不專業足球筆記（四）

不專業足球筆記（四）

1. 今個星期最爆既新聞，一定係星期五當日，響毫無預兆既情況下，利物浦既領隊高普宣佈季尾離任，呢位德國領隊曾經響2019至2020賽季打破曼城既壟斷，奪得球會史上第一座英超冠軍。

2. 爆完一單仲有另一單，巴塞隆拿領隊沙維響星期六反輸比維拉利爾3-5既比賽之後，宣佈同樣會響季尾會離開巴塞。

3. 兩單性質其實唔同，利物浦今季戰績唔錯，而家響英超高据榜首，走勢強勁，真係有機會力爭球會史上第二個英超冠軍，只係高普話自己“I love Liverpool but 𝐈 𝐚𝐦 𝐣𝐮𝐬𝐭 𝐫𝐮𝐧𝐧𝐢𝐧𝐠 𝐨𝐮𝐭 𝐨𝐟 𝐞𝐧𝐞𝐫𝐠𝐲”，所以先決定退下來。

4. 沙維帶領既巴塞近況就認真麻麻，除咗響西超盃決賽1比4不敵皇馬之外，國王盃又出埋局，輸埋比維拉利爾之後仲要落後榜首既皇馬成十分。佢響記者會上面似都表現得對球會幾不滿，又話做巴塞教練唔開心，又話呢份係一份殘忍既工作，好多人會攻擊同唔尊重教練，不過就話無論點都好，佢會好好咁帶好今季，只係呢個決定係唔會改變，就算拎到歐聯都係咁話。

5. 有時啲嘢真係一環扣一環，西班牙每日體育報報導，話阿仙奴領隊阿迪達今季完結之後就會走人，去巴塞頂替沙維喎。嗱，聽住先喇，始終唔係啲好reliable既source，但如果最後阿迪達又真係走咗去巴塞，其實都唔出奇，話晒佢都係西班牙人吖嘛，佢又效力過巴塞B隊，況且佢哋好興兒巴夢、兒皇夢呢啲架嘛（講笑）。

6. 香港球壇方面，有一個令人傷感既消息，就係香港隊及愉園球迷James，響睇完第一場香港對阿聯酋既分組賽之後，自己去咗德國旅行期間暈倒，失救而逝世。雖然我唔識James，但係聽到一個同樣係港隊支持者既球迷響作客去睇亞洲盃期間出事，個心都真係唔好受。

7. 球員轉會方面，同流浪解約既李毅凱，傳聞響有黎自中甲中超球隊招手下，選擇加盟本地班霸理文，搞到放人既流浪總監李輝立好鬼興，而阿凱都要道歉，話自己處理得唔好。其實又係既，流浪以為你返大陸搵食先至同你解約放人，點知一個屈尾十你就加盟聯賽既競爭對手，連轉會費都冇。

8. 阿凱以前都上過大陸搵食，可能見過有啲黑暗嘢，所以既然理文招手，出手又唔低，咁就梗係留返響香港喇。不過就難為咗諗住唔阻人發達既立立嘞。

9. 黎緊今晩香港就會響省港盃就會先主場對住廣東，呢次係疫情之後第一次舉辦省港盃，港隊以一班年青球員做骨幹去挑戰廣東隊，希望大家繼亞洲盃決賽周之後，繼續多多支持香港隊。

10. 不過足總真係唔知邊個天才編賽程…竟然將冠忠南區對香港U23既菁英盃賽事，放埋同一個時間踢…你叫啲有心既球迷點睇？就如我響第二集所講咁，足總根本就冇尊重過呢個比賽…

#不專業足球筆記

#香港隊勁揪 #香港隊

#省港盃 #香港對廣東

#利物浦 #巴塞 #阿仙奴

廣告時間 -

ig: leafopen3

instagram.com/leafopen3

fb: leafopenleafopen

facebook.com/leafopenleafopen

如果有興趣睇下我既其他寫作作品，可以上leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上https://www.penana.com/membership_plan?id=52938 或者https://m.penana.com/stream?id=52938