⋯
⋯
⋯
「總算到--矣！」
眼前，一个半門懸的小洞穴，塗色的表面有一寡彎彎、直直閣幼膩的線路。
洞口，是四四角角，閣有旋藤，兩塊薄薄的石盤chhāi直徛兩爿，像門扇開開。
若有微微仔風吹--出-來，通出發--矣，來順路行--入-去，對彼烏趖趖的洞口。
⋯
「嘿，淡薄仔狹!」
愈入去，空間愈細，身軀向（àⁿ）愈低，愈入去，看愈清楚，一个有空隙的洞穴。
洞內平平閣空空，無啥物坎坷的所在。來坐咧歇喘，停睏--一-下。
一罐果汁，一寡糖仔餅，等袂赴啖糝--"兩"-下，補充體力。
邊仔，雄雄有光線炤--入-來，對彼目睭仁大的縫⋯一个縫，兩个縫，三个敆縫⋯⋯
共偷看--一-下，是白白的天，絲絲仔烏雲，日頭佇西爿文文仔照，地面是一个閣一个無仝形體、五花十色的⋯樹仔佮草部，猶閣有⋯玻璃矸仔？
⋯
「好，差不多--矣！」
物件收收--咧，起行，淡薄仔翕熱，汗滴--落-來--矣。
那行，汗那滴，那行，路那細，連跍的空間都無--矣，狹狹的路，直直對頭前--去。
覆--lueh，繼續向（ǹg）前，塗味佮濕氣做伙，汗順面模流--落，心情是愈歡喜，衫是愈澹。
風，閣輕輕仔弄--過，𤆬走一絲仔翕熱。
⋯
「欸？」
等--一-下！
頭前，一个踅向正邊的斡角，壁頂有淡薄仔影，峇微仔影⋯彼影⋯若有一个毛聳聳、膨獅獅的面，猶閣有⋯三角形的⋯耳仔？
哼？咧哈唏⋯⋯喙齒尖尖，利劍劍的款！
「好，沓沓仔倚--過-去⋯⋯沓沓仔來⋯⋯」
啊，影開始振動--矣，踅頭，欲走--去--矣！
緊爬向前--去，緊--咧，佇彼正斡角共偷看--一-下⋯⋯
「嘿。」
看著--矣！
一條暗茶色、毛毛的尾溜旋--去，佇較頭前向倒邊的斡角！
⋯
越--過-來，空間有較闊--囉。
跍--咧較好覆佇塗跤，好禮仔，慢慢仔，起--來。
動作較輕--咧，共汗拭拭--咧，莫予滴--落-來！
影閣出現--矣，佇倒斡角的壁面，向前，這改莫有聲！
「欸？」
彼影⋯面變甲瘦瘦閣捅--出-來，耳仔長長嘛較大⋯哪會佮拄仔無仝？
哼？閣欲走--矣！緊，緊綴去看覓！越--過-去，共看予清楚⋯⋯
⋯
「喔⋯足光--的！」
眼前，規个洞穴光映映，予目睭強欲擘(peh)袂開--矣，干焦影--著黃幻幻、長長的尾溜⋯⋯
「哈！到位--矣，後改，來做一个較長的！」
風，陣陣仔吹--來，一點仔都袂翕熱--矣。
⋯
⋯
⋯
「⋯⋯你一直看新冰箱的箱仔內欲創啥？」
「無--啦，想著以前七、八歲的時，共幾偌个紙箱仔接做伙來耍。」我講。
「拄仔你外甥女才講欲耍這个箱仔。」
「Hioh，予in耍--矣。」
