不專業足球筆記（二十四）︰傑志理文大換血 鐘樂安、林樂勤、慈英加盟傑志
1. 新一季港超都仲未開鑼，不過各路參賽既球隊，就密鑼緊鼓招兵買馬，準備響新一季大展拳腳。最受矚目既自然係兩支班霸傑志同理文，儘管執筆時仲未有完整球員名單流出，但係憑暫時兩支球隊所公佈既官方消息，已經知道兩隊下季既球員名單會同上季有好大分別。
2. 早前傑志會長伍健響傑志友賽馬德里體育會既記者會上面，已經自爆咗球隊會由上季助教卡度素葡萄牙藉既卡度素教教，除此之外，佢同鄉蘇沙同埋由理文回巢既前港腳中堅列斯奧都會擔任助教。
3. 球員方面，就有好大既變動嘞。首先，佢哋離隊既球員人數係多達13名，當中除咗一啲上咗年紀既老將好似羅素、羅拔圖、保羅、黃洋離隊或退役之外，仲有一啲主力好似陳晉一同埋米基爾，中前場組合恩查、查理史葛都會離隊。原本潘沛軒都有機會北上外借中甲球會，不過傾唔掂數暫時走唔到住，但佢唔駛擔心，因為都仲有中甲球會對佢有興趣。
4. 咁多人走，咁就梗係有返唔少新血加盟喇。開操當日，除咗已經一早公佈咗由東方黎既鐘樂安、北區黎既林樂勤、由布力般流浪青年軍回流既慈英之外，又回收返以港腳顏卓彬為首既後生仔。唔止咁，根據伍健所講，佢哋仲會簽多六名新既外援，包括已經公佈咗既慈英(以外援身份註冊)、巴登卡、馬查度、泰利，其中黎自英格蘭既門將泰利仲效力過阿仙奴同白禮頓既青年軍。伍健之後提到仲有兩位新援都仲傾緊，不過如無意外應該趕得切去泰國集訓。
5. 提到傑志，當然唔少得講下佢哋個預備組球王金信煜喇。不過球王呢日就未有操練，伍健就球王佢有傷在身，最近兩日接受緊治療。伍健又提到，如果球王新一季想出場既話，就要努力進行由舊年季尾為佢而製訂既個Personal improvement plan（個人改進計劃），首先要將體能提升到一個地步，跟得返隊友既水平先咁話。
6. 傑志就好大動作，佢哋既死敵理文都唔例外。雖然成日話理文應該狠啲換外援、換球員，但係真係估都估唔到，佢哋一下子就放走咗十三個球員，包括約滿既列斯奧、基華尼頓、荷西安祖、亞哥斯達、迪高、袁皓俊、余沛康、馮慶燁、許可臻、高俊同洛迪古斯，仲有開心北上落班既徐宏傑、余煒廉。
7. 唔計比人掘角既球員入面，基華尼頓都走我最驚訝，話晒佢都係隊史射手吖嘛。不過，咁同時都證明佢哋有決心增強實力，搵外援既方向冇話最強，只有更強，就算你勁，但有勁過你既，你都冇得留。
8. 不過，上季有住非常出色表現既現役愛沙尼亞國腳安尼亞、前荷甲中場保利臣仲有攻入咗17球既保連奴都續咗約。除咗保利臣上季踢踢下好似有啲港超化之外，其餘兩位真係好勁，續咗呢三件強援都可以話派咗粒定心丸比理文球迷。
9. 走咗十三個球員，除咗續約之外，當然都要簽返啲新既球員先得架喇。本地球員暫時就唔算多驚喜，最出名既大概係前流浪、深水埗門將梁興傑同黎自港會、兩季以黎都keep住幾穩定既年輕後衛周子謙。此外，都仲有前香港U23成員、中場既鄧筵霑加盟。老實講，同離咗隊既幾名現役港腳相比，呢幾名新加盟既本地球員可唔可以代替到舊有既球員，都仲要再慢慢觀察先可以下定論。新既本地球員名氣就一般，實力要再睇睇，但除咗09之外，兩個新球員連埋回收既翁煦濤都係後生仔，當中周子謙都真係一個幾大既看點，就睇下呢個後生仔有冇機
會兌現到佢既潛力。
10. 不過理文搵返黎既新外援就真係夠晒響噹噹，首先有曾經效力過德甲賀芬咸、入選過伊拉克國家隊同瑞典國家隊同伊巴做過隊友既夏馬特；另外仲有黎自西班牙畢爾包青訓、身高1米9既中堅馬天尼斯。不過相比起走咗既本地球員班底，其實新加盟既本地球員感覺好似都唔係好夠，至於仲有冇其他人來投，佢哋七月下旬開操，我哋到時再繼續睇下喇！
11. 除咗兩支班霸之外，其他球隊陸續都有消息傳出黎，不過球季暑假流流長，我哋下次再傾續講，如果唔係都唔知有乜嘢寫好，哈哈。
更多專欄內容︰ https://www.leafopenleafopen.com/unprofessional9up
更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio
#不專業足球筆記 #專欄 #足球專欄 #足球 #港超聯 #理文 #傑志
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
