不專業足球筆記（二十二）︰港隊客和土庫曼取一分 南華足總盃惜負中西區得亞軍
1. 香港隊上場世界盃外圍賽主場踢出鬥志，面對勁旅伊朗都只係輸二比四，令人更加想睇下呢隊青春風暴香港隊對作客土庫曼會有咩表現。
2. 不過好可惜…呢場比賽係冇得播既…所以想睇完之後再寫返篇賽後評都唔得。
3. 執筆之時未有精華，不過就咁睇比賽既賽果，作客去到土庫曼可以守到0比0絕對唔係一個差既戰果，畢竟香港面對中亞、西亞既球隊往績真係認真麻麻，所以作客拎到一分已經收貨，但係如果可以睇埋比賽既表現去評論就更加好喇。
4. 香港隊有19名作客既球迷隨隊觀戰，就咁睇佢哋啲page所講，今場氣溫好高、好熱，球員都踢得好吃力，真係辛苦晒一眾港隊職球員，仲有香港隊既隨隊球迷。
5. 其實當日抽簽抽到呢三隊作為小組既對手時，我甚至乎已經作好最壞既打算，就係六場都輸晒，因為即使係對住同組所謂最弱既土庫曼，我印象中都未響國際賽贏過佢哋，翻查維基，歷史上2007年兩戰土庫曼係一和一負，作客仲慘吞三隻光蛋。當然，到真係踢落既時候又唔一樣既，例如主場對土庫曼，其實唔係冇攻勢，把握力好少少反勝埋都得，不過總括而言，響呢個小組入面拎到兩分，都叫做係咁架喇。
6. 安達臣就走咗嘞，大家對暫代教練盧斯爾感覺如何？會唔會有機會坐正？佢自己響記者會上面就答過呢個問題，但都係果啲行嘢喇︰盡力帶好呢兩場波，之後既嘢之後先算。但暫時我對佢幾有好感，排陣、戰術安排都好唔錯，又睇下之後有咩發展。
7. 至於安達臣去咗邊？正如之前所講咁，而今日亦都有官宣，就係佢會加盟中甲榜首球會雲南玉昆。中甲既榮譽感高啲定港隊高啲？我就一定覺得係後者，不過，我諗人工方面真係比咗唔少誠意，如果唔係巨sir都未必會走，仲要形容為「無可抗拒」既offer。
8. 港超完咗，但港甲仲有一場初級組既足總盃決賽大戰，由港甲二哥中西區迎戰港甲三哥南華，賽前當然係中西區被睇高一線，畢竟佢哋陣容好勁，有唔少前港超球員同外援，季內雙殺南華，而南華就有晉級決賽既功臣門將「粟米」鍾偉豪賽前十字韌帶斷裂，所以贏面自然係高啲。
9. 踢落完上半場已經憑大衛巴拉既入波領先兩球，都諗住中西區坐定粒六贏冠軍，但係南華勝在平均年齡後生過擁有唔少港超老將既中西區，佢哋先憑歐文洛響下半場初段頂入一球，再由日援原健太響補時追成二比二平手，如果場波有加時，活力勝過中西區既南華可能真係贏埋都唔出奇。
10. 最後場波要去到互射十二碼，去到第五輪南華隊長、另一日援伊藤紘平比沙場老將李翰灝救出，而頂替粟米上陣既葉駿桓就救唔到大衛巴拉既死角射球，中西區以總比數六比五擊敗南華奪得初級組足總盃冠軍。
11. 我係睇南華SNG130既直播，據聞連埋其他平台，網上收睇既人數係超過7000人，再加上現場有過百名擁南躉支持(有啲報導仲話有過千球迷入場)，可以見到南華呢個老字號仍然有吸引力，而同時都令現場既傳媒朋友產生咗一個疑問，佢哋即場捉住南華體育會主席盧潤森，問佢會唔會襯住個勢衝超。
12. 盧生答既答案其實都幾令人把火，簡單而言，佢係覺得南華只要肯升，就幾時升都冇問題，但升班與否就要睇下球市有冇投資既價值。
13. 我屌你咩，香港球市從來都唔值得投資架喇，但你哋孭住「南華」兩隻字，仲要享受住政府唔少特權例如優惠地租、用「非牟利」既名義響體育會設施、餐飲賺唔少錢，再加上係足球起家、香港第一支華人足球隊，你好似當年咁全華班都應該要繼續參賽喇。而家球市唔好，就係希望你哋用昔日班霸既號召力去吸引多啲球迷入場吖嘛，球市好既時候，駛鬼你加入咩？難聽啲講，你哋決定自降既時候係有份搞冧個球市添啊！
14. 其實搞青春班，吸咗成隊香港U23加幾個外援踢咪夠囉，反正而家港超都冇降班架喇，講到尾，都係南華會高層唔想比錢又想攞威，如果唔係，盧主席點會大駕光臨呢場決賽啊？以前羅傑承、張廣勇呢啲真係出錢出力(姑勿論後者搞得柒唔柒)，而家搵唔到水魚做足主，就擺爛唔玩，真係肉酸得你吖。
15. 我就係由小學開始睇南華，睇足咁多年，先對呢隊波既高層咁失望。其實要升都真係差唔多要升，再過多幾年，後生一輩冇可能再知道南華係乜撚嘢黎，事實上最近幾年港隊屢創佳績，但南華同呢段歷史都毫無關係，南華就好似局外人咁，其實都幾羞恥。
16. 不過講就講完，我真係唔信佢哋肯升班，完！
更多專欄內容︰ https://www.leafopenleafopen.com/unprofessional9up
更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio
#不專業足球筆記 #專欄 #足球專欄 #足球 #港超聯 #土庫曼
#盧斯爾 #南華 #香港隊勁揪 #中西區 #安達臣 #香港隊 #港隊教練
#足總盃 #雲南玉昆 #世界盃外圍賽
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938