⋯
「⋯⋯這水性ê防水抹--落，會成做一延保護⋯⋯等咧加抹一延，水就袂走--過-去⋯⋯」
前仔浴間水滲對房間--去，請塗水師傅來處理，khah知影壁內水管ê問題較大門，致使ài將壁ê一部分拍掉chiah通辦。
好得，落尾順水道頭管「轉彎踅角」，總算揣著塑膠管出問題ê位，順利共換掉閣重接水路，房間就無閣漏水。
問題得著解決，心情sī綴leh輕鬆。聽候師傅收尾ê時陣，順勢共這位"讀書時 ê siăn-pái"請教「保養」ê智識。
「⋯⋯像阮這厝久--來外口壁攏有小可空縫，敢通照你拄仔紅毛塗粉kah沙ê比例來鞏？」
「會用--得啊，這陣時行『DIY』，比例我基本上sī掠砂規包、紅毛塗三觳，觳仔就像我手提若碗公ê這款⋯⋯」
「⋯⋯若一寡鋼筋生鉎紅毛塗淡薄仔煏--開ê位，通按怎處理khah好？」
「彼先共hit位ê紅毛塗thuh予掉，chiah提hŭ-làn-tah鬥專門ê鐵鑢仔，抑sī直接用鐵抿仔，共鋼筋表面鑢予清氣，chiah抹油性ê油漆，閣來⋯⋯」
自按呢，探討chhiau紅毛塗、補壁縫ê問題掠外，閣對便所設備、壁面油漆、厝頂防水、成格，甚至往過起厝ê工路，講到現此時ê做法。
這「現場」ê經驗，那聽sī那「厝」味⋯⋯
⋯
「⋯⋯臨時臨曜共你麻煩，歹勢--呢！」
發財仔車ê後斗，半包較少ê紅毛塗、用賰ê兩包沙、飼料袋仔貯ê建築廢棄物、50公分闊ê面桶、空水桶幾若个、鴨頭仔、hŭ-làn-tah、chùn-tōng-á、摃槌仔kah其他大大細細ê工具、防水材料⋯⋯
「袂--啦，後壁若閣有問題chiah敲予我就好。」
「好，多謝，順行--喔！」
師傅上車，倒爿ê方向燈切--loeh，就對路--裡駛--去。浴間ê問題總算完滿--矣。
紲--loaih，一寡khah簡單ê「保養」穡頭，定著需要家己接續來處理，向望 後日一切ê工攏通有「儼硬」ê功效。
⋯
⋯
