風劫－第三葩

回想煞止，康四海佇這進無步退無路的困境，心內清楚，已經無任何挲圓仔湯的機會，無講出來，這間厝內的人，只有死路一條。

「姦恁娘咧，講毋講！」光頭仔的面紅甲膨皮。

康四海的兩个幼囝驚甲那哭那喝阿爹，無論康夫人按怎安搭嘛無效。

這時陣，殺手雄雄看著康夫人手中抱的囡仔睏甲真入眠，外口按怎吵，就袂精神，一个念頭雄雄閃過。

「刣大人費氣，先刣伊手中抱的嬰仔！」

康四海一下聽，跤步馬上踏向康夫人，毋過，拍手擋在頭前，袂當過，焦目睭金金看光頭仔對康夫人手中搶過嬰仔，刀攑起來就欲對嬰仔頷頸撩落。

「小等一下，我講！」康四海夆逼甲喝出聲，「我講，請你莫傷害我的查某囝，我共風自我的下落講予你知。」

「較早講毋就好。」光頭仔共嬰仔還予康夫人，「害恁爸舞舞一大攤。」

「風自我佇搭？」殺手聽著康四海所講的，心內大暢，馬上開喙，「你直接𤆬阮去揣伊，行！」

就算無願意背骨，為著保全家的命，康四海也只好照做，佮這陣凶神惡煞去揣風自我。

一路上，拄著人共康四海拍招呼，伊攏是笑笑仔頭頕一下，無共怹加講兩句仔，因為殺手這陣人一心想欲緊揣著風自我，所以無彼个冗剩時間通予康四海共人開講。

不而過，較按怎講，康四海毋是練武的人，一箍人瘦若猴，跤手是真緊，煞無啥物擋頭，行無幾里路就愛歇喘一下，才會當繼續行，這種情形看佇光頭仔眼內實在強欲發性地，若莫殺手，康四海早就去蘇州賣鴨卵。

日頭漸漸來到頭頂，才總算行比一半較加的路，這一路上康四海一直咧想，為啥物殺手會知影伊有風自我的消息，想甲頭疼，也猶原掠無摠頭，欲問閣驚，無問閣礙虐，滾絞佇腹內的心情，誠無好過。

一陣人閣行欲一里路，頭前遠遠行來一个人，彼个人肩胛頭擔兩大甕酒，康四海兩蕊目睭直向酒甕看去，喙瀾強欲津落來，真想欲共彼个人分一杯酒。

擔酒的人目尾瞭著康四海予八个面腔歹看的人圍著，心內真驚會惹麻煩，三步當做兩步行，想欲緊咧離開。

看著擔酒的走若飛，康四海真怨嘆，心中咧想：「若毋是搪著這款代誌就好矣，就免忍受這癮頭發作……等咧！」想到遮，一个想法鑽入頭殼，「敢會是舊年八月半，佇馬老爺的厝宅……」

。。。

八月半是團圓的日子，照理講是無人會佇這工去外口應酬，攏會踮厝內共親人賞月食月餅，彼工透早康四海嘛想講好好仔陪厝內的人過節，啥知有人來邀請伊去作客，這个來邀請的人就是馬老爺的小使。

若是一般的人，康四海是無可能會去，像伊這種有錢的阿舍，一寡欠錢的人攏會相爭來交往，若欲逐个插甲到，連鞭就無鼎閣無灶，所以會使推就推。但是，康四海一下聽著是馬老爺派人來請，隨喊阿山準備一下，中晝未到就前往馬府。

講著這位馬老爺是啥物角色，會當予康四海放棄共親人過節？馬老爺佇安平彼搭會使講是喝水會堅凍的人物，海運生理做甲真大，手中掌握幾若隻船，日日夜夜佇唐山各个港口共安平港來來去去，也因為定定愛共唐山接接，一寡仔白道的門路自然愛了解，時間一下久，馬老爺佇台灣府的生理人箍仔內有真懸的地位。

康四海是生理人，接著馬老爺的邀請，連聲就未喝出，人就坐佇馬車內底，直咧催阿山較緊較緊，一直日頭欲落海，才來到馬府。

行入馬府，就有家丁來𤆬康四海去揣馬老爺，一路上愈看愈奇怪，敢若除了伊以外，無其他的人來參加馬老爺的宴會，這時來到一个亭仔，亭仔內有一塊大紅桌，桌邊三个人，一个查埔坐踮椅頭仔，一个查某𡢃仔替查埔人倒酒，一个穿媠媠的歌旦那彈月琴那唱歌。

康四海一下共亭仔內查埔人對著目，查埔人隨大聲招呼伊入來亭仔。

「來來來，坐我邊仔坐我邊仔。」查埔人目睭看去正爿，「替康老爺倒酒啊，閣徛遐創啥！」

「馬老爺，這予阿山來就好，那都麻煩……」

「講甲這，咱的交情毋是清清彩彩矣！」

這句話聽入心，康四海喙笑目笑。

馬老爺共康四海頭前的空杯仔倒甲滇滇滇，兩个人開始互相敬酒，啉過兩三杯了後，绁落來講一寡無重要的代誌，那講那啉那聽歌旦唱曲。

月下的亭仔是遐呢仔快樂，只是徛佇邊仔的阿山感覺有小可仔奇怪，為啥物馬老爺一杯酒就愛啉兩三改才會空，怹老爺一喙一杯，攏無咧囉嗦，所擺，免偌久，就看怹老爺面仔紅紅，閣一時仔，開始厚話，阿山想著家己的身份，毋敢阻止老爺繼續啉，焦會使佇邊仔向望老爺緊咧煞。

阿山的向望，月娘毋知，興酒的康四海閣較無可能知，一下聽馬老爺講今暗的酒是刁工對唐山捾轉來予伊啉，心內暢甲欲飛上天，偷偷咧想：「我不過是一个田庄的阿舍，煞得著馬老爺的重視，今暗就算腹肚啉甲破去嘛無要緊。」

馬老爺看康四海啉甲紅膏赤蠘，微微仔笑，閣共啉焦的空杯仔斟予滇。

「康老爺誠是海量，一喙一杯，一點仔躊躇都無，確實是酒國好漢。」

「哈哈哈，馬老爺傷過客氣，我不過是一个庄跤人，配袂起好漢兩字矣。」康四海共拄仔斟的酒啉焦，「欲講好漢，像馬老爺你這款烏白攏食迵海的人，才是真真正正的好漢，甚至是英雄，這支的！」

看康四海比出的大頭拇，馬老爺笑幾聲了後，共伊的手推轉去，家己倒一杯酒啉落，嘆一聲。

「馬老爺你是按怎？」康四海看馬老爺按呢，目頭糾倚，「為何欲吐大氣，是啥物代誌？」

馬老爺閣倒一杯酒啉落，面色無蓋好看，見若欲開喙，就又閣闔轉去。

「馬老爺你莫共我嚇驚啦！」康四海熟似馬老爺咧欲三年，從來毋捌看伊按呢，今暗雄雄看伊若像啞口硩死囝，一時煞毋知嘛創，「馬老爺你若搪著啥物困難，講出來好參詳矣。」

「唉，毋是我搪著啥物困難，這件代誌共你有關……」

「共我有關係？」

「著，而且……」

「按怎？」

「我驚講出來，你會想東想西。」

「哈哈哈，做你放心！」康四海斟酒入杯了，隨共酒送落腹，「我康四海無論拄著啥物䆀代誌，只要有酒，就會用得解千憂。」

「好，你都按呢講矣，我無講煞換我毋著。」

「請講！」康四海閣啉落一杯，「誠是好酒矣！」

馬老爺欲講前，向歌旦佮查某𡢃使一下目尾，閣用踵頭仔佇康四海眼前比向阿山，等康四海叫阿山去外口等了後，才開喙。

「彼工水仙公廟咧做醮，我去到遐看著一陣乞食咧討分，這是無啥好奇怪，但是等我燒香煞，共內底的頭人拍完招呼，欲離開時，遐的乞食圍圍做伙佇遐嗤舞嗤呲……」

「這共我有啥關係？而且乞食做伙拍抐涼毋是啥奇怪的代誌。」

「若是講一寡哩哩硞硞的代誌我是貧惰插，不而過，我煞聽著怹咧講你。」

「講我？」

「無錯，就是你！」

「我有啥貨通夆講的，哈哈。」

「怹講你是乞食界內底上蓋神奇的人物，會當對一个乞食，佇半年內變做一个阿舍……」馬老爺掠康四海金金看，「這敢有影？你較早是一个乞食？」

「哈哈哈……」康四海那笑那斟酒，「無毋著，我較早是一个散甲鬼欲拖去的乞食。」

「喔！」馬老爺的兩蕊目睭弓甲若天頂的月娘，「若按呢，你是按怎變甲遐好額？做生理？」

康四海頭搖一下，繼續共杯中酒送入喉。

「毋是做生理，按呢毋就……」馬老爺看康四海愈來愈醉，「行歪路？」

「歪路？哈哈哈，馬老爺你真愛講笑，我，真無膽，欲怎會去行歪路，就毋是揣死糕……」

「你誠無意思矣，有好空的攏袂曉報一下。」

「哈，馬老爺莫受氣，我確實是半路拄著財神爺，是真好空，猶毋過……」

「毋過按怎？講啊！」

康四海啉甲茫茫茫，一下聽馬老爺的口氣無好，驚講因為誤會來得失著伊，就共搪著風自我的來去讀出來，只是無講出風自我的名，以及收跤洗手的代誌。

馬老爺聽完了後，笑一下，無紲落問，重新共歌旦叫轉來，共康四海一直啉甲三更鼓響才隨人離開。