不專業足球筆記（二）
不專業足球筆記（二）
勞烈斯在對陣伊朗一戰表現不
1. 2023世界足球先生結果出爐，係美斯冧莊，連續兩屆得到呢個殊榮。 2. 唔知大家點睇，但因為呢個獎其實係唔計卡塔爾世界盃既（睇新聞評分期係由2022年12月19日至上年8月20日），呢段時間之內，佢只係攞咗個法甲冠軍同北美聯賽盃冠軍，相比起夏蘭特既英超、足總盃同歐聯呢三個含金量咁重既冠軍同埋響比賽當中所表現出黎統治級既表現，我就覺得夏蘭特既含金量明顯重好多，所以好難怪宣布獎項得主既時候，夏蘭特老豆（都係夏蘭特）塊面仲黑過米高佐敦。
3. 所以話，世界足球先生既投票準則，有時都真係好睇果位球員既人氣，得罪小小講，2023球季既美斯就係咁。今年曼城同夏蘭特既表現暫時冇上年咁凌厲（當然又唔算話係好差），加埋佢自己又傷咗，真係唔知2024世界足球先生有冇佢份？
4. 講sharp醒，皇馬既比寧咸就真係好sharp醒嘞。不過而家球季先去到一半，好多比賽都未踢，我都廢事繼續自己一個豬UP，睇埋下半季咪知囉。
5. 另外，另一個對我黎講都幾震撼既消息，真係摩連奴比羅馬炒咗魷，過唔到「摩三季」呢個命運。其實羅馬作客AC米蘭之前已經有傳，佢如果呢場再輸就會炒魷，所以雖然震撼，但心入面有個底，又唔叫意外既。
6. 意甲球會既財力都比較差，佢都係限米煮限飯，仲為羅馬贏咗一個歐協會盃，打入咗歐霸決賽（比安東尼泰萊屈死咗啫），都算好難得。不過我見過有個講法都幾有趣，真係話意甲球會雖然唔係咁富有，但羅馬響當中都算投入，所以佢而家既成績唔符合預期，比人炒魷都唔出奇。
7. 摩佬比人炒咗，但似乎有唔少羅馬球迷唔捨得佢，響FaceBook見到既都係支持佢居多，仲有人話佢黎咗之後，羅馬既比賽由場場都坐唔滿，變到一票難求。點都好，佢離隊都已經成為咗定局，就睇下接替佢既羅馬傳奇迪羅斯帶領球隊會有乜嘢表現，今週承接住換領隊效應，以二比一擊敗咗維羅納，不過之後仲有半季，大家不妨拭目而待。
8. 講返本地波，香港隊拉咗隊去踢亞洲盃決賽周，但其實本地都仲有比賽踢緊，就係有「精液盃」之稱既菁英盃。呢個志在培養年青球員既比賽，足總編賽程既時候梗係理撚得你，見佢哋之前已經將精液盃既比賽安排響國際賽既檔期就知佢哋班大帝係攞黎攝時間。講真，其實我覺得對呢個比賽係有啲唔尊重，球會都成日唔齊腳影響可觀性，不過同時都逼住球會出多啲後生仔，貫徹呢個比賽既宗旨，所以真係睇你用咩角度去睇。
9. 精液盃我覺得雖然雞肋，但都有佢存在既價值，比到好多年青球員有出場既機會。講起黎今週既精液盃都有個好驚喜既鏡頭，就係回歸流浪既歐陽耀冲入波，助流浪逼和均業北區一比一。
10. 對於呢位好似去Working Holiday既球員，其實我真心覺得佢呢個球員生涯係可惜既。我唔係鳩笑佢果啲人，出賣年齡都要講，我細細個由佢踢香港08已經睇緊，仲有一件印咗佢名既南華波衫，果陣佢係我其中一個好欣賞既球員，好留意佢，甚至佢去葡甲果陣我都好支持佢，只係後來佢果十年所謂既外流生涯…
11. 我係真心覺得佢如果唔係外流流到走火入魔既話，佢響球壇既成就一定遠超而家既高度，不過講呢樣嘢真係可以講篇文出黎，有機會先同大家再分享喇。
12. 講埋亞洲盃先，講緊中國對黎巴嫩既比賽，出現咗非常治癒既一幕，猶戴比黎巴嫩既球員用風雷電踢中佢個靚仔樣，哎呀，真係慘慘豬囉。
13. 不過好多謝你為我哋帶黎咁精彩既片段，希望猶戴將來可以為我哋泡製更多笑料。
14. 今日既重頭戲，就係香港對伊朗，雖然上場對阿聯酋港隊既表現十分精彩，但今次對世界排名21，亞洲二哥，世界盃常客伊朗，賽前你話我唔擔心就假，甚至做好咗比人大炒既心理準備。
15. 不過安達臣麾下既香港隊，真係好為球迷帶黎驚喜，面對住呢支亞洲二哥，踢起上黎一啲都唔輸蝕，艾華頓、陳肇鈞都有過黃金機會，可惜香港隊既把握力唔夠好，如果唔係分分鐘係可以做到先開紀錄既一方，又或者響落後既情況下追平。
16. 香港隊所失既一球，加耶迪真係射得好靚，葉鴻輝真係飛到盡都救唔到。如果要彈既，係勞烈斯逼得唔夠貼，比加耶迪有個位起到腳。但如同我上次所講，呢個係好harsh既，始終香港隊唔係成日踢呢個級數既比賽。
17. 但係姑無論點都好，響短短幾個月之內，由作客世界盃外圍賽輸四球，到亞洲盃決賽周僅負一球，仲要逼搶得呢個級數既對手頻頻犯錯，香港隊既進步係有目共賭既。
18. 我覺得足總做得最啱既，係向安達臣投以信任一票，需知響進步既過程之中，並唔係一帆風順，有人會鬧港隊友賽踢得唔好，有人會鬧點解香港咁弱都要逼搶唔穩守突擊，有人會鬧響高原作客不丹點解會輸…我覺得響正式收成正果之前，經歷陣痛並唔出奇，況且真係有睇香港隊既話，響佢哋變強既過程之中，我哋唔係一樣睇到球員、球隊既進步咩？安達臣其實一路以黎想做既嘢、佈下既種子，真係唔係咁難睇得出。
19. 總之，入安達臣我哋信。
20. 執筆既時候，收到個算好勁爆既消息。曼聯委任咗曼城既COO Omar Berrada做佢哋既新任CEO。比起前任既垃圾木同阿諾，終於有返個足球界而唔係財經界既大佬黎做CEO。的確，呢個係改革方向既一大步，但曼聯響格拉沙之亂既所整出黎既爛攤子，又要幾多時間去修復呢？唉，真係唔知。
21. 黎緊星期三，香港隊仲有最後一場分組賽對巴勒斯坦，希望可以踢出好表現喇，記住啊，出線仲未絕望架，一定撐啊！
#不專業足球筆記
#羅馬 #摩連奴 #美斯 #夏蘭特 #世界足球先生
#香港隊勁揪 #香港隊
#亞洲盃 #香港1比0伊朗
#曼聯 #OmarBerrada
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
如果有興趣睇下我既其他寫作作品，可以上leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上https://www.penana.com/membership_plan?id=52938 或者https://m.penana.com/stream?id=52938
