日常雜事一訪客

頂禮拜六，早起經拄唸煞，想欲拍手遊的時，看著三个人騎機車來到門口。

透過玻璃窗看出去，做頭前的人我捌，伊是阮老爸認的查某囝。二十偌年前，阮老爸認伊做契查某囝，毋過伊無定來，一年差不多來一改，幾禮拜前捌來，無想到遐緊會閣來，更加料想袂到的是伊閣𤆬人來遮。

綴阮義姊來的彼兩个，無論我按怎想就想袂出來in是啥，頭起先我掠做是義姊𤆬來拜拜的香客，無想到īn一下行入門，彼兩个毋捌的隨叫我阿舅，我才想著這兩个是義姊共前翁k生的囝。義姊共k攏總生三个，彼工來的查埔L排第二，查某P排上尾，上大的無來。

想起頂一改看著這兩个囡仔，猶閣小細漢仔爾，而且彼時我嘛猶蹛佇舊曆，想想一下，時間也已經有十幾年矣，彼當陣細粒子的囡仔，這馬攏大人矣，親像一寡序大定講的：「予囡仔逐到老。」較早少年對這句話無啥感覺，今看著這兩个，雄雄才發覺家己嘛袂少歲矣，就佇無聲無說當中予in逐老去。

我請in三个入座，拄開始想講無熟，彼兩个少年的會歹勢，毋知欲講啥較好，無想到是我加煩惱，彼兩个完全無這个問題，共真濟年毋捌看的阿舅講話，攏無一點仔生份，顛倒是我這个做阿舅的，有淡薄仔毋知欲講啥，實在真歹勢。

紲落L就講伊這馬咧做兵，歇睏的時就去廟仔學跳官將首，若是有出陣，嘛會綴人去鬥相共，有時摃鼓，有時攑僮仔，雖罔伊今猶無夠格落去跳官將首，毋過伊相信免偌久就有法度。

L自伊猶閣細漢，伊的爸母都定講伊tsín愛看人廟仔的tìn-tòng-tshainn，逐擺若是佇路的看著陣頭，就算是猶坐佇機車頂懸，攏嘛愛先停落來，等伊看夠本，才通好行，彼當陣in焦認為細漢興興爾爾，無想到大漢有影去參加tīn頭。伊的爸母本身有咧行宮廟，所致都無反對，焦共伊講袂使去沐著䆀的代誌，身體愛照顧好勢，出陣的時袂使共人相拍冤家，其他就無閣講啥。

聽L講遮的時，伊的表情誠認真，毋是凊凊彩彩，總是in媽媽對伊跳官將首猶有淡薄仔礙虐，認為八家將、官將首煞氣較重，會傷著家己，但是，看著L堅定的意志，也只好請神明加保庇一下，希望伊出陣的時，平安順序。

十幾年的時間，目一下𥍉就過去，當初時的囡仔已經是漢草誠好的大人，當咧追求家己的夢，看著in，想自己，早就毋知做夢是啥滋味。