「今仔日⋯⋯三隻？」
我像平常時行對灶跤，看著槽仔內，跤爪伸直、身軀坦攲的雞（koe)「靜靜仔」䖙--咧。早早就起床的阿母，手掛手囊，腰縖煮食裙仔，準備欲照起工來處理。
爐仔頂，規鼎滾--過的水，燒沸沸，表面直直有水氣升懸。略略仔有味的雞羶，若予翕翕的空氣𤆬--咧，即時，蹛規个灶跤沓沓仔發散⋯⋯
逐擺鼻著這个味，若予雞毛（mn̂g)尾擽--著，對鼻頭癢甲前擴--去。這「有癢有味」的感受，隨予頭殼轉踅--起-來，走揣早前，阿媽跤手猛醒、扭掠，飼雞、處理雞的情景⋯⋯
「我來鬥相共。」我講。
「好--矣，無 這位予--你。」
阮國中了後，阿媽較有歲--矣，飼雞的穡頭才漸漸仔換阿母來扞。
…
若講著飼雞，定著予人辛苦的印象，毋過，飼雞，嘛有趣味的代誌。
踏入有起有落的雞牢內底，跤穿的雨鞋，四常是「三跤步，雙跤糞。」那行，鞋底那厚。有時陣，兩、三个囡仔相招綴--來，煞共驚人的雞屎看過過，四界行，逐位趒，若咧踅「雞」的款！
人濟，穡頭通少，大人飼雞，囡仔抾卵。
幾个囡仔，目睭掠雞牢逐所在金金相，析析(kho̍k-kho̍k)繩，直直注意一寡較揜貼的位，表情頂真，動作張持，認真探查白拋拋抑紅幼幼的雞卵形影！
若大人揣--著，是心內感謝，囡仔揣--著，是喙笑目笑。
「嬸婆，」蹛樹跤的小外甥女雄雄喝一聲，連鞭跤步細膩閣有速度，緊行--過-來，講「阮抾著一粒卵！」
一粒白仁的雞卵，牢一絲絲仔黃色的幼毛佮一點點仔暗茶色的「自然物」，in提--咧是笑吻吻！
「喔，誠gâu！恁佗位看--著--的？」
…
…
一隻清好勢，手提第二隻，繼續挽毛。
「⋯⋯這擺飼的雞母，敢若卵生較少？抑是拄夠水而已？」
有當陣，踏入仝款的雞牢，雞寮仔內、外口樹跤、厝角壁邊，仙揣都無半粒⋯⋯抑是講「大格雞母 慢孵卵」？
「可能予雞公食--去--矣。」阿母講。
「唅？啄甲一屑仔殼都無？」
「嘿啊，以前就捌發生--過，落尾毋才講，等雞母夠水--矣，來隔一位予生卵。」
…
毋管按怎⋯⋯若有通食，的確愛感謝。
總--是，彼食卵的雞公⋯⋯有影正港的「偷食雞仔」！
…
…
