「後來咧？彼唐山將軍的某囝？」
「我仝款共怹刣死……」
「你……」康四海毋敢相信家己耳空聽著的，「拄才你毋是講……」
「囡仔的老母哭甲欲死欲活，越頭過來，共我睨，問我為啥物欲刣怹規家口仔大大細細。」劍客停一下仔，閣講落，「我講，唐山土地遐呢闊，猶閣袂滿足，透定想欲霸占人的家園，霸占了後，毋但無愛惜這片土地的人，閣四界共人糟蹋，濫殺無辜，按呢敢袂傷超過？」
康四海聽甲遮，劍客突然攑頭大笑。
「你笑啥物？」
「伊聽我講了後，伊那哭那大笑，唱講，王霸食弱國是天地大道，唐山人上千上萬，一支劍是會當創啥？」
「所以你氣一下就共伊刣死矣？」
劍客頕頭，彼雙空茫茫的烏仁，透染著淡薄仔哀傷，若像山頭罩霧，予人看著心情憂悶。
沉重的氣氛袂輸是蠟月的冷風，康四海真袂慣勢，看外口日頭光光光，想欲來去討分，拚一下仔經濟，伊欲徛起來的時，劍客一个眼神就捽來。
「你叫啥？幾歲？」
「……」這个問題實在真突然，拄才明明遐憂愁，這馬煞雄雄問這，康四海毋知是該笑還是該哭，佳哉較早老乞食捌講武林中人的個性攏真怪奇，伊的心頭才較著定，「我叫康四海，三十。」
「喔！我三十一，加你一歲。」
康四海一下聽，心內糾一下，毋敢相信劍客加伊一歲，因為劍客看起來敢若少年家。
「今仔日咱有緣熟似，不如就來結拜！」
猶袂舞清楚是啥情形，康四海連出聲的機會都無，劍客就紲落講。
「咱這馬就當土地公的面前結拜。」
話了，劍客就搝康四海跪佇土地公頭前，結拜做兄弟。
了後，劍客隨開喙，講一件改變康四海一生的代誌。
「自這馬我就是你的大兄，你就是我的小弟，做大兄就愛照顧小弟，所以我拍算共所有財產攏予你。」劍客看著康四海充滿懷疑的眼神，「當然這毋是白白予你，你必須照我的指示去做，按怎？」
毋管劍客財產偌濟，總嘛比康四海這馬較有，按怎想，總是接受較有利。閣想較真，接受了後，劍客若愛伊做歹失德的代誌，舞甲尾仔，錢佇庫房，人佇牢房，就算金山銀山，嘛是一場空。這款的人生，不如做乞食自由，康四海毋敢一聲就答應。
看著康四海的面色，劍客欲怎會毋知這箍的咧想啥。
「你驚我愛你去做歹代誌，著無？」看康四海頕頭，閣講，「我是愛你替我保守一个秘密爾爾。」
「啥秘密？」
「昨暝離開將軍府來到遮的路，彼个查某的話，一直佇心內轉踅，我愈想愈感覺，伊講的無毋著，焦我一支劍敢會當刣死所有的唐山仔，敢有法度改變江山換手的事實，一下想，我忝矣，足忝足忝……」劍客雙手揹佇腰，徛佇土地公頭前，攑頭看神，「尤其是昨暝，做了遐爾仔濟殺業，焦造成閣較濟的家破人亡的悲齣，對大局全無影響，我雄雄感覺真虧欠……」
「是因為唐山將軍的囡仔？」
「會使按呢講，所以我欲拜託你的代誌就是……」劍客旋身過來，「我想欲退出江湖，揣一个清淨的所在，唸經贖罪……」
「你愛我替你揣這个所在？」
「毋是。」
「無是？」
「這个所在我已經揣好矣，就佇關仔嶺遐。」
「關仔嶺！聽講遐全歹人，你有影欲去遐？」康四海閣說落，「閣有，既然你攏揣好，是欲拜託我啥貨？」
「歹人無比唐山兵惡質，我毋驚，而且我揣的所在真偏僻，無人會去，這免煩惱。」劍客绁落講，「我拜託你的代誌就是愛你去買彼塊地，因為若用我的名，我就無法度清心修行……」
「我知我知，所以予我去買，若是官府查起來，就袂查著你……」
劍客頕頭。
「等一下！」康四海目頭一下結，「我買地了後，無蹛佇遐，毋知會予官府來起憢疑無？」
「哈哈哈，這是加煩惱的，你就佇關仔嶺無偌遠的所在，閣買一塊地來起厝蹛就好矣。」
「啥！閣買一塊地？敢有遐濟錢？」
劍客微笑，無應話，隨共手䘼仔拆一塊落來，囥佇塗跤展開，閣共指頭仔咬破，用血水佇彼塊布頂懸寫兩字「免問」。
「水仙公廟遐附近，有一間元通錢莊，你共這提予頭人看。」劍客將寫有血字的布交予康四海，「你共頭人講，你是我風自我的結拜小弟，自這馬起我的財產交你發落。」
康四海接過這領血書，佇心內問家己，到底有啥資格接受風自我的財產。人講無功不受祿，伊並無做啥物對風自我有利的代誌，這款的情形下，提著一筆財產，實在予伊心內非常滾絞，這份心思也無意中浮上面來。
風自我發覺康四海有淡薄仔躊躇，隨開喙問伊啥物原因。
「我按呢白白接受你的財產，心內袂得過。」
「我毋是白白予你，是提來買你的信用，愛你保守我退出江湖的消息，和我日後生活的所在。」
「這真簡單，曷使用錢？」
「若是無昨暗的代誌，確實真簡單，抑毋過……」
風自我的話免講透支，康四海也了解其中的鋩角。昨暗去刣唐山將軍規家伙，這件代誌反勢已經佇規台灣府傳甲鬧熱滾滾，免偌久官府一定會查甲真齊勻，無論按怎就是欲共兇手掠到手。所以，這馬當佇風火頭，欲佇這當陣替風自我買地，真是困難重重，畢竟，官府的手段濟甲若牛毛，無細膩夆釘著，是毋是會講出風自我的下落就真歹講矣。
只是康四海對風自我無願意信任伊，有小可仔無歡喜，心內咧想：「都認我做小弟，煞就愛用錢買我的喙，按呢敢有算兄弟？」閣想：「阿伯以早教我愛守信用，袂使做背骨的人，我怎有可能出賣家己的兄弟？」
「你咧想啥？」風自我看康四海攏無出聲，「你免佇遐想一寡仔有的無的，共錢收落，代誌辦辦咧，你就會使做阿舍，抑是講你欲繼續做乞食？」
「哪有可能！」康四海想起老乞食的遺言，雄雄一陣鼻頭酸，突然覺察著家己實在無啥尊嚴，去堅持啥物原則，做乞食傷艱苦矣，「我知影矣，我會照你講的去做。」
風自我聽了真滿意。
「著矣，我提著錢了後，欲佗揣地主？」
「你提著錢了後，就隨去店仔口揣一个姓黃的阿舍，伊就是地主。」
「喔喔。」閣問，「買地毋是一兩工的代誌，若買好，是欲佗揣你？」
「你免煩惱，若買好，我就會出現。」風自我對衫仔內提一粒紋銀出來予康四海，「去買一領好衫仔來穿，若無，去到錢莊都夆戽出來。」
康四海共紋銀提過來了後，目頭結做一虯。
「有啥物問題就緊講講咧。」風自我行到門口，「若無，我是欲走矣。」
「既然你的功夫遐厲害，曷使用錢買地？曷使驚唐山兵揣著你？」
「第一，我無愛共人偏，第二，昨暗了後，我深深了解，閣刣人不過是加添殺
業，加閣較濟悲傷的家庭，所致，莫夆揣著較好。」風自我共門閂搝開，「敢猶閣有啥無清楚的所在？」
康四海的頭一下搖煞，就看風自我開門出去，一下仔就看無人影。
绁落來，康四海照風自我的話，買衫，領錢，揣地主，買地，過程中，也替家己佇店仔口買一間厝宅，攏總開欲兩個月的時間才共代誌辦好，就佇土地買成彼工暗暝，風自我閣一改出現矣。
一下看著風自我出現，康四海就欲共關仔嶺彼个地契予伊。
「免，我都欲離開江湖矣，這對我來講，是一張紙爾爾。」風自我神情清爽，笑甲真歡喜，「你愛好好寶惜這馬的一切，用遮的錢去做一个小生理，然後𤆬某生囝……」
「我共你曷無相捌，為啥你敢信任我？閣予我遐濟錢，敢講……」
「敢講啥？」
「你毋驚我錢提的做我走，甚至告官？」
「哈哈哈……」風自我連笑幾仔聲，「你做啥我攏知知，你若背骨，我就會出手共你收起來。」
聽著這句話，康四海心頭糾一下，心內咧想：「看起來伊一直佇暗中監視，認我做小弟，煞無信任我，按呢算啥？」
「時間真晚矣，我欲走矣。」風自我行向康四海，伸手去搭伊的肩胛頭，「好好仔保重，我的小弟。」
康四海聽一下，鼻頭竟然小可仔酸酸，明明心中對風自我猶有淡薄仔怨言，聽伊講出小弟兩字，一陣離別的傷悲就對心內軁出來。
風自我越頭行向大門，欲出去時，雄雄留下一句話……
「出賣我，就愛死！」
為什麼會看到廣告
3會員
34內容數
留言0
查看全部
你可能也想看
Google News 追蹤
現代社會跟以前不同了，人人都有一支手機，只要打開就可以獲得各種資訊。過去想要辦卡或是開戶就要跑一趟銀行，然而如今科技快速發展之下，金融App無聲無息地進到你生活中。但同樣的，每一家銀行都有自己的App時，我們又該如何選擇呢？(本文係由國泰世華銀行邀約)
今天我會用不同角度帶大家看這款國泰世華CUB
嘿，大家新年快樂~ 新年大家都在做什麼呢？
跨年夜的我趕工製作某個外包設計案，在工作告一段落時趕上倒數。
然後和兩個小孩過了一個忙亂的元旦。在深夜時刻，看到朋友傳來的解籤網站，興致勃勃熬夜體驗了一下，覺得非常好玩，或許有人玩過了，但還是想寫上來分享紀錄一下~
康熙無意間提起明珠，卻不想沿這話題多講，掉過馬頭往西行去，走了一陣忽聽有人叫喚：「三阿哥！」回頭四顧，卻不見左近有人，便問常寧道：「方才誰叫三阿哥？」常寧一怔，答道：「三阿哥留在京師，方才沒人叫三阿哥。」康熙伸手握住頸間嘎烏盒，呆了片刻，說道：「常寧，我想成德是去了。」
小的時候玩膩了鬼抓人、躲避球、躲貓貓、還有1.2.3木頭人，因為某次看到了印第安納瓊斯那冒險超帥的電影，所以玩起了尋寶遊戲，而身為靈魂畫師的我總是畫出連畢卡索畫布出來的鬼畫符，「我將來要當個冒險家，然後就像印第安納瓊斯一樣!」我這麼說「那我一定要當考古學家，之後就出名了」我妹也跟著說道，「吼吼!
“小傢伙，要知道‘塞翁失馬，焉知非福’啊！”老者對着牧天痕摩挲着鬍髯笑道，“你要相信，是你的終究還是你的，就看你能不能把握住了。”牧天痕聽後心裏的火氣也是壓下來好些，但還是有一股悶氣纏繞在心中無法發泄出來。過了好一會兒，牧天痕才緩緩開口道:“你剛纔說能幫我獲得力量，那你準備怎麼幫我？”
老者望了牧
現代社會跟以前不同了，人人都有一支手機，只要打開就可以獲得各種資訊。過去想要辦卡或是開戶就要跑一趟銀行，然而如今科技快速發展之下，金融App無聲無息地進到你生活中。但同樣的，每一家銀行都有自己的App時，我們又該如何選擇呢？(本文係由國泰世華銀行邀約)
今天我會用不同角度帶大家看這款國泰世華CUB
嘿，大家新年快樂~ 新年大家都在做什麼呢？
跨年夜的我趕工製作某個外包設計案，在工作告一段落時趕上倒數。
然後和兩個小孩過了一個忙亂的元旦。在深夜時刻，看到朋友傳來的解籤網站，興致勃勃熬夜體驗了一下，覺得非常好玩，或許有人玩過了，但還是想寫上來分享紀錄一下~
康熙無意間提起明珠，卻不想沿這話題多講，掉過馬頭往西行去，走了一陣忽聽有人叫喚：「三阿哥！」回頭四顧，卻不見左近有人，便問常寧道：「方才誰叫三阿哥？」常寧一怔，答道：「三阿哥留在京師，方才沒人叫三阿哥。」康熙伸手握住頸間嘎烏盒，呆了片刻，說道：「常寧，我想成德是去了。」
小的時候玩膩了鬼抓人、躲避球、躲貓貓、還有1.2.3木頭人，因為某次看到了印第安納瓊斯那冒險超帥的電影，所以玩起了尋寶遊戲，而身為靈魂畫師的我總是畫出連畢卡索畫布出來的鬼畫符，「我將來要當個冒險家，然後就像印第安納瓊斯一樣!」我這麼說「那我一定要當考古學家，之後就出名了」我妹也跟著說道，「吼吼!
“小傢伙，要知道‘塞翁失馬，焉知非福’啊！”老者對着牧天痕摩挲着鬍髯笑道，“你要相信，是你的終究還是你的，就看你能不能把握住了。”牧天痕聽後心裏的火氣也是壓下來好些，但還是有一股悶氣纏繞在心中無法發泄出來。過了好一會兒，牧天痕才緩緩開口道:“你剛纔說能幫我獲得力量，那你準備怎麼幫我？”
老者望了牧